ރެޑްބުލް އިން އިންތިޒާމްކޮށްގެން ކޮންމެ އަހަރަކުވެސް ބާއްވަމުން އަންނަ ނޭމާ ޖޫނިއާސް ފައިވްގެ ޗެމްޕިއަންކަން ހޯދައި ކުލަބު ޓީނޭޖް ބުރެޒިލަށް ދިއުމުގެ ފުރުސަތު ހޯދައިފިއެވެ.

ރާއްޖޭގެ ޗެމްޕިއަންކަން ޓީނޭޖުން ހޯދީ ހޮނިހިރު ދުވަހު ހަވީރު ކުޅުނު ފައިނަލްގައި ކުލަބު ޕީކޭއާ ބައްދަލުކޮށް 2-0 ގެ ނަތީޖާއަކުން މެޗު ކާމިޔާބުކޮށްގެންނެވެ.

ޓީނޭޖުގައި ހިމެނޭ ކުޅުންތެރިން ވަނީ މީގެ ކުރިން ވެސް މި މުބާރާތުގެ ޗެމްޕިއަންކަން ހޯދައި ގައުމުން ބޭރަށް ދަތުރުކޮށްފައެވެ. އޭރު މި މުބާރާތް ހިންގަނީ ރެޑްބުލް ވިނިންގ ފައިވްގެ ނަމުގައެވެ.

ކްލަބު ޓީނޭޖުގައި ހިމެނޭ ކުޅުންތެރިންނަކީ އިސްމާއިލް ފާތިހް، ޔޫސުފް އުމަރު (ޔޫޗު) އާއި މުހައްމަދު ރިއްފަތު (ރިއްޕެ) އާއި އަހްމަދު އަޔާޒް(އަޔާ) އާއި ރިހާމް އަބްދުލް ޣަނީ (ބޮބީ)ގެ އިތުރުން ހުސެން ޝަރީފް (އޮންލީ) އަދި އިބްރާހިމް މުބީން (މުއްކި) އެވެ. މުއްކި އާއި ބޮބީ އަކީ ކްލަބު އީގަލްސްއަށް ކުޅެމުން އަންނަ ދެ ކުޅުންތެރިންނެވެ.

ނޭމާ ފައިވް މިއަހަރުގެ މުބާރާތުގައި ރާއްޖޭގެ ހަ ސަރަހައްދެއްގައި ޖުމްލަ ނުވަ ކޮލިފައިން ބުރެއް ބާއްވާފައިވެއެވެ. އެއީ ގދ.ތިނަދޫ، ހއ. ހޯރަފުށި، ގއ.ވިލިނގިލި، ސ.ގަން، ޏ.ފުވައްމުލަކުގެ އިތުރުން މާލޭގައި ތިން ގުރޫޕެކެވެ. ހުރިހާ ކޮލިފައިންއެއްގެ ޓީމު ތަކުގައި ކުޅެވުނު ނޭޝަނަލް ފައިނަލްސް އިއްޔެ ކުޅެފައިވަނީ މާލޭ ގައެވެ.

މުބާރާތުގައި 267 ޓީމަކުން ބައިވެރިވެފައިވާއިރު، މިމުބާރާތުގައި 1368 ކުޅުންތެރިން ކުޅެފައިވެއެވެ.

ކުލަބު ޓީނޭޖުން ބުރެޒިލަށް ފުރުމަށް ހަމަޖެހިފައިވަނީ ޖުލައި މަހުގެ ދެވަނަ ދުވަހުގައެވެ. ޓީމުގެ ހުރިހާ ހަރަދެއްވެސް ދިނުމަށް ހަމަޖެހިފައިވަނީ ރެޑްބުލްއިންނެވެ.

ނޭމާ ޖޫނިއާސް ފައިވްގެ ވޯލްޑް ޗެމްޕިއަންޝިޕް ބުރެޒިލްގައި ފެށޭނީ ޖުލައި މަހުގެ 17 ވަނަ ދުވަހުއެވެ.