ވިމެންސް ފުޓްސަލް ޗެލެންޖް: ސިފައިން އަދި ސްޓެލްކޯއަށް މޮޅެއް

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމުކޮށްގެން ކުރިއަށް ގެންދާ ފުރަތަމަ ވިމެންސް ފުޓްސަލް މުބާރާތުގައި ދިވެހި ސިފައިންގެ ކްލަބް އަދި ސްޓެލްކޯ ރެކްރިއޭޝަނުން މޮޅެއް ހޯދައިފި އެވެ.

މި މަހުގެ 9 އިން 20 އަށް، ޖުމްލަ 9 ޓީމާއިއެކު ފަށާފައިވާ މި މުބާރާތަކީ، އަންހެން ބޭފުޅުންނަށް އަމާޒުކޮށްގެމް އެފްއޭއެމްއިން ބާއްވާ ފުރަތަމަ ފުޓްސަލް މުބާރާތެވެ.

މުބާރާތުގައި އަންގާރަ ދުވަހުގެ ރޭ ކުޅުނު މެޗުން ސިފައިން މޮޅުވީ މޯލްޑިވްސް ޕޯޓްސް ލިމިޓެޑާ ވާދަކޮށް 0-1 ގެ ނަތީޖާއަކުންނެވެ. މެޗުގައި ފެނިގެންދިޔަ ހަމައެކަނި ލަނޑު ކާމިޔާބުކޮށްދިނީ އާމިނަތު ފަސްލާ އެވެ. މެޗުގެ މޮޅު ކުޅުންތެރިޔަކަށް ހޮވުނީ ސިފައިންގެ ސާއިގާ ހުސެއިން އެވެ.

އަންގާރަ ދުވަހުގެ ރޭ ކުޅުނު ދެވަނަ މެޗު ސްޓެލްކޯ އިން ކާމިޔާބުކުރީ އެމްއެންޔޫއާ ވާދަކޮށް 0-16 ގެ ތަފާތުބޮޑު ނަތީޖާއަކުންނެވެ. މެޗުގައި ސްޓެލްކޯގެ ފާތިމަތު ތީބާ 10 ލަނޑު ޖަހާފައިވާއިރު، އާއިދާ އަބްދުﷲ ހަކީމް ވަނީ ހެޓްރިކް ފުރިހަމަކޮށްފައެވެ. މީގެއިތުރުން އަރީޝާ ރިޒާ ދެ ލަނޑު ކާމިޔާބުކޮށްފައިވާއިރު، މެޗުގައި އެމްއެންޔޫގެ ސަމްހަތް ހަސަން ފާއިޒް އަތުން ވަނީ ބައިކޮޅަށް ލަނޑެއް ވަދެފައެވެ. މެޗުގެ މޮޅު ކުޅުންތެރިޔަކަށް ހޮވުނީ ފާތިމަތު ތީބާއެވެ.

ދެ ގުރޫޕަކަށް ބަހާލައިގެން ކުރިއަށް ގެންދާ މި މުބާރާތުގެ ގުރޫޕު 1 ގައި 5 ޓީމު ވާދަކުރާއިރު ގުރޫޕް 2 ގައި 4 ޓީމު ވާދަކުރެއެވެ. ގުރޫޕް 1 ގައި ހިމެނެނީ ދިވެހި ސިފައިންގެ ކުލަބާއި، އެމްޕީއެލް އާއި، ޕޮލިސް ކުލަބުގެ އިތުރުން، ސްޓެލްކޯ ރެކްރިއޭޝަން ކްލަބް އަދި އެމްއެންޔޫ އެސްސީ އެވެ. ގުރޫޕް 2 ގައި ހިމެނެނީ ޒެނިތް ސްޕޯޓްސް ކުލަބާއި، އިކުއަޓޯރިއަލް އާއި، ޓީރެކްސް ސްޕޯޓްސް އެކަޑަމީ އަދި އަވާ އެފްޓީއެވެ.

ވިމެންސް ފުޓްސަލް ކުރިއެރުވުމަށް ހާއްސަ އިސްކަމެއް ދީގެން އެފްއޭއެމުން ކުރިއަށްގެންދާ މި މުބާރާތުގައި، ގައުމީ އަންހެން ފުޓުބޯޅަ ޓީމަށް ނިސްބަތްވާ އެއްވެސް ކުޅުންތެރިއަކަށް ނުކުޅެވޭނެއެވެ. މީގެ އިތުރުން ބިދޭސީ އެއްވެސް ކުޅުންތެރިއަކަށްވެސް މި މުބާރާތުގައި ނުކުޅެވޭނެއެވެ.