ސޫދާންއަށް އެހީގެ ގޮތުގައި ފޯރުކޮށްދޭ ކާބޯތަކެތި ލޫޓުވުމުގެ މައްސަލަ ގޯހުން ގޯހަށް!

ސޫދާންގެ އަސްކަރިއްޔާއާއި އެ ޤައުމުގެ ޕެރަމިލިޓްރީ ރެޕިޑް ސަޕޯރޓް ފޯރސަސް (އާރްއެސްއެފް)އާ ދެމެދު އޭޕްރިލް 15 ވަނަ ދުވަހު ފެށި ހަނގުރާމަގަނޑު ދޮޅުމަހަށް ވުރެ ދިގުލާ ގޮސްފައި ވާ އިރު، ސޫދާންގެ މަސްރަހަށް ހަމަޖެހުމެއް ލިބިދާނެ ކަމުގެ އަލި މަގެއް އަދި ނުފެނެއެވެ. ސޫދާންގައި ހާލުގައި ޖެހިފައިވާ އެތައް ސަތޭކަ ހާސް ބަޔަކަށް އެހީތެރިކަން ފޯރުކޮށްދިނުމަށް ބައިނަލްއަޤުވާމީ ފެންވަރުގައި މަސައްކަތްތަކެއް ކުރަމުން ދިޔަ ކަމުގައި ވީ ނަމަވެސް، އެކަންވެސް އެދެވޭ ގޮތެއްގައި ކުރިއަށް ގެންދެވޭނެ ގޮތެއް ނުވެއެވެ.

ސޫދާންގައި ހުންނަވާ ވަރލްޑް ފުޑް ޕްރޮގްރާމް (ޑަބްލިއުއެފްޕީ)ގެ ޑައިރެކްޓަރ، އެޑީ ރޯވް ވިދާޅުވި ގޮތުގައި، މީގެ 6 ހަފުތާ ކުރިން، ސޫދާންގައި ހަމަލާ ބަދަލު ކުރުންތައް ފެށިފަހުން، އެހީގެ ގޮތުގައި ފޯރުކޮށްދީފައިވާ 17000 މެޓްރިކް ޓަނުގެ ކާބޯތަކެތި ވަނީ ލޫޓުވާލާފައެވެ.

ސޫދާންއަށް އެހީ ފޯރުކޮށްދިނުމަށް މަސައްކަތް ކުރަމުންދާ އދއާއި އެހީދޭ އެހެނިހެން ޖަމާޢަތްތަކުން ފާހަގަ ކޮށްފައި ވާ ގޮތުގައި، ހަމަލާ ބަދަލު ކުރުންތައް މަޑުޖައްސާލުމުގެ އެއްބަސްވުމެއް އޮތް ކަމުގައި ވީ ނަމަވެސް، އެކަށީގެންވާ ގޮތެއްގައި މަސައްކަތް ކުރިއަށް ގެންދެވޭނެ ގޮތެއް ނުވެއެވެ. ކަމާ ބެހޭ ފަރާތްތަކުގެ ހުއްދަ ހޯދުމުގައި ދަތިތައް ކުރިމަތިވާއިރު، ސަލާމަތްތެރި ކަމާއި ރައްކާތެރިކަމާއެކު އެހީގެ ސަޕްލައި ފޯރުކޮށްދިނުމާއި، މުވައްޒަފުންގެ ސަލާމަތްތެރިކަންވެސް ކަށަވަރު ކުރެވޭނެ ގޮތް ނުވާ ކަމަށް މަޢުލޫމާތު ލިބެއެވެ.

ޑަބްލިއުއެފްޕީ އިން ވަނީ ސޫދާންގެ އަސްކަރިއްޔާއިން ކޮންޓްރޯލް ކުރަމުން ދާ ސަރަޙައްދުތަކާއި، އާރްއެސްއެފްއިން ކޮންޓްރޯލް ކުރަމުންދާ ސަރަޙައްދުތަކުގައި އެހީ ފޯރުކޮށްދިނުމުގެ މަސައްކަތް، މިދިޔަ ހޮނިހިރު ދުވަހު ފަށާފައެވެ. 3 ދުވަހުގެ ތެރޭގައި 12000 އަށް ވުރެ ގިނަ މީހުންނަށް އެހީ ދީފައި ވާ ކަމަށް ޚަބަރު ލިބެއެވެ. ޑަބްލިއުއެފްޕީގެ އަމާޒަކީ، ހަނގުރާމަ ގަދަވެފައި ވާ ޚާރްތޫމްގެ 5 ލައްކައެއްހާ މީހުންނަށް އެހީ ފޯރުކޮށްދިނުން ކަމަށް އެ ޖަމިއްޔާއިން ވަނީ ބުނެފައެވެ.

ކުރިއަށް އޮތް މަސްތަކުގެ ތެރޭގައި، ސޫދާންއިން 2.5 މިލިއަނެއްހާ މީހުން ބަނޑަށް ޖެހޭނެ ކަމަށް ޑަބްލިއުއެފްޕީއިން އަންދާޒާ ކުރެއެވެ. މިއާއެކު، ސޫދާންގައި ކާބޯތަކެތީގެ ކަށަވަރުކަން ގެއްލިފައިވާ މީހުންގެ ޢަދަދު 19 މިލިއަނަށް އިތުރުވެގެންދާނެއެވެ. އެއީ ސޫދާންގެ ޖުމުލަ އާބާދީއަށް ބަލާއިރު ގާތްގަނޑަކަށް 40 ޕަސެންޓް މީހުންނެވެ.

ޔުނިސެފްގެ ތަރުޖަމާނު، ޖޭމްސް އެލްޑަރ ވިދާޅުވީ، ސޫދާންގައި މިހާރުން މިހާރަށް އެހީ ބޭނުންވެފައި ތިބި ކުޑަ ކުދިންގެ ޢަދަދު 13.6 މިލިއަނަށް އަރާ ކަމަށެވެ. ސޫދާންގެ ހަނގުރާމަގަނޑުގެ ތެރޭގައި އެތައް ސަތޭކަ ކުޑަކުދިންނެއްގެ ފުރާނަ ގެއްލިފައި ވާ އިރު، އެތައް ހާސް ކުދިންނެއް، ނުކުޅެދޭ ކުދިންނަށް ވެފައި ވާ ކަމަށްވެސް އެލްޑަރ ވަނީ ފާހަގަ ކުރައްވާފައެވެ.

ހަމަނުޖެހުންތަކާއި ހަމަލާ ބަދަލު ކުރުންތަކުގެ ދިގު ތާރީޚެއް އޮތް ސޫދާންގައި އެންމެ ފަހުގެ ހަނގުރާމަގަނޑު ފެށިފަހުން އެކަނިވެސް، 1.4 މިލިއަން މީހުންގެ ގެދޮރު ވަނީ ގެއްލިފައެވެ. މެއި 26 ވަނަ ދުވަހުގެ ނިޔަލަށް ލިބިފައިވާ ތަފާސް ހިސާބުތަކަށް ބަލާއިރު، 3 ލައްކައަށް ވުރެ ގިނަ މީހުން ވަނީ އަވަށްޓެރި ޤައުމުތަކަށް ހިޖުރަ ކޮށްފައެވެ.