ސްޓޫޑެންޓް ލޯނަށް އެދުމުގެ ފުރުޞަތު ހުޅުވާލައިފި، މިފަހަރު 500 ފުރުޞަތު
ރާއްޖެއާއި ރާއްޖެއިން ބޭރުން މަތީ ތަޢުލީމު ހާސިލްކުރަން ބޭނުންވާ ފަރާތްތަކަށް ލޯނަށް އެދުމުގެ 500 ފުރުސަތު ވަނީ ހުޅުވާލާފައި
ރާއްޖެ އާއި ރާއްޖެއިން ބޭރުން މަތީ ތައުލީމާއި ތަމްރީނު ހޯދުމަށް ލޯނަށް އެދި އެޕްލިކޭޝަން ހުށަހެޅުމުގެ ފުރުސަތު ވަނީ ހުޅުވާލައިފައި
ރާއްޖެއާއި ރާއްޖެއިން ބޭރުން މަތީ ތަޢުލީމު ހާސިލްކުރަން ބޭނުންވާ ފަރާތްތަކަށް ލޯނަށް އެދުމުގެ ފުރުޞަތު މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވުޒާރާއިން ހުޅުވާލައިފި އެވެ.
ހަޔާ އެޑިޔުކޭޝަން، ލޭބަ އެންޑް ސްކިލްސް ޑިވެލޮޕްމަންޓް މިނިސްޓްރީން ހޮނިހިރު ދުވަހު ކުރި އިއުލާނުގައި ވަނީ ރާއްޖޭގެ ގައުމީ ސަނަދުތަކުގެ އޮނިގަނޑުގެ ފެންވަރު 5 އިން ފެށިގެން ފެންވަރު 10 ގެ ނިޔަލަށް ކިޔެވުމަށާ އަދި ލައިސަންސް ހޯދަން ކިޔެވުމުގެ 500 ފުރުސަތު ހުޅުވާލާފަ އެވެ.
ލޯނަށް އެދި ހުށަހެޅުމުގެ ފުރުސަތު އަލަށް ކިޔަވަން ފަށާ ދައިވަރުންނަށާއި މިހާރު ވެސް ކިޔަވަމުންދާ ދަރިވަރުންނަށް އޮންނާނެ ކަމަށް މިނިސްޓްރީން ބުންޏެވެ.
އަލަށް ކިޔަވަން ފަށާ ދަރިވަރުންގެ ގޮތުގައި ބަލާނީ ލޯނުގެ ފުރުސަތަށް އެދި އިއުލާނުގެ އެޕްލިކޭޝަން ހުށަހެޅުމަށް ދީފައިވާ ސުންގަޑި އާ ހަމައަށް މަތީ ތައުލީމު ދޭ މަރުކަޒެއްގައި ކިޔެވުމަށް ރަޖިސްޓްރީވެފައި ނުވާ ނުވަތަ ޓިއުޝަން ފީ ދައްކާފައި ނުވާ ދަރިވަރުންނެވެ.
މީގެއިތުރުން، ސަރުކާރުން ދޫކުރާ ލޯނުގެ ދަށުން ކިޔަވަމުންދާ ދަރިވަރުން އިތުރަށް ޓޮޕް އަޕް ނަގަން ބޭނުންވާނަމަ އެކަމަށްވެސް މި އިއުލާނުގެ ދަށުން ހުށަހެޅޭނެ އެވެ. ޓޮޕް އަޕް ދޫކުރާ އެންމެ މަތީ އަދަދަކީ 700،000ރ. އެވެ.
ސްޓޫޑަންޓު ލޯނަށް ހުޅުވާލާފައި މިވަނީ އެކަން ލަސްވެ، އެކަމާ ގުޅޭގޮތުން ގިނަ ބަޔަކު ކަންބޮޑުވުން ފާޅުކުރަމުން ދަނިކޮށެވެ. އެގޮތުން ރާއްޖެއިން ހައި ސްކޫލް ނިންމާ މަތީ ތައުލީމަށް ބޭރަށް ނުފުރި ތިބި ކުދިންނާއި އެ ކުދިންގެ އާއިލާތަކުންވެސް ދަނީ އެ މީހުންގެ ޝުއޫރުތައް ހާމަކޮށްފައިވެ އެވެ.
ސްޓޫޑެންޓު ލޯން ސްކީމުގެ ދަށުން މިދިޔަ އަހަރުވެސް ސަރުކާރުން ފުރަތަމަ އިއުލާނުކުރީ 500 ލޯނު ދިނުމަށެވެ. ނަމަވެސް، ޝަރުތު ހަމަވާ ހުރިހާ ފަރާތްތަކަށް ލޯނު ދޭން ސަރުކާރުން ފަހުން ނިންމި އެވެ.
މި ނިންމުމާ އެއްގޮތަށް ދަރިވަރުން އެޕްލިކޭޝަން ހުށަހެޅި 1،709 ދަރިވަރުންގެ ތެރެއިން ލޯނު ދޭން ނިންމީ 1،153 ދަރިވަރުންނަށެވެ. ޝަރުތުހަމަވި ނަމަވެސް ލޯނު ނުދޭން ނިންމީ ހަމައެކަނި ޕައިލެޓުކަން ކިޔަވަން ހުށަހެޅި ބައެއް ދަރިވަރުންނަށެވެ.
ޕައިލެޓު ލައިސަންސް ސްލޮޓަށް ޝަރުތު ހަމަވި 148 ދަރިވަރުންގެ ތެރެއިން ލޯނު ދޭން ސަރުކާރުން ނިންމީ 10 ދަރިވަރުންނަށެވެ.
