ޗައިނާ ލީގުގެ ހުށަހެޅުން ރިޖެކްޓްކޮށް ޕެޕޭ އިންޓައަށް ބަދަލުވަނީ

ޗައިނާ ލީގުގެ ހުށަހެޅުން ރިޖެކްޓްކޮށް، ރެއާލް މެޑްރިޑަށް ކުޅެމުން އަންނަ ޕޯޗުގަލްގެ ޑިފެންޑަރު ޕެޕޭ އިންޓަމިލާނަށް ބަދަލުވާން އުޅޭކަމަށް ރިޕޯޓްތައް ބުނެފި އެވެ.

ސްޕެއިންގެ މަޝްހޫރު ކުޅިވަރު ނޫހެއްކަމަށްވާ މާސާ އިން ބުނީ ޗައިނާ ލީގުން ޕެޕޭ އަށް ހުށަހެޅުމެއް ލިބިފައިވާ ކަމަށާއި، އެހެންނަމަވެސް އެ ހުށަހެޅުން ރިޖެކްޓްކޮށްލުމަށްފަހު، އޭނާ އިންޓައަށް ބަދަލުވާން ނިންމާފައިވާ ކަމަށެވެ.

މެންޗެސްޓާ ޔުނައިޓެޑް އަދި ޔުވަންޓަސް އިންވެސް ހޯދުމަށް ޝައުގުވެރިވާ އުމުރުން 34 އަހަރުގެ ޕެޕޭ މި ސީޒަނަށްފަހު އެޓީމް ދޫކޮށްލާނެކަމަށް ރިޕޯޓްތައް ބުނާއިރު، ޖެނުއަރީ ޓްރާންސްފާގައިވެސް ބައެއް ކްލަބްތަކުން އޭނާ ހޯދުމަށް މަސައްކަތްކުރަމުން އަންނަ ކަމަށްވެސް ރިޕޯޓްތައް ވަނީ ބުނެފައެވެ.

ޕޯޓޯ އިން 2007 ވަނަ އަހަރު ރެއާލް އަށް ބަދަލުވި ޕެޕޭ ވަނީ އެޓީމަށް މިހާތަނަށް ކުޅުނު 10 ސީޒަނުގައި 233 މެޗު ކުޅެދީ 15 ލަނޑު ކާމިޔާބުކޮށްފައެވެ. މީގެއިތުރުން އޭނާ ވަނީ އެޓީމާއެކު ޔުއެފާ ޗެމްޕިއަންސް ލިގު، ޔުއެފާ ސުޕާކަޕް، ފީފާ ކްލަބް ވޯލްޑްކަޕް، ސްޕެނިޝް ލަލީގާ، ކޮޕާޑެލްރޭ އަދި ސްޕެނިޝް ސުޕާ ކަޕް ކާމިޔާބުކޮށްފަ އެވެ.

މީގެއިތުރުން އޭނާ ވަނީ ޕޯޗުގަލް ޓީމާއެކު ނިމިގެންދިޔަ ޔޫރޯ ފުޓުބޯޅަ މުބާރާތުގައި ކުޅެ އެ މުބާރާތް އެޓީމާއެކު ކާމިޔާބުކޮށްފައެވެ. އެ މުބާރާތަކީ ޕޯޗުގަލް އިން އެޓީމުގެ ފުޓުބޯޅަ ތާރީހުގައި ކާމިޔާބުކުރި ފުރަތަމަ ބައިނަލްއަގުވާމީ ތައްޓެވެ.