މަޖިލީހުގެ ރިޔާސަތު ބަލަހައްޓަވަން އުޒުރުވެރިވެވަޑައިގަންނަވާކަމަށް ވިދާޅުވެ ނަޝީދުގެ ސިޓީފުޅެއް މަޖިލީހަށް
07 ޖޫންގައި ހުށަހަޅާފައިވާ އެމަނިކުފާނުގެ އިތުބާރު ނެތްކަމުގެ މައްސަލަ ކުރިއަށް ދާނެ ކަމަށް މަޖިލީހުން ކުރިން ބުނެފައިވޭ
ރައްޔިތުންގެ މަޖިލީހުގެ ޖަލްސާ
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރުނެތްކަމަށް 54 މެންބަރަކު ސޮއިކުރައްވާ ހުށަހަޅުއްވާފައިވާ މައްސަލައާ ގުޅިގެން ރިޔާސަތު ބަލަހައްޓަވަން އުޒުރުވެރިވެވަޑައިގަންނަވާ ކަމަށް އެމަނިކުފާނު މަޖިލީހަށް އަންގަވައިފި އެވެ.
މަޖިލީހުގެ ރިޔާސަތު ބަލަހައްޓަވަން އުޒުރުވެރިވެވަޑައިގަންނަވާކަމަށް ވިދާޅުވެ އެމަނިކުފާނު މަޖިލީހުގެ އިދާރާ އަށް ސިޓީފުޅެއް ފޮނުއްވިކަން އެ އިދާރާއިން ވަނީ ރާއްޖެ އެމްވީ އަށް ކަށަވަރުކޮށްދީފައެވެ. އަދި ނަޝީދު ފޮނުއްވާފައިވާ ސިޓީފުޅު މީސްމީޑިއާގައި ވަނީ ދައުރުވާން ފަށާފައެވެ.
މަޖިލީހުގެ އަމީންއާއްމަށް އެޑްރެސްކުރައްވާ ފޮނުއްވާފައިވާ އެ ސިޓީފުޅުގައި ނަޝީދު ވިދާޅުވީ 07 ޖޫންގައި ހުށަހަޅާފައިވާ އެމަނިކުފާނުގެ އިތުބާރު ނެތްކަމުގެ މައްސަލައާ މެދު ގޮތެއް ނިމެންދެން ރިޔާސަތު ބެލެހެއްޓެވުމުން އެއްކިބާވެވަޑައިގަންނަވާ ކަމަށެވެ. ނަމަވެސް މަޖިލީހުގެ ގަވާއިދު ބަޔާންކުރައްވާ މިންވަރަށް މަޖިލީހުގެ އެންމެހާ ކަންކަން ހިންގުމުގައި ދެމި ހުންނަވާނެ ކަމަށް ވަނީ ވިދާޅުވެފައެެވެ. އަދި އެމަނިކުފާނުގެ އިތުބާރު ނެތްކަމުގެ މައްސަލަ އަށް ހުރަސް އެޅޭ އެއްވެސް ކަމެއް ނުކުރައްވާނެކަމުގެ ޔަޤީންކަން ދެއްވާކަމަށް ވެސް އެ ސިޓީފުޅުގައި ރައީސް ނަޝީދު ވިދާޅުވެފައިވެއެވެ.
ނަޝީދުގެ އިތުބާރު ނެތްކަމަށް ބުނެ ހުށަހެޅުއްވި ޤަރާރުގައި 54 މެންބަރުން ސޮއި ކުރައްވާފައިވާއިރު، އޭގެ ތެރޭގައި ހިމެނެނީ އެމްޑީޕީގެ 50 މެންބަރުންނާއި އިތުރު 4 މެންބަރަކެވެ. އެމަނިކުފާނު ވަކިކުރުމަށް ހުށަހެޅި ޤަރާރުގައި ބަޔާންކޮށްފައިވަނީ ރައްޔިތުންގެ މަޖިލީހުގެ ރައީސަކީ ވަކި ފަރާތަކަށް ޖެހުމެއް ނެތި ޤާނޫނުއަސާސީއާއި ރައްޔިތުންގެ މަޖިލީހުގެ ޤަވާއިދާއި ރައްޔިތުންގެ މަޖިލީހުގެ ނިންމުންތަކާ އެެއްގޮތްވާ ގޮތުގެ މަތިން ޖަލްސާތަކާއި ކޮމިޓީތަކުގެ ކަންކަން ހިންގަވަން ޖެހޭ ފަރާތް ނަމަވެސް، ކަން ހިނގަމުންދަނީ އެގޮތަށް ނޫން ކަމަށެވެ.
