ތައިލެންޑުގައި މިހާރު ކުރިއަށްދާ އޭޝިއަން ބީޗް ވޮލީބޯލް ޓުއާގައި ވާދަކުރާ ދިވެހި ރާއްޖޭގެ އާދަމް ނަސީމާއި ޝިއުނާޒް އަބްދުލް ވާހިދުގެ ޕެއާ ސައުދި އަރަބިއްޔާ ކުޅުންތެރިންގެ އަތުން މޮޅުވެއްޖެ އެވެ.

ސައުދީގެ އަހުމަދު އަލްދިރުވިޝް އާއި ހަސަން އަލް އަބްދުލް ބާޣީގެ ޕެއާއާ ވާދަކޮށް ރާއްޖޭގެ ދެ ކުޅުންތެރިން މި މެޗު ކާމިޔާބުކުރީ ދެ ސެޓް އެއް ސެޓުންނެވެ.

މި ކުޅުންތެރިންގެ އިތުރުން މި މުބާރާތުގައި ރާއްޖެއިން ވާދަކުރަނީ އަހުމަދު އަނިލް އާއި އަދުނާން އަބްދުލް ހަމީދެވެ. މި ދެކުޅުންތެރިން ކުޅުނު މެޗުން ލަންކާ އަތުން ވަނީ ސީދާ ދެ ސެޓުން ބަލިވެފަ އެވެ.

މެޗުގެ ސެޓުތައް ލަންކާއިން ކާމިޔާބުކުރީ 21-12 އަދި 21-12 އިންނެވެ.

ކޮންމެ އަހަރަކު ވެސް ތައިލެންޑްގެ ދެ ސަރަހައްދެއްގައި ކުރިއަށްދާ މި މުބާރާތް މިއަހަރު ކުރިއަށްދަނީ ސަޓުންއާ، ސޮންގްލާ ގައެވެ. އަދި މި މުބާރާތް ކުރިއަށްދާނީ މި މަހުގެ 18 ވަނަ ދުވަހުގެ ނިޔަލަށެވެ.