400 މީޓަރު ދުވުމުގެ ޖޫނިއާ ރެކޯޑް ޒިވާ މުގުރާލައިފި
ޒިވާ ރޭސް ނިންމާފައިވަނީ 58.86 ސިކުންތުން
ޒިވާ މޫސާ ޝަފީއު
400 މީޓަރު ދުވުމުގެ ގައުމީ ޖޫނިއާ ރެކޯޑް ޒިވާ މޫސާ ޝަފީއު މުގުރާލައިފިއެވެ.
ޒިވާ މި ރެކޯޑު މުގުރާލާފައިވަނީ ބުރާސްފަތި ދުވަހު އިންޑިއާގެ ބުބަނޭޝްވަރުގައި ފެށި 62 ވަނަ ނޭޝަނަލް އިންޓަ ސްޓޭޓް ސީނިއާ އެތުލެޓިކްސް ޗެމްޕިއަންޝިޕް މުބާރާތުގައެވެ. އިވެންޓުގެ ހަތަރު ވަނަ ހީޓުގައި ޒިވާއަށް ލިބުނީ ހަތް ވަނައެވެ. ނަމަވެސް 58.86 ސިކުންތުން ރޭސް ނިންމާ، ޒިވާ ވަނީ ގައުމީ ޖޫނިއާ ރެކޯޑް މުގުރާލާފައެވެ.
މީގެ ކުރިން 400 މީޓަރުގެ ޖޫނިއާ ރެކޯޑް ހަދާފައިވަނީ އައިޝަތު ހިމްނާ ހަސަންއެވެ. 2019 ވަނަ އަހަރުގެ އޭޝިއަން ޔޫތު ޗެމަޕިއަންޝިޕުގައި ހިމްނާ ވަނީ 59.18 ސިކުންތުން ރޭސް ނިންމާފައެވެ.
ޒިވާގެ އިތުރުން ހުސައިން ރިޒާ އާއި ހަސަން ސާއިދު ވަނީ މިއަދު ވާދަކޮށްފައެވެ. ސާއިދު ވަނީ 10.70 ސިކުންތުން 100 މީޓަރު ނިންމާ، ހީޓުގެ ތިން ވަނަ ހޯދާފައެވެ. އަދި 800 މީޓަރު ދުވުމުގެ ތިން ވަނަ ހީޓުގައި ހުސައިން ރިޒާ ވަނީ 1 މިނެޓު 55.77 ސިކުންތުން ރޭސް ނިންމާފައެވެ.
އިންޑިއާގައި ކުރިޔަށްދާ މި މުބާރާތުގައި ރާއްޖެއިން ވާދަކުރަނީ ސާއިދު، ހުސައިން ރިޒާ، ޒިވާ، އަހުމަދު ނަޖުދާން އަބްދުﷲ އަދި ހުސެއިން ފަޒީލް ހާރޫންއެވެ.
