ކްލަބު މޯލްޑިވްސް އިން އިންތިޒާމްކޮށްގެން ކުރިއަށްގެންދިޔަ 30/18 ވުމަންސް ފުޓްސަލް ފިއެސްޓާގެ ޗެމްޕިއަންކަން ޓީމް ފެނަކައިން ހޯދައިފިއެވެ.
މާފަންނު ސްޓޭޑިއަމްގެ ވެލި ދަނޑުގައި ކުޅުނު ފައިނަލް މެޗު ކާމިޔާބުކޮށް ފެނަކައިން ޗެމްޕިއަންކަން ހޯދީ ދިވެހި ސިފައިންގެ ކްލަބާ ވާދަކޮށް 11 ލަނޑު 2 ލަނޑުގެ ތަފާތު ބޮޑު ނަތީޖާއަކުން މެޗު ކާމިޔާބުކޮށްގެންނެވެ.
ގަދަ އަވީގައި ކުޅުނު މި މެޗުގެ ފުރަތަމަ ހާފުގައި ދެޓީމުގެ ފަރާތުންވެސް ލަސް ކުޅުމެއް ފެނިގެންދިޔައިރު، މި ހާފުގައި ފުރަތަމަ ލަނޑެއްޖަހާ ލީޑު ނެގީ ފެނަކަ ޓީމުންނެވެ. އެހެން ނަމަވެސް އޭގެ ކުޑަ ވަގުތު ކޮޅެއް ފަހުން ޑީއެސްސީން ވަނީ ލަނޑެއްޖަހާ ނަތީޖާ ހަމަހަމަކޮށްފައެވެ.
ފުރަތަމަ ހާފުގެ ކުޅުން ނިމިގެންދިޔައީ 2-3 ގެ ނަތީޖާއިން ފެނަކަ ކުރީގައި އޮވެގެންނެވެ.
މެޗުގެ ދެވަނަ ހާފު ފެށިގެން ވެސް ބޯޅަ ކޮންޓްރޯލް ކޮށްގެން މޮޅަށް ކުޅުނު ފެނަކައިންނެވެ. އެގޮތުން އެޓީމުން ދިޔައީ ގާތް ގާތުގައި ލަނޑުޖަހައި ނަތީޖާގެ ފަރަގު ބޮޑު ކުރަމުންނެވެ. އެއާއެކު ފެނަކައިން ވަނީ ފަހު ހާފުގައި ޑީއެސްސީ ކޮޅަށް 8 ލަނޑު ޖަހާފައެވެ.
ފައިނަލް މެޗަށްފަހު ވަނަވަނައަށް ހޮވުނު ކުޅުންތެރިންނަށާއި ޗެމްޕިއަން ޓީމަށް ތައްޓާއި މެޑަލް އަދި ސެޓްފިކެޓް ހަވާލުކޮށްދެއްވީ ޝަރަފްވެރި މެހެމާން، ނެސްލޭ މައިލޯގެ ސީނިއާ މެނޭޖަރު ދިޝާން ވިޖެޔަ ވަރުދަނާ އާއި ޑިފެންސް މިނިސްޓަރު އާދަމް ޝަރީފް އަދި ކްލަބު މޯލްޑިވްސްގެ އިސްވެރިންނެވެ.
ފައިނަލް މެޗުގެ ކުއީން އޮފް ދަ މެޗަކަށް ހޮވުނީ ޓީމް ފެނަކައިގެ މިސް ސަސީޗާ ޕޮތިވޮންގެވެ. އަދި މުބާރާތުގެ ފެއާ ޕްލޭ ކުޅުންތެރިއަކަށް ދިވެހި ސިފައިންގެ ކްލަބުގެ އައިމިނަތު ޒާހިޔާ (ޒެޑޭ) ހޮވުނު އިރު، މުބާރާތުގެ ފެއާ ޓީމަކަށް ހޮވުނީ ޕޮލިސް ކްލަބެވެ.
މި މުބާރާތުގެ އެންމެ އުންމީދީ ކުޅުންތެރިއަކަށް ސްޓެލްކޯ ރެކްރިއޭޝަން ކްލަބު ފާތިމަތު ތީބާ ހޮވުނު އިރު، އެންމެ ގިނަ ލަނޑުޖެހި ކުޅުންތެރިއަކަށް ހޮވުނީ ޖުމްލަ 27 ލަނޑުޖެހި ޓީމް ފެނަކައިގެ މިސް ސަސީޗާ ޕޮތިވޮންގެވެ. އަދި މުބާރާތުގެ އެންމެ މޮޅު ކޯޗަކަށް ހޮވުނީ ޓީމް ފެނަކައިގެ އަހުމަދު ނިސާމް (ފޮޓޯ) އެވެ.
މި މުބާރާތުގެ އެންމެ މޮޅު އަންހެން 5 ކުޅުންތެރިންނަށް ހޮވުނީ ޓީމް ފެނަކައިގެ މިސް ސަސީޗާ ޕޮތިވޮންގާއި މިސް ޖެންޖީރާ ބޫޕާ އާއި ޝަހުލާ ތައުފީގް (ތުއްތުނާ) ގެ އިތުރުން ދިވެހި ސިފައިންގެ ކްލަބުގެ މަރިޔަމް ރިފާ (މަރިލީން) އަދި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ސަބްރީތާ ބަންދާރީ އެވެ.
މި މުބާރާތުގެ ހުރިހާ ގޮތަކުން އެންމެ މޮޅު ކުޅުންތެރިއަކަށް ހޮވުނީ ޓީމް ފެނަކައިގެ މިސް ޖެންޖީރާ ބޫޕާ އެވެ.
