އެމެެރިކާގެ އެކި ކަންކޮޅުތަކުގައި ބަޑި ފަދަ ހަތިޔާރު ވިއްކުމާ ދެކޮޅަށް ކުރިއަށް ގެންދާ ހިނގާލުން "މާޗް ފޯ އަވަރ ލައިވްސް"ގައި ހޮލީވުޑްގެ ގިނަ ތަރިންތަކެއް ބައިވެރިވެއްޖެއެވެ.
ވޮޝިންގޓަން ޑީސީ، ލޮސް އެންޖެލެސް އަދި ނިއު ޔޯކް ފަދަ ބޮޑެތި ސިޓީތަކުގައި ކުރިއަށް ގެންދާ މި ހިނގާލުންތައް އިންތިޒާމް ކުރަމުންދަނީ އެމެރިކާގެ ސްކޫލްތަކުގެ ދަރިވަރުންނެވެ. މިއީ ސްކޫލްތަކުގައި ހިނގާ ބަޑީގެ ހަމަލާތަކުގެ ގިނަވެފައިވާ ދަނޑިވަޅެއްގައި، މީގެ އަސްލަކީ ބަޑި ފަދަ ހަތިޔާރު އެމެރިކާއިން ގަނެވެން ހުރުން ކަމަށް ގަބޫލުކޮށް، އެކަމާ ދެކޮޅަށް ބާއްވާ ހިނގާލުންތަކެކެވެ.
އެގޮތުން މި ހިނގާލުންތަކުގައި އެތައް ހާސް ދަރިވަރުންތަކެއް ބައިވެރިވަމުން ދާއިރު، ހިނގާލުންތަކުގައި ހޮލީވުޑްގެ މަޝްހޫރު ތަރިންތައް ވެސް ދަނީ ފެންނަމުންނެވެ. އޭގެ ތެރޭގައި، ލޭޑީ ގާގާ، ޕޯލް މެކާޓްނީ، މައިލީ ސައިރަސްއާއި އާއިލާ، ޖިމީ ފެލަން، އޭމީ ޝޫމަރ، އަރިއާނާ ގްރާންޑޭ، ޖެނިފަރ ހަޑްސަން، ޑެމީ ލަވާޓޯ، އޮލޯވިއާ ވައިލޑް، ކާންޔޭ ވެސްޓް، ކިމް ކާޑޭޝިއަން، ޒެންޑޭޔާ، ޗާލީޒް ތެރީން އަދި ޖޯޖްއާއި އަމާލް ކްލޫނީ ހިމެނެއެވެ. ހިނގާލުންތަކުގައި ބައިވެރި ނުވެވުނު ނަމަވެސް، ގިނަ ތަރިންތަކެއް ދަނީ ސޯޝަލް މީޑިއާ މެދިވެރިކޮށް "މާޗް ފޯ އަވަރ ލައިވްސް"އަށް ތާއީދު ފާޅުކުރަމުންނެވެ.
މީގެ އިތުރުން، ޖޯޖްއާއި އަމާލް، އަދި އޯޕްރާ ވިންފްރީއާއި ސްޓީވަން ސްޕީލްބަރގް ފަދަ ފަންނާނުންގެ އެހީގައި މި މޫވްމަންޓަށް މިހާތަނަށް ދެ މިލިއަން ޑޮލަރުވަނީ ލިބިފައެވެ.
"މާޗް ފޯ އަވަރ ލައިވްސް" ރޭވުމުގެ އިސްކޮށް ހަރަކާތްތެރި ވެފައިވަނީ، ފްލޮރިޑާގެ ޕާކްލޭންޑްގެ ސްކޫލެއް ކަމަށްވާ 'ސްޓޯންމަން ޑަގްލަސް ހައި ސްކޫލް'ގައި ފެބްރުއަރީ 14 ގައި ހިނގައިދިޔަ ބަޑީގެ ހަމަލާއަށް ފަހު، އެ ސްކޫލްގެ ދަރިވަރުންނެވެ.
މި ހިނގާލުންތަކާ ގުޅިގެން ވައިޓް ހައުސްއިން ބުނެފައިވަނީ ޒުވާން ކުދިންތަކެއް އެމީހުންގެ ހިޔާލު ފާޅުކުރުމުގެ މިނިވަންކަމުގެ ހައްގު ބޭނުން ކުރާތީ އުފާވާ ކަމަށެވެ. ނަމަވެސް ރައީސް ޑޮނަލްޑް ޓްރަމްޕް ސީދާ އެއްޗެއް ވިދާޅުވެފައި ނުވާއިރު، ހިނގާލުން ކުރިއަށް ދިޔަ ވަގުތު އެ މަނިކުފާނު ހޭދަ ކުރެއްވީ ގޯލްފް ކުޅެއްވުމުގައެވެ.
އެމެރިކާގެ ކުރީގެ ރައީސް ބަރަކް އޮބާމާއާއި އަނބިކަނބަލުން މިޝޭލްވެސް ވަނީ "މާޗް ފޯ އަވަރ ލައިވްސް"އަށް ތާއީދު ކުރައްވާފައެވެ.
"އަޅުގަނޑަށާއި މިޝޭލްއަށް ތި ޒުވާނުންގެ ފަރާތުން ވަރަށް ހިތްވަރު ލިބިއްޖެ. ތިހެން ކުރިއަަށްދޭ، އަހަރަމެން ތި ގެންދަނީ ކުރިއަށް،" އޮބާމާ ވިދާޅުވިއެވެ.
