ވަރަށް ބާރުގަދަ ޓްރޮޕިކަލް ތޫފާނެއް ކަމަށްވާ "ބިޕާޖޯއީ" ބުރާސްފަތި ދުވަހު އިންޑިޔާއަށާއި ޕާކިސްތާނަށް އަރާނެ ކަމަށް ފޯކާސްޓް ކޮށްފައިވާތީ މިސަރަހައްދުތައް އެލާޓަށް ގެނެސް ޚާއްސަ ފިޔަވަޅުތައް އަޅަން ފަށައިފިއެވެ.

ތޫފާނު އަރާނެ ކަމަށް ބެލެވެނީ ބުރާސްފަތިދުވަހު މެންދުރު ފަހު ނުވަތަ ހަވީރުގެ ވަގުތުއެވެ. އެރޭބިއަން ކަނޑުން އުފެދިގެން އައި ތޫފާންގެ އަސަރު އިންޑިޔާ އިން އެންމެ ބޮޑަށް ކުރާނެ ކަމަށް ބެލެވެނީ ހުޅަނގުފަޅީގެ ސްޓޭޓް ގުޖުރާތަށެވެ. އަދި ޕާކިސްތާނުން ތޫފާނުގެ އަސަރު އެންމެ ބޮޑަށް ކުރާނީ ސިންދު ޕްރޮވިންސްއަށާއި ކަރާޗީގެ ބައެއް ހިސާބުތަކަށެވެ.

ފަސްދޮޅަސް މިލިއަން މީހުންގެ އާބާދީ އެއް އޮންނަ ގުޖްރާތަށް މިހާރުވެސް ބޯކޮށް ވާރޭވެހި އައްސޭރި ފަށުގެ ހިސާބުތަކަށް ބޮޑެތި ރާޅުތައް އަންނަނީ ބިންދަމުންނެވެ. މިއާއެކު މިސަރަހައްދު ތަކުގައި ދިރިއުޅެމުން އައި 38ހާސް މީހުން ވަނީ ރައްކާތެރި ހިސާބުތަކަށް ގެންދަން ފަށާފައެވެ.

ތޫފާން ބިޕާޖޯއީގެ ސަބަބުން އިންޑިޔާގެ ވައިގެ ދަތުރުތަކަށާއި ރޭލް ދަތުރުތަކަށް ވެސް ވަނީ ވަރަށް ބޮޑަށް ހުރަސް އެޅިފައެވެ. މިގޮތުން 15 ޖޫން އާ ހަމަޔަށް ގުޖުރާތުން ފުރާ އަދި އަންނަ ހުރިހާ ރޭލު ދަތުރު ވަނީ ކެންސަލްކޮށްފައެވެ. އަދި ބައެއް މަތިންދާބޯޓު ވެސް ނުޖެއްސިގެން ތަފާތު ތަންތަނަށް ޑައިވަރޓް ކޮށްފައިވާ ކަމަށް ޚަބަރުތައް ބުނެއެވެ. ވައިގަދަވުމާއި ކަނޑު ގަދަވުމުގެ އިތުރުން ރާޅުއެރުމާއި ބިންގަނޑު ކަނޑައިގެން ދިއުމުގެ ހާދިސާތައް ހިނގާނެ ކަމަށް ދަނީ ބެލެމުންނެވެ. ތޫފާންގެ އަސަރު އެންމެ ބޮޑަށް ކުރުމުގެ ކުރިން ހުރިހާ ފަރާތްތަކަކުން ވެސް އަންނަނީ ތައްޔާރީ ފިޔަވަޅުތައް އަޅަމުންނެވެ. އަދި މަސްވެރިން މަހަށް ނުފުރުމަށާއި ކަނޑުމަތީ ތިބި މީހުން ވެސް އަވަހަށް ބަނދަރު ކުރުމަށް ދަނީ އަންގަމުންނެވެ.

ތޫފާން ބިޕާޖޯއީއާ ގުޅިގެން އިންޑިއަން މީޓިއޮރޮލޮޖިކަލް ޑިޕާޓްމަންޓުން ވަނީ ޖޫން މަހުގެ 14 ވަނަ ދުވަހަށް އޮރެންޖް އެލާޓް އަދި ޖޫން މަހުގެ 15 ވަނަ ދުވަހު ގުޖުރާތުގެ ހުރިހާ ޑިސްޓްރިކްޓަކަށް ރެޑް އެލާޓް ނެރެފައެވެ.

ބުރާސްފަތި ދުވަހުގެ ރޭގެ ދަންވަރުގެ ޚަބަރުތައް ބުނާގޮތުން ބިޕާޖޯއީގެ ބާރު ވަނީ ކޮންމެވެސް ވަރަކަށް ދަށްވެފައެވެ. ނަމަވެސް އަލުން ބާރުގަދަވުމުގެ ފުރުސަތު އެބައޮތް ކަމަށް ޚަބަރުތައް ބުނެއެވެ.

ފޯކާސްޓްތައް ކުރިން ބުނަމުން އައި ގޮތުން ތޫފާނުގެ ވައި ޖޫން 15 ވަނަ ދުވަހުގެ ހަވީރުވާއިރު ގަޑިއަކު 125 ކިލޯމީޓަރާ 135 ކިލޯމީޓަރާ ދެމެދުގެ ވަރަކަށް ގަދަވާނެއެވެ. އަދި އެންމެ ބާރުވެގެން ދާއިރު ގަޑިއަކު 150 ކިލޯމީޓަރަށް ވެސް ގަދަވެގެން ދާނެއެވެ. ތޫފާނުގެ ސަބަބުން އައްސޭރި ފަށުގައިވާ ބަލި ގެތައް މުޅިން ހަލާކުވެ ދަނޑުބިންތަކުގައި ފެންބޮޑުވެ މޭވާފަދަ އެއްޗެތި ހައްދާފައިވާ ދަނޑުތައް ވެސް މުޅިން ސުންނާފަތި ވާނެ ކަމަށް ދަނީ ބެލެމުންނެވެ.

ހާލުގައި ޖެހޭ ފަރާތްތަކަށް އެހީވުމަށް އާމީ، ނޭވީ އަދި ދައުލަތުގެ ރިލީފް އޭޖެންސީތަކުގެ ޓީމުތަކުން ވަނީ ނުކުމެފައެވެ.

ޕާކިސްތާނުން އަދިވެސް ވަނީ މިދިޔަ އަހަރު ފަހުކޮޅު ކުރިމަތިވި ފެންބޮޑިވުމުގެ ހާދިސާއިން އަރައި ނުގަނެވިއެވެ. އެހާދިސާގައި 1700 މީހުން މަރުވެފައިވެއެވެ.