ކުލަބުގެ ސަޕޯޓަރުންގެ ސަޕޯޓާއެކު ބާސެލޯނާ އަށް ޔުއެފާ އަންހެން ޗެމްޕިއަންސް ލީގުގެ ތަށި ކާމިޔާބު ކުރެވޭނެ ކަމަށް އެ ޓީމުގެ ކޯޗު ޖޮނަތަން ގިރާލްޑޭޒް ބުނެފި އެވެ.

އޭނާ މިހެން ބުނީ މި ސީޒަނުގެ ޗެމްޕިއަންސް ލީގު ފައިނަލްގައި ވުލްވްސްބާގާ ދެކޮޅަށް ނިކުންނަ މެޗުގެ ކުރިން އޮތް ޕްރެސް ކޮންފަރެންްސްގަ އެވެ. އޭނާ ބުނީ ނެދަލެންޑްސްގެ ފިލިޕްސް ސްޓޭޑިއަމްގައި އޮންނަ ފައިނަލް މެޗު ބެލުމަށް ބާސެލޯނާގެ ސަޕޯޓަރުން އައި ރޫހު ފެނިފައި ވެސް ޓީމަށް އިތުރު ހިތްވަރެއް ލިބޭނެ ކަމަށެވެ. އޭނާ ބުނީ ކާމިޔާބު ސީޒަނެއް ނިންމާލުމަށް ސަޕޯޓަރުންގެ ސަޕޯޓަކީ ވަރަށް މުހިންމު އެއްޗެއް ކަމަށެވެ. ބާސެލޯނާ އިން ބޭނުންވަނީ ފައިނަލް މެޗުން މޮޅުވެ ތަށި އުފުލާލަންކަން ފާހަގަކޮށް ގިރާލްޑޭޒް ބުނީ، ބޭނުންވަނީ މިއީ ސަޕޯޓަރުންނަށް ރަނގަޅު ހަދިޔާއެއް ދެވޭނެ ފުރުސަތަކަށް ވެސް ހަދަން ކަމަށެވެ. އިތުރަށް ގިރާލްޑޭޒް ބުނީ ފައިނަލްގައި ކުޅެން ޖެހޭނީ ހަމައެކަނި ދަނޑު މަތީގައި ތިބޭ 11 ކުޅުންތެރިންގެ ރޫހުގައި ނޫން ކަމަށާއި، އެކަމުގައި ބެންޗުގައި ތިބޭ ކުޅުންތެރިންގެ ދައުރު ވެސް ބޮޑުވާނެ ކަމަށެވެ.

ގިރާލްޑޭޒްގެ އިތުރުން އެ ޕްރެސްގައި ވާހަކަ ދައްކަމުން ބާސެލޯނާގެ އެންމެ މުހިންމު އެއް ކުޅުންތެރިޔާ، އަލެކްސިއާ ޕުޓޭޔާސް ބުނީ ޓިއުރިންގައި ކުޅުނު ފައިނަލް މެޗުން މޮޅުވާން ކުޅުންތެރިން މަސައްކަތް ކުރި ކަމަށެވެ. ނަމަވެސް އެ ފައިނަލުން ނާކާމިޔާބު ވުމަކީ ޓީމަށް ލިބުނު ހިތާމައެއް ކަމަށް އޭނާ ވަނީ ބުނެފަ އެވެ. އެކަމަކު އެއީ މިހާރު ލިބިފައި އޮތް ފުރުސަތުގައި މުބާރާތް ކާމިޔާބުކޮށް، ތަށި އުފުލާލަން ބޭނުންވާ އެއް ސަބަބު ކަމަށް އޭނާ ބުންޏެވެ. މިދިޔަ ސީޒަނުގެ ފައިނަލްގައި ބާސެލޯނާ ވަނީ ލިއޯން އަތުން ބަލިވެފަ އެވެ. އިތުރަށް ވާހަކަ ދައްކަމުން ޕުޓޭޔާސް ބުނީ، އޭނާ ޤަބޫލު ކުރާ ގޮތުގައި ކޮންމެ ކުޅުންތެރިޔެއްގެ ވެސް ޒިންމާ އަކީ އަމިއްލަ އަތް މަތިން ކަންކަން ދޫވިޔަ ނުދިނުން ކަމަށެވެ. އަނިޔާގައި ހުރުމަށް ފަހު އެނބުރި އައިސް ފައިނަލުން ފެންނާނެތޯ ސުވާލު ކުރުމުން އޭނާ ބުނީ އެއީ ކޯޗުގެ ނިންމުމެއް ކަމަށެވެ. އެގޮތުން މެޗުގައި ކުޅުންތެރިޔަކު ކުޅޭނެ ވަގުތު ވެސް ކަނޑައަޅާނީ ކޯޗު ކަމަށް އޭނާ ބުންޏެވެ.

ބާސެލޯނާ އާއި ވުލްވްސްބާގް ބައްދަލު ކުރާ ފައިނަލް މެޗު ފަށާނީ ހޮނިހިރު ދުވަހުގެ ރޭ ރާއްޖެ ގަޑިން 19:00ގައެވެ.