ކިޔަވާދޭއިރު ދަރިވަރުންގެ ޝަޢުޤުވެރިކަން ގެއްލޭ ކަމުގެ އިޙުސާސް ކުރެވޭތަ؟

ކުލަކުލައިގެ ދަގަތްފާނުތަކާއި، ބޯޅަތަކެވެ. މޭވާ ވަށިގަނޑެކެވެ. އެއީ އިރުމަތީ ޤުދުސްގެ ކުލާހަކުން މީގެ ކުރިން ފެނުނު މަންޒަރުތަކެއް ނޫނެވެ. އެއީ ޠަލާ ޖަމާލް ހިންގާ އިނގިރޭސި ކުލާހުގެ މަންޒަރުތަކެވެ. ޠަލާ އަމާޒު ހިފާފައި ހުރީ، ކިޔަވައިދިނުމުގައި ޒަމާނުއްސުރެ ބޭނުން ކުރަމުން ދިޔަ ގޮތްގަނޑު ދޫކޮށް، ވީހާވެސް މަޖާ، ބިނާ ކުރަނިވި މާޙައުލެއްގައި ޢިލްމު އުނގުނެމުގެ ފުރުޞަތު ފަހި ކޮށްދިނުމަށެވެ.

ޢުމުރުން 31 އަހަރުގެ ޒުވާނާ ތަޢުލީމު ހާސިލު ކުރީވެސް އިރުމަތީ ޤުދުސްގެ ތަޢުލީމީ ނިޒާމުގެ ތެރެއިންނެވެ. ޠަލާ ބުނާ ގޮތުގައި މިވަޤުތު އޮތް އިނގިރޭސި މަންހަޖަކީ އަދުގެ ވެއްޓަށް ފުދޭ މަންހަޖެއް ނޫނެވެ. އަދި އެއީ މަންތިޤީ ވިސްނުންތަކަށް ފުރުޞަތު ދޭ މަންހަޖެއް ނޫން ކަމުން، ކިޔަވާ ދިނުމުގެ އުކުޅުތަކަށް ބަދަލު ގެނައުމުގެ ވަރުގަދަ ޗެލެންޖް ނެގީ ކަމަށް ޠަލާ ބުނެއެވެ.

ޠަލާ ކުރިއަށް ގެންދާ އިނގިރޭސި ކުލާސް ތެރެއަށް ބަލާލުމުން، އޭނާގެ ޗެލެންޖު ކާމިޔާބު ވަމުންދާ މަންޒަރު ފެނެއެވެ. ދަރިވަރުންގެ މޫނުމަތިން ފެނިގެންދަނީ އިންތިހާ ޝަޢުޤުވެރި ކަމެވެ. ޢުމުރުން އެންމެ 6 އަހަރުގެ ދަރިންވަރުން ތިބި ކުލާސް ތެރޭގައި ހިންގާ އެކި ހަރަކާތްތަކުގައި، އެ ކުދިން ބައިވެރިވަނީ އުފަލުންނެވެ. ޝަކުވާއެއް ނެތިއެވެ.

ޠަލާ ބުނާ ގޮތުގައި، ބެލެނިވެރިންގެ ފަރާތުންވެސް އިވެމުންދަނީ އެދެވޭ ބަސްތަކެކެވެ. އޭނާގެ ކުލާހުން ޖާގައެއް ހޯދުމަށް އެދި، ޖަހާފައިވާ ވެއިޓްލިސްޓުވެސް ފިސާރި ދިގެވެ. ބެލެނިވެރިން ބުނި ގޮތުގައި، ޠަލާގެ އިނގިރޭސި ކުލާހަށް ދަރިން ފޮނުވަން ފެށިފަހުން، އެކުދިންގެ ކިބައިން އެދެވޭ ބަދަލުތަކެއް ވަނީ ފެންނަން ފަށާފައެވެ. އިނގިރޭސި ބަހުން ވާހަކަދެއްކުމުގެ ހުނަވެރިކަން އިތުރުވެ، ނަފްސަށް އޮންނަ އިތުބާރު ބޮޑުވި ކަމަށާ، ބައެއް ޠަލާގެ ކުލާސްތަކަކީ ބައެއް ދަރިވަރުން އެންމެ ގަޔާވާ ހަރަކާތަށްވެސް ވެފައި ވާ ކަމަށް ބެލެނިވެރިން ވަނީ ފާހަގަ ކޮށްފައެވެ.

"ހާއި އިންގްލިޝް"ގެ ނަމުގައި، ޚާއްޞަ ކުލާސްތަކެއް ޠަލާ ފެށި މިދިޔަ އަހަރުގެ އޯގަސްޓް މަހުއެވެ. މިއަދު އޭނާގެ ދަރިވަރުންގެ ޚާޒިރީގައި 100 އެއްހާ ކުދިން އެބަތިއްބެވެ. ޠަލާގެ އަމާޒަކީ އޭނާގެ ވިޔަފާރި އިތުރަށް ފުޅާކޮށް، 2025 ވަނަ އަހަރު އަންނައިރު، އިނގިރޭސި ބަހަށް ޚާއްޞަކޮށްގެން، އޭނާގެ އަމިއްލަ އެކަޑަމީއެއް ހުޅުވުމެވެ.