އައްޑޫގެ 100 އެނދުގެ ހޮސްޕިޓަލް އަންނަ އަހަރު ހުޅުވޭނެބާ؟
އައްޑޫ ސިޓީ ހޮސްޕީޓަލްގެ މަސައްކަތް ވަރަށް ބާރަށް ކުރިއަށްދާ ކަމަށް ހެލްތު މިނިސްޓަރު ވިދާޅުވި
އައްޑޫ ސިޓީގެ ހިތަދޫގައި ހުންނަ އިކްއަޓޯރިއަލް ކޮންވެންޝަން ސެންޓަރު (އީސީސީ)
އައްޑޫ ސިޓީގައި ގާއިމްކުރުމަށް ނިންމާފައިވާ 100 އެނދުގެ ޓާޝަރީ ހޮސްޕިޓަލް އައްޑޫ ސިޓީގެ ހިތަދޫގައި ހަދާފައިވާ އިކުއިޓޯރިއަލް ކޮންވެންޝަން ސެންޓަރުގައި ހެދުމަށް ނިންމައިފައިވާކަން ސަރުކާރުން އިއުލާން ކުރީ ފެބްރުއަރީ 22، 2016 ވަނަ އަހަރުއެވެ.
ސަރުކާރުން މިގޮތަށް ނިންމާފައިވާ ކަން ހާމަކުރީ ކޮންވެންޝަން ސެންޓަރާ ގުޅޭގޮތުން އައްޑޫ މީދޫ ދާއިރާގެ މެންބަރު ރޮޒައިނާ އާދަމް މަޖިލީހުގެ ޖަލްސާއެއްގައި ހައުސިން މިނިސްޓަރު ޑރ. މުހައްމަދު މުއިއްޒަށް ކުރެއްވި ސުވާލަކަށް ޖަވާބު ދެއްވަމުންނެވެ.
މިނިސްޓަރު ވިދާޅުވީ ކޮންވެންޝަން ސެންޓަރުގައި 100 އެނދުގެ ހޮސްޕިޓަލް ހެދިދާނެ ކަމަށް ރައީސް އަބްދުﷲ ޔާމީނަށް ކަމުގެ ތަޖުރިބާކާރުން ފަންނީ ލަފާ ދެއްވާފައިވާތީ އެ ހޮސްޕިޓަލް އެތަނުގެ ހެދުމަށް ރައީސް ނިންމަވާފައިވާ ކަމަށެވެ. އަދި އެމަސައްކަތް ހެލްތު މިނިސްޓްރީއާ ހަވާލުކޮށްފައި ވާތީ މިނިސްޓްރީގައި އެކަމަށް ހާއްސަ ޔުނިޓެއް ގާއިމްކޮށްގެން އެމަސައްކަތް ކުރަމުންދާ ކަމަށް މިނިސްޓަރު ވަނީ ވިދާޅުވި އެވެ.
މުއިއްޒު ވިދާޅުވެފައި ވަނީ ކޮންވެންޝަން ސެންޓަރުގައި ހޮސްޕިޓަލް ހަދާއިރު ހޮސްޕިޓަލްގެ ބޭނުމަށް އެސަރަހައްދުގެ ބިން ބޭނުން ކުރާނެ ކަމަށާއި އަދި އިތުރު އިމާރާތެއް ވެސް ހޮސްޕިޓަލްގެ ބޭނުމަށް އެތަނުގައި ހަދާނެ ކަމަށެވެ. އަދި ހޮސްޕިޓަލް ނިމޭއިރު އެތަނުގައި ބައެއް ރެކްރިއޭޝަން ހަރަކާތްތައް ކުރިއަށް ގެންދެވޭނެ އިންތިޒާމް ހަމަޖެހިފައި ހުންނާނެ ކަމުގައި ވެސް ވިދާޅުވި އެވެ.
އައްޑޫގެ 100 އެނދުގެ ހޮސްޕިޓަލް އެޅުމަށް ބޭރުން ލިބެން ބޭނުންވާ 20 މިލިއަން ޑޮލަރު ސައުދީ ފަންޑާއި އޯޕެކް ފަންޑުން ހަމަޖެހިފައިވާ ކަމަށް ސަރުކާރުން ބުނެފައިވެ އެވެ. ސައުދީ ފަންޑުން 12 މިލިއަން ޑޮލަރު ލިބިފައިވާއިރު ބާކީ ބައި ހަމަޖެހިފައިވަނީ ކުވެއިތު ފަންޑުން ކަމަށާއި އެއީ ގާތްގަނޑަކަށް ދެ ޕަސަންޓްގެ އިންޓްރެސްޓް ރޭޓުގައި ލިބުނު ލޯނު އެހީއެއް ކަމުގައި ވެސް ސަރުކާރުން ބުނެފައިވެ އެވެ.
އައްޑޫ ހޮސްޕިޓަލްގެ މަސައްކަތް ކުރިއަށްދާ ގޮތާ ބެހޭ ގޮތުން ދާދި ފަހުން ބޭއްވި ނޫސްވެރިންގެ ބައްދަލުވުމެއްގައި ހެލްތު މިނިސްޓަރު އަބްދުﷲ ނާޒިމް ވިދާޅުވެފައި ވަނީ އައްޑޫ ހޮސްޕިޓަލްގެ މަސައްކަތް ވަރަށް ބާރަށް ކުރިއަށްދާ ކަމަށާއި އެ މަސައްކަތް ހައުސިން މިނިސްޓްރީން ހަވާލު ކޮށްފައިވާ އެލިއެއާ ކޮންސްޓްރަކްޝަން އިން ވަރަށް ބާރަށް ކުރިއަށް ގެންދާ ކަމަށެވެ.
މިނިސްޓަރު އެހެން ވިދާޅުވި ނަމަވެސް މިހާތަނަށް ނިމިފައިވާ މަސައްކަތުގެ އެއްވެސް ތަފްސީލެއް ދެއްވާފައެއް ނުވެއެވެ.
އެލިޔާ އިން ވަރަށް ބާރަށް މަސައްކަތް ކުރިއަށް ގެންދާ ކަމަށް މިނިސްޓަރު ނާޒިމް ވިދާޅުވިޔަސް އައްޑޫ ސިޓީގެ މޭޔަރު އަބްދުﷲ ސޯދިގް (ސޯބެ) ވިދާޅުވީ ހޮސްޕިޓަލްގެ މަސައްކަތެއް ކުރަމުންދާކަން ކޮންވެންޝަން ސެންޓަރު ހުރި ސަރަހައްދުން މިހާތަނަށް ފެންނަން ނެތް ކަމަށާއި ނަމަވެސް އެ ސަރަހައްދުގައި ހައުސިން މިނިސްޓްރީގެ ބޭނުމަށް ތަނެއް ހަދަމުންދާ ކަމަށެވެ. ނަމަވެސް އެނގިފައިވާ ގޮތުގައި އެއީ ހޮސްޕިޓަލާ ގުޅުން ހުރި ތަނެއް ނޫނެވެ.
ސޯބެ ވިދާޅުވީ ކޮންވެންޝަން ސެންޓަރުގެ އެތެރެ މުޅިން ރޫޅާލާފައިވާ ކަމަގެ މައުލޫމާތު ލިބިފައިވާ ކަމަށާއި ހަވާލުކުރިތާ ނުވަ މަސް ވެގެން ދިޔައިރު ކޮންވެންޝަން ސެންޓަރު ހޮސްޕިޓަލަކަށް ބަދަލު ކުރުމުގެ އެއްވެސް މަސައްކަތެއް ކުރިއަދާކަން ކައުންސިލަށް އެނގިފައި ނުވާ ކަމަށެވެ.
ސޯބެ ވިދާޅުވީ ހޮސްޕިޓަލްގެ މަސައްކަތްތައް ކުރިއަށްދާ ގޮތުގެ އެއްވެސް މައުލޫމާތެއް ސަރުކާރުގެ އެއްވެސް އިދާރާއަކުން ކައުންސިލާ ހިއްސާކޮށްފައި ނުވާ ކަމަށެވެ.
އައްޑޫ ސިޓީގައި ސަރުކާރުން އެޅުމަށް އިއުލާންކޮށްފައިވާ 100 އެނދުގެ ހޮސްޕިޓަލްގެ މަސައްކަތްތައް ކުރުމަށް ރާއްޖޭގައި އެންމެ ދުވަސްވީ އަމިއްލަ ކުންފުނި، އެލިއާ ކޮންސްޓްރަކްޝަނާ ހަވާލު ކޮށްފައި ވަނީ 2016 ވަނަ އަހަރުގެ ނޮވެންބަރު މަހުގެ 14 ވަނަ ދުވަހުއެވެ. މި މަސައްކަތް 18 މަސްދުވަހުގެ ތެރޭގައި ނިންމުމަށް ޝަރުތުކޮށް އެލިއާއާ ހަވާލުކުރީ 161.8 މިލިއަން ރުފިޔާއަށެވެ. އެއްބަސްވުމުގައިވާ ގޮތަށް މަސައްކަތްތައް ނިންމާލުމަށް ފަހު މެއި 8، 2018ގައި އިމާރާތް ސަރުކާރާ ހަވާލުކުރަން ޖެހޭނެއެވެ.
މިއަހަރުގެ ރިޔާސީ ބަޔާން ދެއްވަމުން ރައީސް އަބްދުﷲ ޔާމީން ވިދާޅުވެފައި ވަނީ އައްޑޫ ސިޓީގެ ކޮންވެންޝަން ސެންޓަރުގައި ހެދުމަށް ނިންމާފައިވާ 100 އެނދުގެ ހޮސްޕިޓަލް ނިންމައި އަންނަ އަހަރުގެ ތެރޭގައި އެތަން ހުޅުވާނެ ކަމަށެވެ.
