ކ. މާލެ
|
27 ޖޫން 2017 | އަންގާރަ 04:00
ރަސްމީ ބައްދަލުކުރެއްވުމަށްފަހު މޯދީ އާއި ޓްރަމްޕް މީޑިއާ އާއި ބައްދަލުކުރެއްވުމަށް ވައިޓްހައުސްގެ ރޯސް ގާޑަނަށް ވަޑައިގަންނަވަނީ
ރަސްމީ ބައްދަލުކުރެއްވުމަށްފަހު މޯދީ އާއި ޓްރަމްޕް މީޑިއާ އާއި ބައްދަލުކުރެއްވުމަށް ވައިޓްހައުސްގެ ރޯސް ގާޑަނަށް ވަޑައިގަންނަވަނީ
ރޮއިޓަރސް
މޯދީ އެމެރިކާގައި
މޯދީ އެމެރިކާގައި: ޓެރަރިޒަމާއި ހަނގުރާމަ ކުރުމަށް މައުލޫމާތު ބަދަލުކުރުމަށް އެއްބަސްވެއްޖެ
 
ޓްރަމްޕްގެ ވެރިކަމުގައި އިންޑިއާ-އެމެރިކާ ގުޅުން ވަނީ ހީނަރުވެފަ
 
ޓްރަމްޕް ވަނީ ޓެރަރިޒަމަކީ އިސްލާމް ދީނަށް ނިސްބަތްވާ އެއްޗެއްގެ ގޮތުގައި ސިފަކުރައްވާފަ
 
މިއީ މޯދީ އެމެރިކާއަށް ކުރައްވާ ފުރަތަމަ ދަތުރުފުޅު

އިންޑިއާގެ ބޮޑުވަޒީރު، ނަރެންދްރަ މޯދީ މިހާރު އެމެރިކާއަށް ކުރައްވަމުން ގެންދަވާ ދަތުރުފުޅުގައި، ޓެރަރިޒަމާއި ހަނގުރާމަ ކުރުމަށް، އެމެރިކާ އާއި އިންޑިއާއާއި ދެމެދު ޖާސޫސީ މައުލޫމާތު ބަދަލުކުރުމަށް އެއްބަސްވެއްޖެއެވެ.

އެމެރިކާގެ ރައީސް ޑޮނާލްޑް ޓްރަންޕާއިއެކު، ވައިޓްހައުސްގައި ބޭއްވެވި ރަސްމީ ބައްދަލުކުރެއްވުމަށްފަހު، ވައިޓްހައުސްގެ ރޯސް ގާޑަންގައި ނޫސްވެރިންނާއި ބައްދަލުކުރައްވާ މޯދީ ވިދާޅުވީ، އެމެރިކާއަކީ އިންޑިއާއަށް މުހިއްމު ބައިވެރިއެއް ކަމަށާ، މޯދީގެ މި ދަތުރުފުޅާއި އެކު، ދެ ޤައުމުގެ ގުޅުން އިތުރަށް ބަދަހިވެގެން ގޮސްފައިވާ ކަމަށެވެ.

ދެ ޤައުމުގެ ދެމެދުގައި އެއްބާރުލުން ދިނުމަށް އެއްބަސްވެވުނު ގިނަ ކަންތައްތަކެއްގެ ވާހަކަ މޯދީ އާއި ޓްރަމްޕް ފާހަގަކުރައްވާފައި ވީނަމަވެސް މި ކަންތައްތަކުގެ ތަފްޞީލެއް އެ ބޭފުޅުން ނުދެއްވައެވެ.

މޯދީ އާއި ޓްރަމްޕްގެ ވާހަކަފުޅުގައި، އެއްބަސްވެވުނު ކަންކަމުގެ ގޮތުގައި ފާހަގަކުރެއްވި ކަންތައްތަކުގެ ތެރޭގައި، އިޤުތިޞާދީ ގޮތުން ބާރުވެރިވުމަށް ދެޤައުމުން އެކުގައި މަސައްކަތް ކުރުމާއި، އުމްރާނީ ތަރައްޤީއަށް އެކުގައި މަސައްކަތް ކުރުމުގެ އިތުރުން ކޮރަޕްޝަނާއި ދެކޮޅަށް ގުޅިގެން މަސައްކަތްކުރުން ހިމެނެއެވެ.

އަދި ހަމަ މިއާއިއެކު، ދެ ބޭފުޅުންގެ ބައްދަލުކުރެއްވުމުގައި އެންމެ މުހިއްމު ކަމެއްގެ ގޮތުގައި މަޝްވަރާ ކުރެއްވީ، ޓެރަރިޒަމާއި ހަނގުރާމަ ކުރުން ކަމަށް އެ ބޭފުޅުން ވިދާޅުވިއެވެ. އެގޮތުން، އެ އަމާޒަށް ވާސިލްވުމަށް، އެމެރިކާ އާއި އިންޑިއާއާއި ދެމެދު ޖާސޫސީ މައުލޫމާތު ބަދަލުކުރުމަށް އެއްބަސްވެވުނުކަމަށް އެބޭފުޅުން ވިދާޅުވިއެވެ.

މި މޭރުމުން ވާހަކަފުޅު ދައްކަވަމުން، ރައީސް ޓްރަމްޕް ވަނީ ޓެރަރިޒަމަކީ އިސްލާމް ދީނަށް ނިސްބަތްވާ އެއްޗެއްގެ ގޮތުގައި ދޭހަވާގޮތަށް ވާހަކަފުޅުދައްކަވާފައެވެ.

"އިންޑިއާ އާއި އެމެރިކާ ގުޅިގެން ހަރުކަށި އިސްލާމީ ޓެރަރިޒަމް ނައްތާލާނަން" ޓްރަމްޕް ވިދާޅުވިއެވެ.

މި ކަންކަމުގެ އިތުރުން، ޓެކްނޮލޮޖީއާއި އީޖާދީ ދާއިރާތަކާއި، ތަޢުލީމީ ދާއިރާގެ އިތުރުން، ވަޒީފާގެ ފުރުޞަތުތައް އިތުރުކުރުމަށް އެކުގައި މަސައްކަތް ކުރުމަށްވެސް ދެ ލީޑަރުން ވަނީ އެއްބަސްވެވަޑައިގެންފައެވެ.

މޯދީގެ މި ދަތުރުފުޅަކީ، މިދިޔަ ޖަނަވަރީ މަހު، އެމެރިކާގެ ރައީސް ކަމާއި ޓްރަމްޕް ހަވާލުވެވަޑައިގަތުމާއި ގުޅިގެން، އެމަނިކުފާނަށް މަރުޙަބާ ދެންނެވުމަށް ޓްރަމްޕަށް މޯދީ ފޯނު ކުރެއްވުމުން، ޓްރަމްޕް ދެއްވި ދައުވަތަކާއި ގުޅިގެން ކުރައްވާ ދަތުރުފުޅެކެވެ.

އެ ފޯންކޯލްގައި ޓްރަމްޕް ވަނީ، ދުނިޔޭގެ މައްސަލަތައް ޙައްލުކުރުމުގައި އިންޑިއާ އަކީ ހަޤީޤީ ރަޙުމަތްތެރިއެއް ކަމަށާ، ބައިވެރިއެއް ކަމަށް އެމެރިކާއިން ދެކޭ ކަމަށް ވިދާޅުވެފައެވެ.

ރައީސް ބަރަކް އޮބާމާގެ ވެރިކަމުގެ އެމެރިކާ އާއި އިންޑިއާގެ ގުޅުން ބަދަހިވެ، ދެ ޤައުމުގެ ވިޔަފާރީގެ ގުޅުންތައް ކުރިއަރައިގެން ގޮސްފައިވާއިރު، ޓްރަމްޕް ސަރުކާރުގެ ފުރަތަމަ 5 މަސްތެރޭގައި އެ ގުޅުމަށް ވަނީ ބޮޑެތި ބުރޫތަކެއް އަރާފައެވެ.

އެގޮތުން އެމެރިކާގައި މަސައްކަތްކުރާ އިންޑިއާގެ އެތައް ހާސް ސޮފްޓްވެއާ އިންޖިނޭރުންގެ ވަރކް ވިސާ އާއި މެދު ދެވަނަ ވިސްނުމަކަށް ދާން އެމެރިކާއިން ނިންމި މައްސަލައިގައި އިންޑިއާއިން ވަނީ ކަންބޮޑުވުން ފާޅުކޮށްފައެވެ. އަނެއްކޮޅުން، އިންޑިއާގައި ހަރަކާތެރިވާ ވިޔަފާރިތަކުން އެ ޤައުމުގެ ސަރުކާރަށް ނަގާ އެކި ފީތައް ބޮޑުކޮށް، އުސޫލުތައް ބަދަލުކުރުމުގެ ސަބަބުން އިންޑިއާގައި ހަރަކާތެރިވާ އެމެރިކާގެ ކުންފުނިތަކަށްވެސް ވަނީ އިންޑާގައި ވިޔަފާރި ކުރުމަށް ދަތިތަކާއި ކުރިމަތިލާން ޖެހިފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ޝާން އަނީސް
0%
0%
0%
0%
0%
0%
ކޮމެންޓް