ޖަލުގައި ތިބޭ ގައިދީންނަށް އަނިޔާވެރިނުވާކަން ކަށަވަރުކުރަން: އިމްރާން
ޑްރަގް ރިހިބިލިޓޭޝަންގެ ޕްރޮގްރާމްތައް ހިންގުމާއި ކުށްވެރިން މުޖުތަމައަށް ނެރެވެން ހުރި ގޮތްތައް ބައްލަވާ ކަމަށް އިމްރާން ވިދާޅުވި
ހުޅުމާލެ ޖަލު
ޖަލުގައި ތިބޭ ގައިދީންތައް އަނިޔާވެރި ނުވާކަން ކަށަވަރުކުރާ ކަމަށާއި އެފަދަ މައްސަލަތަކަށް ޚާއްސަ ސަމާލުކަމެއް ދެއްވާ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
އިމްރާން އެފަދައިން ވިދާޅުވީ މަޖިލީހުގެ ކާށިދޫ ދާއިރާގެ މެންބަރު އަބްދުﷲ ޖާބިރު ކުރެއްވި ސުވާލަކަށް ޖަވާބުދެއްވަމުންނެވެ. ޖާބިރު ވަނީ ޖަލުތަކަކީ އަނިޔާވެރިތަނެއްގެ ގޮތުގައި ސިފަކުރައްވާފައެވެ. އޭނާ ވަނީ މާފުށީ ޖަލަކީ ކުށްވެރިންނާމެދު އެންމެ ރަނގަޅު ގޮތުގައި އަމަލުކުރެވޭ ތަނެއް ނޫން ކަމަށް ވެސް ވިދާޅުވެފައެވެ. އެހެންކަމުން ޖަލުތަކުގައި ހިނގާ އަނިޔާވެރި އަމަލުތައް ހުއްޓުވުމަށް ކުރަމުންދާ މަސައްކަތްތަކަކީ ކޮބާތޯ އޭނާ ވަނީ ސުވާލުކުރައްވައިފައެވެ.
އިމްރާން ވިދާޅުވީ ޖަލުގައި މީހަކަށް އަނިޔާކޮށްގެން ރިޕޯޓެއް އައިސްފައިވާނަމަ އެ މައްސަލަ އަމިއްލަފުޅަށް ވެސް ބައްލަވާ ކަމަށާއި ކަން ހިނގައިދިޔަ ގޮތުގެ އެންމެ ތަފްސީލީ މައުލޫމާތު ހޯއްދަވާ ކަަމަށެވެ. އަދި ކުށްވެރިންނާާމެދު އަނިޔާވެރި ކަމުގެ އަމަލެއް ހިންގައިފިނަމަ އެ އޮފިސަރުންނާމެދު ފިޔަވަޅުވެސް އަޅާފައިވާނެ ކަމަށް އެމަނިކުފާނު ވިދާޅުވިއެވެ.
މީގެ އިތުރުން ޑްރަގް ރިހިބިލިޓޭޝަންގެ ޕްރޮގްރާމްތައް ހިންގުމާއި ކުށްވެރިން މުޖުތަމައަށް ނެރެވެން ހުރި އެހެނިހެން ގޮތްތައް ބެއްލެވުމަކީ ވެސް ކުރައްވާ ކަމެއް ކަމަށް އިމްރާން ވިދާޅުވިއެވެ.
