ބައިނަލްއަޤްވާމީ މުބާރާތަކަށް އަމާޒުހިފައި ގައުމީ ފުޓްސަލް ޓީމެއް އެކުލަވާލަން، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފިއެވެ.

މުޅިން އަލަށް އެކުލަވާލާ ގައުމީ ފުޓްސަލް ޓީމު ހިމެނުމަށްޓަކައި، ހޯމަ އަދި އަންގާރަ ދުވަހު ޓްރައިލް ބޭއްވުމަށް އެއިދާރާއިން ވަނީ ނިންމާފައެވެ. އެގޮތުން އެއިދާރާއިން ބުނެފައިވަނީ، ޖޫން މަހުގެ 12، 13 ދެދުވަހުގެ ރޭ 10:30 ގައި އެއް ނަމްބަރު ޓާފް ދަނޑުގައި ޓްރައަލް ބޭއްވުމަށް ހަމަޖެހިފައިވާ ކަމަށާއިމ އެހެންކަމުން ގައުމީ ފުޓްސަލް ޓީމުގައި ހިމެނުމަށް ޝައުގުވެރިވާ ހުރިހާ ކުޅުންތެރިން ޓްރައިލްގައި ބާއިވެރިވުމަށް އެދޭކަމަށެވެ.

އެފްއޭއެމްއިން ވަނީ، މިއަހަރުގެ ސެޕްޓެމްބަރުމަހު ތުރުކުމުނިސްތާނުގައި އޮންނަ 5 ވަނަ އޭޝިއަން އިންޑޯ ގޭމްސްގައި ބައިވެރިވުމަށް ނިންމާފައެވެ. މީގެ އިތުރުންވެސް އެފްއޭއެމްއިން އަންނަނީ ފުޓުބޯޅަ އާއި ފުޓްސަލް ވަކިކުރާކަހަލަ ވިސްނުމެއް ގެންގުޅެމުންނެވެ. އަދި ފުޓްސަލް ކުރިއެރުވުމަށްޓަކާވެސް އެފްއޭމްއިން އަންނަނީ މަސައްކަތްތަކެއް ކުރަމުންނެވެ. އެ މަސައްކަތްތަކުގެ ތެރެއިން އެއިދާރާއިން ވަނީ ރިސޯޓުތަކަށް ހުޅުވާލައިގެން ރިސޯޓް ފުޓްސަލް ލީގެއް ބޭއްވުމަށްވެސް އިއުލާން ކޮށްފައެވެ. މީގެ އިތުރުން، ފުޓްސަލް ލީގެއް ތައާރަފް ކުރުމަށްވެސް އެއިދާރާއިން އަންނަނީ މަސައްކަތް ކުރަމުންނެވެ.