ގައުމީ ޔުނިވަރސިޓީގައި 21 ދަރިވަރަކު ޑޮކްޓަރުކަން ކިޔަވާ ސަނަދު ހޯދައިފި
ދިވެހިރާއްޖޭގައި މެޑިސިން ރަސްމީކޮށް ކިޔަވައިދޭން ފެށީ 2020 ވަނަ އަހަރުގައި
މޯލްޑިވްސް ނޭޝަނަލް ޔުނިވަރސިޓީގެ 2024 ވަނަ އަހަރުގެ ގްރެޖުއޭޝަންގެ ތެރެއިން
ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ މެޑިކަލް ސްކޫލުގެ ފުރަތަމަ ބެޗުގެ ދަރިވަރުން ދަސްވެނިވެއްޖެއެވެ.
ބުރާސްފަތި ދުވަހު އެމްއެންޔޫގައި ބޭއްވި ދަސްވެނިވުމުގެ ހަފުލާގައި ކޯހުން ފުރިހަމައަށް ފާސްވެ ސްކޫލް އޮފް މެޑިސިންގެ 21 ދަރިވަރުން ވަނީ މެޑިކަލް ޑޮކްޓަރުކަން ހާސިލް ކޮށްފައެވެ.
ދިވެހިރާއްޖޭގައި މެޑިކަލް ތަޢުލީމު ފޯރުކޮށްދިނުމަށްޓަކައި، 2017 ވަނަ އަހަރު އެމްއެންޔޫގައި ސްކޫލް އޮފް މެޑިސިން ޤާއިމުކުރުމުގެ ހުއްދަ ޔުނިވަރސިޓީގެ ކައުންސިލުން ދީފައިވެއެވެ.
ސްކޫލް އޮފް މެޑިސިން އުފެއްދީ 2019 ވަނަ އަހަރުގައެވެ. އަދި ފުރަތަމަ ބެޗުގެ ދަރިވަރުން ކިޔަވަން ފެށީވެސް އެ އަހަރުގައެވެ. މަންހަޖު އެކުލަވާލެވިފައި ވަނީ މެލޭޝިއާގެ ޤައުމީ ޔުނިވަރސިޓީ، ޔުނިވަރސިޓީ ކެބަންގްސާން މެލޭޝިއާ (ޔޫކޭއެމް) އާ އެއްގޮތަށް ކަމަށް އެމްއެންޔޫއިން ބުނެފައިވެއެވެ.
ސްކޫލް އޮފް މެޑިސިންގެ ކްލާސްތައް ކުރިއަށް ގެންގޮސްފައި ވަނީ ދަރުމަވަންތަ ހޮސްޕިޓަލުގެ ދެވަނަ ފަންގިފިލާގައެވެ. ނަމަވެސް، ސްކޫލް އޮފް މެޑިސިންގެ ކަންކަން މުޅިން ފުރިހަމަ ކުރެވެންދެން، ފުރަތަމަ ބެޗުގެ ދަރިވަރުން ދެ މޮޑިއުލެއް މެލޭޝިއާގެ ޔުނިވަރސިޓީގައި ފުރިހަމަ ކުރަން ޖެހުނެވެ. ދިވެހިރާއްޖޭގައި މެޑިސިން ރަސްމީކޮށް ކިޔަވައިދޭން ފެށީ 2020 ވަނަ އަހަރުގައެވެ.
ދަސްވެނިވުމުގެ ރަސްމިއްޔާތުގައި ދަސްވެނިންނަށް ސަނަދު ހަވާލުކޮށް ދެއްވީ އެމްއެންޔޫގެ ޗަންސެލަރު ޑރ. މަހުމޫދު ޝައުގީއެވެ.
ދިވެހިރާއްޖޭގައި މެޑިކަލް ސްކޫލް ފުރިހަމަކުރި ފުރަތަމަ ބެޗުގެ ދަރިވަރުން ގްރެޖުއޭޓްވުމަކީ ޤައުމުގެ ޞިއްޙީ ދާއިރާގައި ވަރަށް މުހިންމު މަރުޙަލާއެއް ކަމުގައި އެމްއެންޔޫ އިން ފާހަގަކުރެއެވެ.
މޯލްޑިވްސް މެޑިކަލް އެންޑް ޑެންޓަލް ކައުންސިލުގައި ރަޖިސްޓަރީވެފައިވާ ޑޮކްޓަރުންނަށް ވުމަށްޓަކައި ގްރެޖުއޭޓްވި ފަރާތްތަކުން އިތުރު އެއް އަހަރު އިންޓަރންޝިޕް ފުރިހަމަކުރަންޖެހެއެވެ. ގްރެޖުއޭޓުވި ދަރިވަރުން މިހާރު ގެންދަނީ އިންދިރާ ގާންދީ މެމޯރިއަލް ހޮސްޕިޓަލް ގައި އިންޓަރންޝިޕް ފުރިހަމަކުރަމުން ކަމަށް މައުލޫމާތު ލިބިފައިވެއެވެ.
