ރައީސް ޔާމީނުގެ މަގާމުން ވަކިކުރުމުގެ މަސައްކަތް ފަށަންޖެހޭ: ޑރ ޖަމީލް

ރައީސް އަބްދުﷲ ޔާމީން މަގާމުން ވަކި ކުރުމުގެ މަސައްކަތް ކުރަންޖެހޭ ކަމަށް އެމަނިކުފާނުގެ ފުރަތަމަ ނައިބު ރައީސް ޑރ މުހައްމަދު ޖަމީލު އަހްމަދު ވިދާޅުވެއްޖެ އެވެ.

މަޖިލީހުގެ މެޖޯރިޓީ ސަރުކާރަށް ގެއްލިފައިވާއިރު، ޑރ ޖަމީލު ކުރައްވާފައިވާ ޓްވީޓުގައި ވިދާޅުވެފައިވަނީ، މަޖިލީހަށް މިއައި ބަދަލާއެކު ދިވެހި ގައުމަށް ސިޔާސީ ހަމަޖެހުން ގެނައުމަށްޓަކައި ރައީސް ޔާމީން ރައީސް ކަމުގެ މަޤާމުން ވަކިވުމުގެ މަސައްކަތް ފަށަންޖެހޭ ކަމަށެވެ.

އިތުބާރު ނެތްކަމުގެ މައްސަލަ ހުށަހަޅައި މަގާމުން ދުރުކޮށްފައިވާ ޑރ. ޖަމީލް ވިދާޅުވީ، ނައިބު ރައީސް އެއްވެސް ގޮތަކަށް ވަކިކޮށްފި ނަމަ، ރައީސް ޔާމީނަށް ރިޔާސީ ގޮނޑި ގެއްލިގެން ދާނެ ކަމަށެވެ.

މަޖިލީހުގެ ސަޕޯޓު ގެއްލުމުން އަދި ވޯޓުން ބަލިވުމުންވެސް ވެރިކަމުގައި ޖުޑިޝިއަރީ މެދުވެރިކޮށް ތިބެން ހިފީތޯ ޑރ ޖަމީލު ސުވާލުކުރެއްވި އެވެ. މަސްލަހަތު ބެލުމުގެ އުސޫލު ނެތީތޯވެސް އެ މަނިކުފާނު ވަނީ ސުވާލު އުފައްދާފަ އެވެ.

ޑރ ޖަމީލުގެ އިތުރަށް ސިޔާސީ އެކި ފަރާތްތަކުން އަންނަނީ ރާއްޖޭގެ ސިޔާސީ މަސްރަހުގައި ހިނގަމުންދާ ކަންކަމާއި ގުޅިގެން ފާޑުކިޔުންތައް އަމާޒު ކުރަމުންނެެވެ.

ހޯމަ ދުވަހު ވަނީ މަޖިލީހުގެ ޕީޕީއެމް އަށް ނިސްބަތްވާ ހަތް މެންބަރަކު ޕީޕީއެމް އިން ވަކިވެވަޑައިގެންފަ އެވެ.