ނިއުރޭޑިއަންޓް ސްޕޯޓްސް ކްލަބް ސަސްޕެންޑް ކުރެވޭނެކަމަށް ގަބޫލުނުކުރާ ކަމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ޕްލޭޔާ ސްޓޭޓަސް ކޮމެޓީގެ ޗެއާމަން އިސްމާއިލް ލަތީފް ވިދާޅުވެއްޖެއެވެ.

ރާއްޖެއެމްވީއަށް މައުލޫމާތު ދެއްވަމުން އިސްމާއިލް ލަތީފް ވިދާޅުވީ، ކްލަބެއް ސަސްޕެންޑުކުރުމަކީ އޭނާ ދެކޭ ގޮތުގައި އެންމެ ފަހު މަރުހަލާ ކަމަށާއި، ނަމަވެސް ފިޔަވަޅެއްގެ ގޮތުގައި އެންމެ ފުރަތަމަވެސް ނިއު ކުރީ ސަސްޕެންޑު ކަމަށެވެ.

އިސްމާއިލް ލަތީފް ވިދާޅުވީ، ނިއުގެ ކުޅުންތެރިންނަށް މުސާރަ ނުދީ އޮތް މައްސަލައިގައި ބުރާސްފަތި ދުވަހު ޕްލޭޔާ ސްޓޭޓަސް ކޮމިޓީން ސިޓީއެއް ފޮނުވާފައިވާނެ ކަމަށާއި، އެ ސިޓީގައި ނިއުއަށް ފިޔަވަޅު އަޅައިދިނުމަށް އެދިފައިނުވާނެ ކަމަށެވެ.

ނިއުގެ މައްސަލައިގައި ޕްލޭޔާ ސްޓޭޓަސް ކޮމިޓީން އެ ކްލަބަށް ފޮނުވި ސިޓީގެ ޖަވާބެއް ގޮތުގައި ވަރަށް ޒިންމާދާރުކަން ކުޑަ ސިޓީއެއް ފޮނުވި ނަމަވެސް، އެ ކްލަބް ހާޒިރުކުރުމުން ކުޅުންތެރިންނަށް މުސާރަ ދޭން ކަނޑައަޅާފައިވާ އުސޫލް މި ހަފްތާ ތެރޭގައި ހިއްސާކުރަން އެއްބަސްވި ކަމަށް އިސްމާއިލް ލަތީފް ވިދާޅުވިއެވެ.

ނަމަވެސް އިސްމާއިލް ލަތީފް ވިދާޅުވީ، ކުއްލިއަކަށް ސަސްޕެންޑުކުރުމުން ހައިރާންވެފައި ހުރި ކަމަށާއި، ޕްލޭޔާ ސްޓޭޓަސް ކޮމިޓީން އަބަދުވެސް ބަލަނީ އެއްވެސް ފިޔަވަޅެއް ނާޅާ ވާހަކަ ދައްކައިގެން ކަންކަން ހައްލުކުރުމަށް ކަމަށެވެ.

އެގޮތުން އިސްމާއިލް ލަތީފް ވިދާޅުވީ، ފާއިތުވެދިޔަ ދުވަސްތަކުގައިވެސް ކުޅުންތެރިންނަށް ދިމާވާ އެކިއެކި މައްސަލަ ފިޔަވަޅެއް ނާޅާ ހައްލުކޮށްފައިވާނެ ކަމަށެވެ.

އެފްއޭއެމުން ނިއު ސަސްޕެންޑުކުރީ މިދިޔަ އަހަރުގެ އޯގަސްޓް މަހުން ފެށިގެން ހަމައަށް އެ ކްލަބުގެ ކުޅުންތެރިންނަށް ދޭންޖެހޭ 3.8 މިލިއަން ރުފިޔާއަށްވާ މުސާރަ އާއި އުޖޫރަ ދީފައިނުވާ ކަމަށް ބުނެއެވެ.

އެގޮތުން އެ އިދާރާ އިން ބުނީ، އެފްއޭއެމްގެ ހިންގާ ގަވައިދުގެ 14 ވަނަ މާއްދާ އިން އެފްއޭއެމްގެ ހިންގާ ކޮމިޓީއަށް ލިބިދޭ ބާރުތަކުގެ ތެރެއިން ނިއު އިން މުސާރައިގެ މައްސަލަ ހައްލުކޮށް، އެ ކްލަބުން ދައްކަންހުރި ހުރިހާ ފައިސާ އާއި އުޖޫރަ ދައްކާ ހަލާސްކުރުމާ ހަމަޔަށް އެފްއޭއެމްއިން ހިންގާ ހުރިހާ ކަންކަމުން ސަސްޕެންޑުކުރެވިފައިވާ ކަމަށެވެ.

އެފްއޭއެމުން ކުއްލި ގޮތަކަށް ނިއު ސަސްޕެންޑުކުރުމާއެކު، ގިނަ ބައެއްގެ ފާޑުކިޔުން އެ އިދާރާއަށް އަންނަނީ އަމާޒުވަމުންނެވެ. އަދި އެފްއޭއެމްގެ ރައީސް ބައްސާމް އިސްތިއުފާ ދެއްވުމަށްވެސް ގިނަ ބަޔަކު ދަނީ ގޮވާލަމުންނެވެ.