އައު 3 ކޯހާއެކު ޤައުމީ ޔުނިވަރސިޓީގެ ކޯސްތަކަށް ކުރިމަތިލުމުގެ ފުރުސަތުގެ ހުޅުވާލައިފި

އައު ތިން ކޯހާއެކު ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ ކޯސްތަކަށް އެދި ހުށަހެޅުމުގެ ފުރުސަތު ހުޅުވާލައިފިއެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި އެމްއެންޔޫއިން ވަނީ އެ ޔުނިވަރސިޓީގެ އޮގަސްޓް އިންޓޭކުގައި ހުރި ފުރުސަތުތަކާ ގުޅޭ ގޮތުން މައުލޫމާތު ހިއްސާކޮށްފައެވެ. އެގޮތުން އޮގަސްޓް އިންޓޭކުގައި 93 ކޯހަކަށް 5400 ޖާގަ ހުޅުވާލާފައިވާ ކަމަށް އެ ޔުނިވަރސިޓީން ބުންޏެވެ.

Advertisement

މިފަހަރުގެ އިންޓޭކުގައި 93 ކޯހަކަށް ފުރުސަތު ހުޅުވާލާފައިވާއިރު މީގެ ތެރެއިން މުޅިން އަލަށް ތިން ކޯހެއް ވަނީ ތައާރަފު ކޮށްފައެވެ. އެއީ ބެޗްލާ އޮފް އިންޖިނިއަރިން އެންޑް އިލެކްޓްރޯނިކްސް އާއި ޑިޕްލޮމާ އިން މެކޭނިކް އިންޖިނިއަރިންގް އަދި މާސްޓާ އޮފް ސައިންސް އިން ޖިއޯ ސްޕެޝިއަލް ޓެކްނޮލޮޖީ ފޯ ޑިޒާސްޓާ މެނޭޖްމަންޓެވެ.

ގައުމީ ޔުނިވާސިޓީގެ ވައިސް ޗާންސެލަރ ޑރ. މުހައްމަދު ޝަރީފް ވިދާޅުވީ، އަލަށް ތައާރަފު ކުރާ ތިން ކޯހުގެ އިތުރަށް، އިތުރު ތިން ކޯހެއްގެ ހުއްދައަށް މިހާރު އެމްކިޔުއޭގައި އެދިފައި ވާ ކަމަށެވެ. އަދި ހުއްދަ ލިބުނުހާ އަވަހަކަށް އެ ކޯސްތަކަށް ވެސް ފުރުސަތު ހުޅުވާލާނެ ކަމަށް އޭނާ ވިދާޅުވިއެވެ. އެއި ބެޗްލާސް އޮފް އަރޓްސް އިން މީޑިއާ އެންޑް ޕަބްލިކް ރިލޭޝަންސް އާއި ބެޗްލާސް އޮފް ސައިންސް އިން ކްލައިމެޓް ޗޭންޖް އަދި ޕްރޮފެޝަނަލް ސެޓްފިކެޓް އިން ހޮސްޕިޓާލިޓީ އެންޑް ޓުއަރިޒަމް ލީޑާޝިޕެވެ.

ވައިސް ޗާންސެލަރ ވިދާޅުވި ގޮތުގައި މި ކޯސްތަކުގެ ތެރެއިން ޕްރޮފެޝަނަލް ސެޓްފިކެޓް އިން ހޮސްޕިޓާލިޓީ އެންޑް ޓުއަރިޒަމް ލީޑާޝިޕަކީ މިޑްލް މެނޭޖްމަންޓުގަ މަސައްކަތް ކުރާ ފަތުރުވެރިކަމުގެ ދާއިރާގަ މަސައްކަތް ކުރާ މީހުންނަށް ހުޅުވާލެވިގެން ހިންގޭ ޕްރޮގްރާމެކެވެ.

ފުވައްމުލަކުގައި އައިސީޓީ ކެމްޕަހެއް ހެދުމުގެ މަސައްކަތް ކުރަމުން އަންނަކަން ފާހަގަކުރައްވައި ވައިސް ޗާންސެލަރ ވިދާޅުވީ މަސައްކަތް އެއްކޮށް ނުނިމުނު ކަމުގައިވީނަމަވެސް އެ ދާއިރާގެ ކޯސްތައް މިފަހަރު ފުވައްމުލަކުގައި ފަށާނެ ކަމަށެވެ.

ޤައުމީ ޔުނިވަރސިޓީން ހުޅުވާލި ފުރުސަތުގެ ދަށުން ކޯސްތަކަށް އެދި އެޕްލިކޭޝަން ހުށަހެޅުމުގެ ފުރުސަތު އަންނަ އާދީއްތަ ދުވަހު ހުޅުވާލާނެއެވެ. މި ފުރުސަތު ހުޅުވާލައިފައިވަނީ 25 ޖުލައި 2023 އާ ހަމައަށެވެ.