ށ. މިލަންދޫގައި މިހާރު ކުރިއަށްގެންދާ އަމާންވެށި ޕްރޮގްރާމްގެ ތެރެއިން، މިލަންދޫ ސްކޫލްގެ 153 ދަރިވަރުންނާއެކު ކުރިއަށްގެންދިޔަ 100 ވަނަ ''ކޭންޕު ފުރާވަރު'' ނިންމާލައިފިއެވެ.

ހޮނިހިރު ދުވަހުގެރޭ ބޭއްވި މި ރަސްމިއްޔާތު ޝަރަފުވެރިކޮށްދެއްވީ މިނިސްޓަރ އޮފް ހަޔަރ އެޑިއުކޭޝަން ޑރ. އިބްރާހީމް ހަސަންއެވެ. މި ރަސްމިއްޔާތުގައި ކޮމިޝަނަރ އޮފް ޕޮލިސް މުޙައްމަދު ހަމީދާއި ޑެޕިއުޓީ ކޮމިޝނަަރ އޮފް ޕޮލިސް އަލީ ރަޝީދާއި ފުލުހުންގެ އެގްޒެކެޓިވް ބައެއް އޮފިސަރުންނާއި ކޮމިޝަންޑު އޮފިސަރުން އަދި މިލަންދޫ ސްކޫލުގެ ޕްރިންސިޕަލް އިބްރާހީމް އާދިލް ބައިވެރިވެވަޑައިގެންނެވިއެވެ.

މި ރަސްމިއްޔާތުގައި ފުރާވަރު ކޭންޕުގެ ބައިވެރިންނަށާއި މުދައްރިބުން އަދި ކާމިޔާބުކަމާއެކު ކޭންޕު ކުރިއަށް ގެންދިއުމުގައި އެކިގޮތްގޮތުން އެހީތެރިވެދެއްވި ފަރާތްތަކަށް ވަނީ ހަނދާނީލިޔުން ދީފައެވެ. އަދި ފުރާވަރު ކޭންޕުގެ ފުރަތަމަ ކޭންޕުން ފެށިގެން 100 ވަނަ ކޭންޕާ ހަމައަށް، ކްރައިމް ޕްރިވެންޝަން އެންޑް ޕަބްލިކް އެފެއާޒްގެ ހެޑް އަދި ޑެޕިއުޓީ ހެޑުންގެ ގޮތުގައި މަސައްކަތްކުރެއްވި ބޭފުޅުންނަށް ވެސް ވަނީ ހަނދާނީ ފިލާ ދީފައެވެ.

ފުރާވަރު ކޭންޕަކީ ދިވެހި ފުލުހުންގެ ޚިދުމަތުގެ ކްރައިމް ޕްރިވެންޝަން އެންޑް ޕަބްލިކް އެފެއާޒުން ކުރިއަށް ގެންދާ ކޭންޕެކެވެ.

ހޮނިހިރު ދުވަހުގެ ރޭ ބޭއްވި ހަފްލާގައި މިލަންދޫ ސްކޫލުގެ ފަރާތުން ދިވެހި ފުލުހުންގެ ޚިދުމަތަށް ވަނީ ހަނދާނީ ފިލާ ދީފައެވެ.

ޖޫން 15 އިން 17 އަށް ކުރިއަށް ގެންދިޔަ މި ކޭންޕުގެ ތެރެއިން، ދިރިއުޅުމުގެ ތަފާތު އެކި ކަންކަމަށް ދަރިވަރުން އަހުލުވެރި ކުރުވައި ދިރިއުޅުމުގެ މައިދާނަށް ނުކުމެ ދިރިއުޅުން އާރާސްތުކުރުމަށް ބޭނުންވާނެ ތަފާތު އެކި މައުލޫމާތު ދިނުމާއެކު ދަރިވަރުންގެ މެދުގައި ކުޅިވަރުގެ ތަފާތުއެކި ހަރަކާތްތައް ކުރިއަށް ގެންގޮސްފައިވެއެވެ. އަދި ދީނީ ކަންކަމަށް ސަމާލުކަންދީ ދީނީ އާދަކާދަތަކަށް އަހުލުވެރިކުރުވައި ދަރިވަރުންނާ ގުޅުންހުރި ގާނޫނުތަކާއި ގަވާއިދުތަކުގެ މައުލޫމާތު ހިއްސާކުރުމާއެކު އެ ގާނޫނުތަކާއި ގަވާއިދުތަކަށް ބޯލެނބުމަށް ދަރިވަރުންނަށް ވަނީ މި ކޭމްޕުގެ ތެރެއިން ދަސްކޮށްދީފައެވެ.

މި ކޭމްޕުގައި މަދަރުސީ ތައުލީމުގެ ތެރެއިން ދަރިވަރުންގެ ދިރިއުޅުން ބައްޓަންކުރުމަށް އިސްކަންދޭންވީ ކަންކަމުގެ މައުލޫމާތާއި ގަޑިން ގަޑިއަށް ކަންކަންކުރަން ދަސްކޮށްދީ އަމިއްލަ ސަލާމަތާއި ރައްކާތެރިކަމާއި ސާފުތާހިރުކަމަށް މަސައްކަތްކުރާނެގޮތް ވެސް ދަސްކޮށްދީފައިވެއެވެ.

މީގެ އިތުރުން، މައިންބަފައިންނާއި އެހެން މީހުންނަށް އިހުތިރާމްކުރުމުގެ ރިވެތި ސިފަ އަށަގެންނެވުމާއި އާންމު އިޖުތިމާއި މިންގަނޑާ ހިލާފު ކަންކަމުން ރައްކާތެރިވުމަށް މައުލޫމާތު ހިއްސާކޮށްފައިވާއިރު ކަންކަމުގައި އަމިއްލައަށް އިސްނަގައިގެން ހަރަކާތްތެރިވުމަށް ބާރުއެޅުމުގެ އިތުރުން ޒިންމާދާރު ބައެއްގެ ގޮތުގައި ދެމިތިބުމަށް ކުރަންޖެހޭ ކަންތައްތަކަށް އަހުލުވެރިކުރުވައި ތަފާތު އެކިކަހަލަ ކުށްތަކުން ރައްކާތެރިކުރުމަށް މައުލޫމާތުދިނުމާއެކު ކަންކަމުގައި އެހެން މީހުންނާ ގުޅިގެން މަސައްކަތްކުރުމަށް ބާރުއަޅައި ތަފާތު އެކި ހުނަރުތައް ވެސް ވަނީ ދަސްކޮށްދީފައެވެ.