މިޔަހެލީގެ 2 ވަނަ ސޯޝަލް އިނޮވޭޝަން ކޭމްޕް ބާއްވަން ނިންމައިފި
މިދިޔަ އަހަރުގެ ޖޫން މަހު ވެސް މިޔަހެލީގެ ކޭމްޕެއް ވަނީ ބާއްވާފަ
މިޔަހެލިގެ ސޯޝަލް އިނޮވޭޝަން ކޭމްޕް 2016
ޔޫ.އެން.ޑީ.ޕީ އިން އިސްނަގައިގެން ޒުވާނުންނަށް ޚާއްސަކޮށްގެން ބާއްވާ "މިޔަހެލި"ގެ ދެވަނަ ސޯޝަލް އިނޮވޭޝަން ބޫޓް ކޭމްޕް ބޭއްވުމަށް ނިންމައިފިއެވެ.
މި ކޭމްޕް ބޭއްވުމަށް ހަމަޖެހިފައިވަނީ ހދ. ކުޅުދުއްފުށީގައި އޮގަސްޓް މަހުގެ 18 އިން 19 އަކަށެވެ.
މި ކޭމްޕުގެ އެންމެ ބޮޑު އެއް ބޭނުމަކީ ރާއްޖޭގެ އާބާދީގެ ބޮޑުބައެއް ހިއްސާކުރަނީ ޒުވާނުންކަމަށްވެފައި، ޒުވާނުން ބާރުވެރިކޮށް، އެކިކަހަލަ މައްސަލަތަކުގައި ޒުވާނުންގެ ހިޔާލު ހޯދުންކަމަށާއި ނިންމުންތައް ނިންމާއިރު ޒުވާނުންގެ އަޑު މުޖްތަމައުއާއި ހަމައަށް ފޯރުކޮށްދިނުން ފަހިކޮށްދިނުމަށްކަމަށް ޔޫއެންޑީޕީން ބުނެއެވެ.
މި ކޭމްޕް ފަރުމާކޮށްފައިވަނީ ވަކި ވަކި މުޖުތަމަޢުތަކުގައި ހުރި މައްސަލަތައް ދެނެގަނެ އެކަންކަން ހައްލުކުރުމަށް ކުރެވިދާނެ މަސައްކަތްތަކުގެ މައްޗަށް ބިނާކޮށް، އަމިއްލަ ޕްލޭންތަކެއް އެކުލަވާލުމުގެ ފުރުސަތު ބައިވެރިންނަށް ލިއްބައިދިނުމަށާއި އަދި ބައިވެރިން ހުށައަޅާ ޕްލޭންތަކެއްގެ ތެރެއިން ހޮވާލެވޭ ވަކި ވަކި ހިޔާލުތަކަކަށް ޓީމެއް އެކުލަވާލުމަށް ކަމަށްވެސް ޔޫއެންޑީޕީ އިން ބުންޏެވެ.
ޔޫއެންޑީޕީން އިތުރަށް ބުނި ގޮތުގައި ވަކި ވަކި ހިޔާލުތައް ހުށަހެޅުމަށް ފުރުސަތު ހުޅުވާލައިފައި ވަނީ ހަމައެކަނި ހ، ށ. އަދި ނ. އަތޮޅުގެ ޒުވާނުންނަށް ކަމަށާއި ހިޔާލުތައް ބަލައިގަންނާނީ ޖޫން މަހުގެ 22 އިން ޖުލައި މަހުގެ 29 އާ ހަމައަށެވެ. އަދި ކޭމްޕްގައި ބައިވެރިވުމުގެ ފުރުސަތު މުޅި ރާއްޖެއަށް ހުޅުވާލާނީ ޖުލައި 16 އިން ޖުލައި 29 އަށެވެ.
ޔޫއެންޑީޕީން ވަނީ މިދިޔަ އަހަރުގެ ޖޫން މަހު ވެސް މިޔަހެލީގެ ކޭމްޕެއް ބާއްވާފައެވެ. މި ކޭމްޕަށް ވަނީ ޒުވާނުންގެ ވަރަށް ބޮޑު ތަރުހީބެއް ވެސް ލިބިފައެވެ
