11 އަހަރަށް ފަހު ބާސެލޯނާ ދޫކޮށްލަން ނިންމައި އެކަން ޑިފެންޑަރު ޖޯޑީ އަލްބާ އާއި ބާސެލޯނާއިން އިއުލާނުކޮށްފި އެވެ.
ނަމަވެސް 34 އަހަރުގެ ވާތު ބެކް ދެން ގުޅޭނީ ކޮން ކުލަބަކާކަމެއް އޭނާ ނުބުނެ އެވެ. އޭނާ ހޯދުމަށް ސައޫދީ އަރަބިއާގެ ބައެއް ކުލަބުތަކާއި އިޓަލީގެ އިންޓަމިލާނުން ދަނީ މަސައްކަތް ކުރަމުންނެވެ. މީގެ ތެރެއިން މިދިޔަ ސީޒަނުގައި ވެސް އިންޓައިން އޭނާ ގަތުމަށް ހުށަހެޅި އެވެ. އެކަމަކު ބާސެލޯނާއިން ނިންމީ އަލްބާގެ ނުގަބޫލުގައި އޭނާ ފޮނުވާނުލުމަށެވެ.
ބާސެލޯނާއިން މިއަދު ނެރުނު ބަޔާނުގައި ބުނެފައިވަނީ އެކުލަބާއެކު 2024ގެ ނިޔަލަށް އަލްބާ ހަދާފައިވާ ކޮންޓްރެކްޓް ނިމުމަކަށް ގެނައުމަށް ދެ ފަރާތުން އެއްބަސްވެފައިވާ ކަމަށެވެ. އަދި އަލްބާ ދެއްކި ޕްރޮފެޝަނަލް ކަމަށްޓަކައި އޭނާ އަށް ޝުކުރު އަދާކުރާ ކަމަށާއި ބާސެލޯނާ އަކީ އަބަދުވެސް އޭނާގެ ގެ ކަމަށް ބުނެފައިވެއެވެ.
ފްރީ ކުޅުންތެރިއެއްގެ ގޮތުގައި ބޭނުން ކުލަބަކަށް ދިއުމުގެ ފުރުސަތު ބާސެލޯނާއިން އޭނާ އަށް ދިނީ ކޮންޓްރެކްޓް ނިމެންދެން ކުލަބުގައި ހުންނަން ބޭނުންނަމަ މުސާރައިގެ 60 ޕަސެންޓް އުނިކޮށްދިނުމަށް އެދުމަށްފަހު އެވެ. އަލްބާ އަށް މިހާރު ވެސް ބާސެލޯނާއިން ގިނަ އަދަދެއްގެ ފައިސާ މުސާރައިގެ ގޮތުގައި ދޭން ޖެހިފައިވެ އެވެ. ނަމަވެސް މިފައިސާ ދޭނެ ގޮތަކާމެދު އަމަލުކުރާނެ ގޮތެއް ދެ ފަރާތުން ވެސް ނުބުނެ އެވެ. ނަމަވެސް ސްޕޭނުގެ ނޫސްތަކުން ބުނަނީ ބާސެލޯނާގެ މާލީ ހާލަތު ދަށްވެފައިވާތީވެ މުސާރައިގެ ވަރަށް ބޮޑު ބައެއް އަލްބާ ދޫކޮށްލާފައިވާ ކަމަށެވެ. ސަބަބަކީ ޔޫރަޕުގެ މުބާރާތްތަކުގައި ވާދަކުރުމަށާއި އަންނަ ސީޒަނަށް ޓީމު ވަރުގަދަ ކުރުމަށް މުސާރަ ބިލްކުޑަކޮށް، ފައިނޭންޝަލް ފެއާޕްލޭގެ އުސޫލުތަކަށް ފެތެން ބާސެލޯނާ އަށް މަޖުބޫރުވެފައިވާތީ އެކަމަށް އެހީތެރިވެދިނުމުގެ ގޮތުންނެވެ.
މުސާރަ ބޮޑުވުމުގެ އިތުރުން ބާސެލޯނާއިން އަލްބާ ދޫކޮށްލަން ބޭނުންވި ދެވަނަ ސަބަބަކީ އޭނާގެ މަގާމަށް ކުޅެން ޒުވާން ކުޅުންތެރިން ތިބުމުން މިހާރު ގަވާއިދުން ފުރަތަމަ 11ގައި ކުޅެން ނުލިބޭތީ އެވެ.
އަލްބާ އަކީ ބާސެލޯނާގެ ޔޫތު އެކަޑަމީން ތަމްރީނުވި ކުޅުންތެރިއެކެވެ. ނަމަވެސް އޭނާ ބާސެލޯނާގެ ސީނިއާ ޓީމަށް 2012 ވަނަ އަހަރު ގެނައީ ވެލެންސިއާގައި ހުއްޓައި 14 މިލިއަން ޔޫރޯ އަށެވެ. އެއަށް ފަހު އޭނާވަނީ މިދިޔަ 11 އަހަރު 450 މެޗު ކުޅެދީ ގިނަ ތަށިތަކެއް ހޯދައިދީފަ އެވެ.
އަލްބާ ބާސެލޯނާ ދޫކޮށްލާނެކަން އިއުލާކުރީ މި ސީޒަނަށްފަހު ކެޕްޓަން ސާޖިއޯ ބުސްކެޓްސް ވެސް ކުލަބާ ވަކިވާނެކަން އިއުލާނުކޮށްފައިވަނިކޮށެވެ.
