ސައުދީގެ ހުށަހެޅުން ޤަބޫލު ނުކޮށް، ލުކާކޫ މަޑުކުރާނީ ޔޫރަޕުގައި
އަލް ހިލާލް އިން ލުކާކޫ އަށް ހުށަހެޅީ އަހަރަކު 16 މިލިއަން ޕައުންޑު ލިބޭ މުސާރައެއް
ލޯނު އެއްބަސްވުމެއްގެ ދަށުން އިންޓަ އަށް ކުޅުނު ލުކާކޫ
ސައުދީ ޕްރޯ ލީގުގެ އަލް ހިލާލްގެ ހުށަހެޅުން ޤަބޫލު ނުކޮށް، ބެލްޖިއަމްގެ ފޯވާޑް ރޮމެލޫ ލުކާކޫ ޔޫރަޕުގައި މަޑު ކުރަން ނިންމައިފި އެވެ.
އަލް ހިލާލް އިން ވަނީ ލުކާކޫ އަށް ބޮޑު މުސާރައެއް ލިބޭ ހުށަހެޅުމެއް ހުށަހަޅައިފަ އެވެ. އޭގައިވާ ގޮތުން އެ ކުލަބުގައި ލުކާކޫ އަށް އަހަރަކު 16 މިލިއަން ޕައުންޑުގެ އަދަދެއް ލިބޭނެ އެވެ. ލުކާކޫ ޗެލްސީގައި ހަދާފައިވާ އެއްބަސްވުމުގައިވާ ގޮތުން އޭނާ އަށް އަހަރަކު ލިބޭނީ 11 މިލިއަން ޕައުންޑުގެ މުސާރައެކެވެ. ބޮޑު މުސާރައާއެކު، އެއްބަސްވުމުގެ އެހެނިހެން ކަންތައްތަކުގައި މަޝްވަރާ ކުރުމަށް އަލް ހިލާލްގެ އިސްވެރިން ވަނީ މިދިޔަ ހަފްތާގައި ލުކާކޫއާ ބައްދަލުކޮށްފައި ކަމަށް މީޑިއާ ތަކުން ބުނެފައިވެ އެވެ. އެ ބައްދަލުވުން ކުރިއަށް ގެންދިޔައީ ފްރާންސްގެ ވެރި ރަށް ޕެރިހުގަ އެވެ.
ބޭރުގެ މީޑިއާ ތަކުގައި ބުނެފައިވާ ގޮތުން ލުކާކޫ މިހާރު ވަނީ އަލް ހިލާލްގެ ހުށަހެޅުން ޤަބޫލު ނުކުރަން ނިންމައިފަ އެވެ. އެކަން މިހާރު އޭނާގެ ފަރާތުން ވަނީ ރަސްމީކޮށް އެކުލަބަށް އަންގައިފަ އެވެ. އަލް ހިލާލް އިން ލުކާކޫ ހޯދުމަށް މަސައްކަތް ކޮށްފައިވާތީ އެކަމަށް އޭނާ ވަނީ ޝުކުރު އަދާ ވެސް ކޮށްފަ އެވެ. ނަމަވެސް މިއީ ޔޫރަޕުގެ ފުޓުބޯޅަ ދޫކޮށްލުމަށް އެންމެ އެކަށީގެންވާ ވަގުތު ކަމަށް ލޫކާކު ނުދެކެ އެވެ.
ލުކާކޫ އެންމެ ފަހުން ކުޅުނީ އިޓާލިއަން ލީގުގެ އިންޓަ މިލާނަށެވެ. ޗެލްސީގައި ހުރުމަށްފަހު ލޯނު އެއްބަސްވުމެއްގެ ދަށުން އެ ކުލަބަށް ކުޅުނީ އެއް އަހަރުގެ އެއްބަސްވުމެއްގެ ދަށުންނެވެ. އެހެންކަމުން ނިމުނު ސީޒަނާއެކު އެ އެއްބަސްވުން ހަމަވާނެ އެވެ. ނަމަވެސް އިންޓަ އިން ބޭނުންވަނީ ލުކާކޫ އެ ކުލަބުގައި ބެހެއްޓުމަށެވެ. އެހެންކަމުން އިންޓަ އިން އަންނަނީ ޗެލްސީއާއެކު އެކަމުގެ މަޝްވަރާތައް ކުރަމުންނެވެ. މިވަގުތު ލުކާކޫ ވެސް ބޭނުންވަނީ އިންޓައިގައި ހުރުމަށް ކަމަށް ދާދި ފަހުން އޭނާ ވަނީ ބުނެފަ އެވެ.
