މިނިވަން ފަލަސްޠީނު ދައުލަތެއް ޤާއިމު ނުކުރެވޭހާ ހިނދަކު ހަތިޔާރު ނުބަހައްޓާނެ ކަމަށް ހަމާސް އިން ބުނެފި

މިނިވަން ފަލަސްޠީނު ދައުލަތެއް ޤާއިމު ނުކުރެވޭހާ ހިނދަކު އެ ޖަމާޢަތުން ހަތިޔާރު ނުބަހައްޓާނެ ކަމަށް ހަމާސްއިން ހޮނިހިރު ދުވަހު ބުނެފި އެވެ.

މިއީ ޣައްޒާގެ ހަނގުރާމަ ހުއްޓާލުމަށް އިސްރާއީލުން ކުރާ މުހިންމު އެއް ޑިމާންޑަށް ހަމާސް އިން ދިން ޖަވާބެއް ކަމަށް ބެލެވެއެވެ.

ޣައްޒާގެ ހަނގުރާމަ 60 ދުވަހުގެ މުއްދަތައް މެދުކަނޑާލުމަށާއި ރަހީނުން ދޫކޮށްލުމުގެ އެއްބަސްވުމަކަށް ވާސިލުވުމަށް ހަމާސް އާއި އިސްރާއީލާ ދެމެދު ކުރެވުނު ނުސީދާ މަޝްވަރާތައް ނިމިގެން ދިޔައީ ފާއިތުވި ހަފުތާގައި އެއްވެސް ނަތީޖާއެއް ނުނެރެވިއެވެ.

ހަނގުރާމަ ވަގުތީ ގޮތުން ހުއްޓުމަކަށް ގެނައުމުގެ މަސައްކަތުގައި މެދުވެރިންގެ ގޮތުގައި ހަރަކާތްތެރިވާ ޤަޠަރާއި މިޞްރުން، އަދި ފަރަންސޭސި ވިލާތާއި ސަޢޫދީ ޢަރަބިއްޔާ އިން އިސްރާއީލު-ފަލަސްޠީނު ގެ މައްސަލަ އަށް ދެ ދައުލަތުގެ ހައްލެއް ހޯދުމަށް އަޅަންޖެހޭ ފިޔަވަޅުތަކުގެ ތެރެއިން ހަމާސް އިން އެ ޖަމާޢަތުގެ ހަތިޔާރުތައް ހަވާލުކުރަން ޖެހޭނީ ހުޅަނގުގެ ތާއީދު ލިބިފައިވާ ޕެލަސްޓައިން އޮތޯރިޓީ އަށް ކަމަށް ބުނެފައިވާ ބުނުމަށް ތާއީދު ކޮށްފައި ވެއެވެ.

2007 އިން ފެށިގެން ޣައްޒާގެ ވެރިކަން ކުރަމުން އަންނަ، އެހެން ނަމަވެސް މި ހަނގުރާމައިގައި އިސްރާއީލުގެ އަތުން ބޮޑެތި ގެއްލުންތަކެއް ލިބިފައިވާ ހަމާސްގެ ބަޔާނުގައި ބުނެފައި ވަނީ "މިނިވަން، ފުރިހަމަ އަމިއްލަ ވެރިކަމެއް އޮތް، ވެރި ރަށުގެ ގޮތުގައި ބައިތުލްމަޤްދިސް އޮންނަ ގޮތައް ފަލަސްޠީނު ދައުލަތެއް" ޤާއިމު ނުކުރެވޭހާ ހިނދަކު "ހަތިޔާރުން ދިފާޢުވުމުގެ" ޙައްޤު ދޫނުކުރެވޭނެ ކަމަށެވެ.

އިސްރާއީލުން ދެކޭގޮތުގައި ހަމާސް ހަތިޔާރު ބެހެއްޓުމަކީ ހަނގުރާމަ ނިންމުމަށް ވެވޭ ކޮންމެ އެއްބަސްވުމެއްގައި ވިޔަސް ހިމެނެންޖެހޭ މުހިންމު ޝަރުޠެކެވެ. ނަމަވެސް ހަމާސް އިން ތަކުރާރުކޮށް ބުނެފައި ވަނީ އެ ޖަމާޢަތުން ހަތިޔާރު ބެހެއްޓުމަށް ތައްޔާރު ނޫން ކަމަށެވެ.

ފާއިތުވި މަހު، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވެފައި ވަނީ ކުރިމަގުގައި މިނިވަން ފަލަސްޠީނު ދައުލަތެއް އުފެދުމަކީ އިސްރާއީލު ފަނާކުރުމަށް ބޭނުން ކުރެވޭނެ މަންސައެއް ކަމަށާއި، އެހެން ކަމުން ފަލަސްޠީނުގެ ސަރަޙައްދުތަކުގެ ސަލާމަތީ ބާރު އޮންނަން ޖެހޭނީ އިސްރާއީލުގެ އަތުގައި ކަމަށެވެ.

އިނގިރޭސިވިލާތާއި ކެނެޑާ ފަދަ ޤައުމުތަކުން އިސްރާއީލުގެ ހަމަލާތަކާއި ބްލޮކޭޑުގެ ސަބަބުން ޣައްޒާ އަށް ލިބިފައިވާ ބޮޑެތި ގެއްލުންތަކަށް އިޖާބަ ދިނުމުގެ ގޮތުން ފަލަސްޠީނު ދައުލަތެއް ބަލައިގަތުމުގެ ވިސްނުން އިޢުލާނުކޮށްފައިވާތީ އެކަމަށް ވެސް ނަތަންޔާހޫ ވަނީ ފާޑު ވިދާޅުވެފައެވެ. އޭނާ މިކަން ސިފަކޮށްފައި ވަނީ ހަމާސްގެ ޢަމަލުތަކަށް ދެވޭ އިނާމެއްގެ ގޮތުގައެވެ.

މި ހަނގުރާމަ ފެށުނީ 2023 ވަނަ އަހަރުގެ އޮކްޓޯބަރު 7 ވަނަ ދުވަހު އެވެ.

އޭގެ ފަހުން އިސްރާއީލުން ޣައްޒާ އަށް ދިން ހަމަލާތަކުގެ ސަބަބުން އެ ސަރަޙައްދުގެ ބޮޑު ބައެއް ވަނީ ވީރާނާވެފައެވެ. މި ހަމަލާތަކުގައި 60,000 އަށްވުރެ ގިނަ ފަލަސްޠީނު މީހުން މަރުވެ، އިންސާނީ ބޮޑު ކާރިސާ އެއް ކުރިމަތިވެފައިވެއެވެ.

އެންމެ ފަހުން ބޭއްވުނު މަޝްވަރާތައް ނަތީޖާ އެއް ނުނެރެވި ނިމުމާ ގުޅިގެން އިސްރާއީލާއި ހަމާސް އިން އެއްބަޔަކު އަނެއް ބަޔަކު ބަދުނާމު ކުރަމުން ގެންދިޔައެވެ.