ސްޓޫޑެންޓް ލޯނަށް ކުރިމަތިލި ކުދިންގެ ތެރެއިން ޝަރުތު ހަމަވި 1225 ކުދިންނަށް ލޯނު ލިބޭނެ: ރައީސް ސާލިހު
31 މެއި 2023 | ބުދަ 16:17ފޯރުންތެރިކަން ނެތިގެން މަތީ ތައުލީމު ހާސިލުނުކުރެވިފައި މިހާރު ތިބޭކަށް ނުޖެހޭނެ
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު
މި އަހަރު ސްޓޫޑެންޓް ލޯނަށް ކުރިމަތިލި ކުދިންގެ ތެރެއިން ޝަރުތު ހަމަވި 1225 ކުދިންނަށް ލޯނު ދޭން ނިންމާފައިވާކަމަށް، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ބުދަ ދުވަހުގެރޭ ކުރިއަށް ގެންދިޔަ މަތީ އަރުތަވެރިންގެ އިނާމު ދިނުމުގެ ޖަލްސާގައި ވާހަކުފުޅުދައްކަވަމުން ރައީސް ވިދާޅުވީ، ފޯރުންތެރިކަން ނެތިގެން ނުވަތަ އާއިލާއާ ވަކިން ބޭރަށް ދާންޖެހިދާނެތީ މަތީ ތައުލީމު ހާސިލުނުކުރެވިފައި މިހާރު ތިބެންނުޖެހޭނެ ކަމަށާއި، ރާއްޖޭގައި ތިބެގެން ފުރަތަމަ ޑިގްރީ ހާސިލުކުރަން ބޭނުންވާ ކުދިންނަށް ހިލޭ ޑިގްރީ ޕްރޮގްރާމްގެ ތެރެއިން އެފުރުސަތު ހުޅުވާލެވިފައިވާކަމަށެވެ.
ރައީސް ސާލިހު ވިދާޅުވީ ރާއްޖޭން ބޭރުން އެކަން ކުރަން ބޭނުންވާ ކުދިންނަށް، ސްޓޫޑެންޓް ލޯން ސްކީމްގެ ދަށުންވެސް އެކަން ކުރެވޭނެކަމަށާއި، ރާއްޖެއާއި ރާއްޖެއިން ބޭރުން މަތީ ތައުލީމާއި ތަމްރީން ހާސިލުކުރުމަށް ސަރުކާރުން ދޫކުރާ ލޯނު ދިނުމުގައިވެސް މިއަހަރު ހެޔޮ ބަދަލުތަކެއް ގެނެސްފައިވާކަމަށެވެ.
އެގޮތުން މި އަހަރު ސްޓޫޑެންޓް ލޯނަށް ކުރިމަތިލި ކުދިންގެ ތެރެއިން ޝަރުތު ހަމަވި 1225 ކުދިންނަށްވެސް އެ ލޯން ދޭން ނިންމާފައިވާކަމަށާއި، މިއަހަރު މި ދޭ 1225 ލޯނާއެކު، މި ސަރުކާރުން ފެށި ސްޓޫޑެންޓް ލޯން ސްކީމްގެ ދަށުން، މިހާތަނަށް ދޫކުރި ސްޓޫޑެންޓް ލޯންގެ ޖުމުލަ 3211އަށް އަރާނެކަމަށް ރައީސް ސާލިހު ވިދާޅުވިއެވެ.
ދަރިވަރުންގެ ސާނަވީ މަރުހަލާގެ އެންމެ މުހިންމު ދުވަސްތައް ހޭދަކުރީ ކޮވިޑް-19ގެ ބަލިމަޑުކަން މުޅި ރާއްޖެ ބަނަކޮށްފައި އޮތް ދުވަސްވަރުކަން ފާހަގަކުރައްވައި ރައީސް ސާލިހު ވިދާޅުވީ، އެ ދުވަސްތަކުގެ ކިޔެވުން ފުރިހަމަކުރީ ބައެއް ދުވަސްވަރު ސްކޫލަށް ހާޒިރުވެ، ގައިދުރުކޮށް ތިބެ ރައްކާތެރިކަމުގެ އެތައް ފިޔަވަޅުތަކެއް އަޅައިގެން ކަމަށެވެ. އަދި ބައެއް ދުވަސްވަރު ގޭގައި ތިބެ އޮންލައިންކޮށް ކަމަށާއި، އެއީ ކުދިންނަށާއި ބެލެނިވެރިންނަށާއި ޓީޗަރުންނަށްވެސް ފަސޭހަ ދުވަސްތަކެއް ނޫންކަން އެމަނިކުފާނު ފާހަގަކުރެއްވިއެވެ. ނަމަވެސް އެ ދަތި އުނދަގޫތަކާ ކުރިމަތިލައި، ކެރުމާއި ހިތްވަރާއި ސާބިތުކަން ދައްކައިދީފައިވާ ކަމަށް ރައީސް ސާލިހު ވިދާޅުވިއެވެ.
ރައީސް ސާލިހު ވިދާޅުވީ ދިވެހި ދައުލަތް އޮތީ ކުދިންނާއެކު ކަމަށާއި، ސަރުކާރު އޮތީ، ކުދިން ތައުލީމީ ރޮނގުން ދާން ބޭނުންވި ކޮންމެ ރޮނގަކުން، ދާން ބޭނުންވި ކޮންމެ ހިސާބަކަށް ގެންގޮސްދޭން ތައްޔާރަށް ކަމަށެވެ. އެއްވެސް ކުއްޖަކު ބާކީ ނުކޮށް އަދި އެއްވެސް ތަފާތުކުރުމެއް ނެތި އެ ފުރުސަތު ފަހިކޮށްދޭނެ ކަމަށް ރައީސް ސާލިހު ވިދާޅުވިއެވެ. އާބާދީ ކުޑަވެގެން ނުވަތަ ކުދިން މަދުވެގެން ސްކޫލްގައި ކިޔަވައިނުދޭ ރަށެއް މިހާރަކު ނޯންނާނެ ކަމަށާއި، ސާނަވީ ނިންމުމަށްފަހު، މަތީ ސާނަވީއަށް ކިޔެވުމުގެ ފުރުސަތު ރާއްޖޭގެ ހުރިހާ އަތޮޅެއްގައި ތަނަވަސްވެފައިވާކަމަށް އެމަނިކުފާނު ވިދާޅުވިއެވެ. އަދި ވިދާޅުވީ މަތީ ތައުލީމާއި ތަމްރީނުގެ ފުރުސަތުތައްވެސް ބައެއް އަތޮޅުތަކުގައި މިހާރު ހުރީ ހަމަޖެހިފައި ކަމަށެވެ.
މީގެ އިތުރުން ރައީސް ސާލިހު ވަނީ ކުދިންނަށް ކިޔަވައިދީ، ސާނަވީ މަރުހަލާތައް ފުރިހަމަކޮށް މަތީ ތައުލީމާ ހަމައަށް ކުދިންގެ އަތުގައި ހިފައިގެން ގެނެސްދިނީތީ، ލޮބުވެތި ބެލެނިވެރިންނަށާއި ޓީޗަރުންނަށް ވަރަށް އިޚްލާސްތެރިކަމާއެކު ޝުކުރު އަދާކުރައްވާފައެވެ.
