މިސްރުގެ ވެރިކަންކުރާ ގާހިރާގެ ހަލަބޮލިކަމާ ދުރުގައި އޮތް ގުރްސާޔާއޭ ކިއުނު ރަށަށް ދިއުމަށްޓަކައި، ބޯޓެއްގައި ހިތްގައިމު ދަތުރެއް ކުރަން ޖެހެއެވެ. މި ރަށަކީ، އިރެއްގައި ދާއިމީ ވަޒީފާއަކަށް ނުގޮސް އަތްނބެއްގެ ގޮތުގައި ގޭގައި އިނެއްކަމަކު، މިހާރު ބޮޑު ކައްކާއަކަށް ބަދަލުވެފައިވާ، ލާމަސީލު ކަނބަލަކު ދިރިއުޅޭ ރަށެކެވެ. އޭނާގެ ގެއަށް ޒިޔާރަތްކުރާ ކޮންމެ މީހަކަށް ރަހަ މީރު ކެއުންތައް ތައްޔާރު ކޮށްދެއެވެ.
"ޝޫކާ މިގްދާފް"އަކީ މިސްރުގައި ކުރިއަށްގެންދާ 'ވެރީނައިލް' އިނިޝިއޭޓިވްގެ ދަށުން، މުޅި މުޖުތަމައަށް ފައިދާވާ ގޮތަށް ހިންގާ، ތިމާވެއްޓާ ރައްޓެހި ކާގެއެކެވެ. ވެރިއެއްގެ ގޮތުގައި ހުރީ، ގުރްސާޔާ ރަށުގައި "އުންމު ނަދާ"ގެ ނަމުން މަޝްހޫރު، ރަޝާ މަހްމޫދެވެ.
މި މަސައްކަތް ފަށައިގަނެގެން އައި ދުވަސްވަރު، ހައެއް ނޫނީ 7 މަހެއްހާ ދުވަސް އަހަރެން ހޭދަކުރީ ރަށުން ބޭރު ބަދިގެއެއްގަ. ކޮންމެ ދުވަހަކު 12 ގަޑިއިރަށް ގެއިން ބޭރުގަ އުޅުމަކީ ކުރެވޭ ވަރަށްވުރެ މާ ވަރުބަލި ކަމަކަށް ވާންފެށި. ރަށުތެރެއާ ރަށުން ބޭރުގެ ދަތުރުތަކާ، ދަރިން އަހަންނަށް ބޭނުންވާއިރު 12 ގަޑިއިރު ވަންދެން ބޭރުގަ އުޅުމާ، އަހަރެންގެ ގެއާ ފިރިމީހާއާ ދުރުގަ އުޅެން ޖެހުނީ. އެހެންވެ އަސްލު އަމިއްލަ ގޭގަ ކައްކައިގެން މީހުންނަށް އެ ފޯރުކޮށްދޭނެ ޚިޔާލު އައީ. އެންމެ ފުރަތަމަ، ދުވާލެއްގެ އެއް އިރުގެ ކެއުން ތައްޔާރުކޮށްފަ، ރަށުތެރޭގަ އުޅޭ މީހުންނަށް ވިއްކަން ފެށީ. ދެން ޔޫޓިއުބް ޗެނަލެއް ހަދާނީއޭ ހިތާ، އެކަންވެސް ކުރީ. ކެއްކުމާބެހޭ ވީޑިއޯތައްވެސް އަޕްލޯޑް ކުރިން. އެކަމަކު، ވެރީނައިލްއާއެކީ މަސައްކަތް ފެށި ހިސާބުން، އެ މަސައްކަތް ހުއްޓާލައިފިން.ރަޝާ މަހްމޫދު؛ ޝޫކާ މިގްދާފްގެ ޝެފް
މި މަޝްރޫޢު އުފެދިގެން އައީ، އޭނާ ތައްޔާރުކުރާ ކާބޯތަކެތި، ބާޒަރަށް ނެރެ ވިއްކުމުގެ މަސައްކަތް ކުރުމަށް ރަޝާ ދެކެމުން ދިޔަ ހުވަފެންތަކުގެ ތެރެއިންނެވެ. އަމާޒަކަށް ވީ ގުރްސާޔާގައި މަސައްކަތްކުރާ ވެރީނައިލްގެ މުވައްޒަފުންގެ ތެރެއިން، ކާބޯތަކެތި ހޯދަން ދަތިވާ މީހުންނަށް، އޭނާގެ އަމިއްލަ ގޭގައި ކައްކައިގެން ކެއިންބުއިމުގެ ޚިދުމަތް ދިނުމެވެ.
ކޯރު ހުރަސްކޮށް ކާބޯތަކެތި އުފުލުމުގަ ހުރި ދަތިތަކާ ހެދި، އަހަރެމެން މި ރަށުގަ ކައި އުޅުނީ ވަރަށް އެހެން ކަހަލަ އެއްޗިހި. ކާން އިންނަ އެތި ތެރޭ ހިލަ ކޮޅުކޮޅު ހުއްޓާވެސް ފެނިދާނެ. އެހެންވެ ހިތަށްއެރީ އަހަރެމެންގެ ތެރެއިން އެކަހަލަ ކަމެއް ކުރުން ކިހިނެއް ވާނެބާއޭ. ދެން ރަށުތެރެއިން އެކި މީހުންނާ އިންޓަރވިއުކުރީ. ދެން މި ދިމާވަނީ އުންމު ނަދާގެ ނަމުން މަޝްހޫރުވެފަ އިން އަންހެނަކާ. އޭނަ އަހަރެމެން ގާތު ބުނި، ތިމަންނައަށް ވަރަށް ރަނގަޅަށް ކައްކަން އެނގެއޭ. އޭނަގެ ކެއްކުމުގެ ރަހަ އަހަރެމެން ތަޖުރިބާކުރަންވެސް އެދުނު. އޭނަ ތައްޔާރުކޮށްފަ ހުރި ކޭންތަކުގެ ފޮޓޯތައްވެސް އަހަރަމެންނަށް ދެއްކި. އެކަމަކު، ރަށުން ބޭރު ބާޒާރަކަށް ނުދެވޭނޭ ބުނީ. އުއްމު ނަދާ އެންމެ ފުރަތަމަ އައީ އިންޓަރވިއުއަށް. ދެން އަހަރެމެން ފަހުން އޭނައަށް ގުޅައިގެން ގެނައީ، އޭނަގެ ހުރި ވަރެއް ބަލާލަން. ދެން އޭނަ އަހަރެމެންނަށް ކައްކައިދޭން ފަށައިފި. އެ ކެއުންތައް އަހަރެމެންނަށް ވަރަށް މީރު. އެހެންވެ، ވަކި ނިޒާމެއްގެ ތެރެއިން އުއްމު ނަދާއާ އެކީ މަސައްކަތް ފެށުނީ.ސަލްމާ އައްލަކާނީ؛ ވެރީނައިލްގެ ހެޑް އޮފް ކޮމިއުނިޓީ ޑިވެލޮޕްމަންޓް
ވެރީނައިލްއަކީ، ކުނި ރީސައިކަލް ކުރުމާއި ދެމެހެއްޓެނިވި އާދަކާދައިގެ ތެރެއިން ނީލަ ކޯރު ސާފުކޮށް ބޭއްވުމަށް މިސްރުގައި ހިންގާ، ތިމާވެއްޓާ ރައްޓެހި ހަރަކާތެކެވެ.
ރަޝާގެ ގޭގައި ހުންނަ ކުޑަކުޑަ ބަދިގޭގައި ކާބޯތަކެތި ތައްޔާރުކުރުމުގެ މަސައްކަތުގައި އަތްގާތްކޮށްދިނުމުގެ ގޮތުންވެސް ގިނަ އަދަދެއްގެ އަންހެނުން ބައިވެރިވެއެވެ. ކާބޯތަކެތި އަޅާފައިވާ ދޮލަނގުތައް ބޮލަށް ލައިގެން 800 އެއްހާ މީޓަރުގެ ސަރަހައްދެއްގައި ކޮޅުކޮޅު މައްޗަށް ހިނގައިލުމަކީ އެމީހުންނަށް ފެންފަދަ ކަމެކެވެ.
މާ ބަރުކޮށް ކާބޯތަކެތި އުފުލަން ޖެހޭތީ، އަހަރެން އެ ޝަކުވާ ކުރަން ފެށިން. ގެއިން ފެށިގެން ވެރީނައިލްގެ މަރުކަޒާ ހިސާބަށް ދާން މިޖެހެނީ ވަރަށް ބަރުކޮށް. އެމީހުން ހިތަށް އެރީ އެކޮޅުގަ، އަހަރެމެންނަށް ބަދިގެއެއް ހިންގައިދޭން. ވަޒީފާގެ އިތުރު ފުރުސަތުތައްވެސް އޮންނާނެތާ ދޯ އޭރުން. އަހަންނަށްވެސް، ކޮންމެސް ވަރަކަށް އަރާމުވެސް ކޮށްލެވޭނެއެއްނު. އަދި ބަދިގެ ތެރޭގެ ތަޖުރިބާތައްވެސް މީހުންނަށް ކޮށްލެވޭނެ. ރަށުތެރެއާ ރަށުން ބޭރަށްވެސް ކާބޯތަކެތި ޑެލިވަރކޮށްދެވޭނެ. ރެސްޓޯރަންޓެއް ގޮތަށް، އޯޑަރު ދީގެން ކާބޯތަކެތި ތައްޔާރުކޮށްދެވޭނެ. މެންދުރުގެ ކޭމަކަށް ވިއަސް، ރޭގަނޑުގެ ކޭމަކަށް ވިއަސް ރެސްޓޯރަންޓުން ލިބެން ހުންނާނެތާ!ރަޝާ މަހްމޫދު؛ ޝޫކާ މިގްދާފްގެ ޝެފް
ރަޝާއަކީ 5 ދަރިންގެ މަންމައެކެވެ. ހަޔާތުގެ ބައިވެރިޔާއަކީ ގާހިރާގައި ހިންގާ ރެސްޓޯރަންޓެއްގެ ކައްކާއެކެވެ. ރަޝާއަކީ ގުރްސާޔާގެ ތަރައްގީގެ މުހިންމު ހިއްސާދާރެކެވެ. އަންހެންވެރިންނަށް ވަޒީފާގެ ފުރުސަތުތައް ހޯދައިދެއެވެ. އެމީހުންނަށް އުޖޫރަ ދެނީ މަސައްކަތުގައި އުޅޭ ގަޑިއިރަށް ބަލައިގެންނެވެ.
ބޮޑު އިވެންޓެއް އޮތް ދުވަހެއްގަ، ރޯދަމަހުގެ ދުވަހެއްގަ އަހަރެމެން ދިޔައީ އުންމު ނަދާގެ ބަދިގެއަށް. އޭނައަށް އެހީވާން، އަންހެންވެރިންގެ ބޮޑު ޓީމެއް އޮއްވާ ފެނުނީ. އަހަންނަށް އަންދާޒާވެސް ކޮށްލެވިފަ ނެތްހާ ބޮޑު ގުރޫޕެއް އެއީ. އަހަރެމެންގެ ހަބަށް އަންނަ މީހުންނަށްވުރެ މާ ގިނަ. އަހަރެމެން ހީކުރި ވަރަށްވުރެ، އުންމު ނަދާގެ މަސައްކަތުގެ އަސަރު، އޭގެ ޒާތުގަ މާ ބޮޑުކަން އެނގި، ވަރަށް އުފާވި. އެހެންވެ އަސްލުގަ މި މަޝްރޫއު އިތުރަށް ފުޅާކޮށް، ހަމައެކަނި އަހަރެމެންނަށް ކައްކައިދިނުމުގެ ބަދަލުގަ، ތަފާތުކޮށްލާފަ، ރެސްޓޯރަންޓް އުސޫލުން ބަދިގެއެއް ހަދަން ނިންމީ.ސަލްމާ އައްލަކާނީ؛ ވެރީނައިލްގެ ހެޑް އޮފް ކޮމިއުނިޓީ ޑިވެލޮޕްމަންޓް
ވެރީނައިލްގެ މައި މަރުކަޒުގައި ހުންނަ "ޝޫކާ މިގްދާފް"ގެ ބަދިގެ އިމާރާތްކޮށް މަރާމާތު ކުރުމުގެ މަސައްކަތް މިވަގުތު ކުރިއަށްދާއިރު، މި އަހަރުގެ އޯގަސްޓް މަހުގެ ތެރޭގައި، އޭގެ އެންމެ ފުރިހަމަ ގޮތުގައި ބަދިގެ ބޭނުންކުރަން ވަނީ ތާވަލުކޮށްފައެވެ.
ގުރްސާޔާއަކީ ގާތްގަނޑަކަށް 1500 އެއްހާ މީހުންގެ އާބާދީއެއް އޮންނަ ރަށެކެވެ. ރަށުގައި ގިނައީ މަސްވެރިންނާއި ދަނޑުވެރިންނެވެ. އެ މީހުންގެ އާއިލާތަކުގެ ޖީލުތައް، ގުރްސާޔާގައި ދިރިއުޅޭތާ ގަރުނެއްވެއްޖެއެވެ. ގުރްސާޔާއަކީ ރަށްފުށުގެ ގޮތްގަނޑު ހުންނަ، އުމްރާނީ ބިނާވެށީގެ މާ ބޮޑު މުއްސަނދިކަމެއް ނެތް، ޒަމާނީ ޚިދުމަތްތައް ތަދު ރަށެކެވެ.
