ކިިމިކް ދޫކޮށްލުމަށް ބަޔާނުން އެއްވެސް މަޝްވަރާއެއް ނުކުރާނެ

ބަޔާން މިއުނިކަށް ކުޅެމުން އަންނަ ޖަރުމަނުގެ ޑިފެންސިވް މިޑްފީލްޑަރު ޔޯސުއާ ކިމިކް ދޫކޮށްލުމަށް އެ ކުލަބުން އެއްވެސް މަޝްވަރާއެއް ނުކުރާނެ ކަމަށް ޖަރުމަނުގެ މީޑިއާތަކުގައި ބުނެފިއެވެ.

ކިމިކް ހޯދުމަށް ސްޕެއިންގެ ބާސެލޯނާއިން ޝައުގުވެރިވާ ކަމަށާއި، އޭނާ ހޯދުމަށް ބާސެލޯނާއިން ބަޔާނާއެކު މަޝްވަރާ ކުރާނެކަމަށް މީޑިއާތަކުގައި ވަނީ އަޑު ފެތުރިފައެވެ. އެހެން ނަމަވެސް އުމުރުން 28 އަހަރުގެ ކުޅުންތެރިޔާ ދޫކޮށްލުމަށް ބަޔާނުން ބޭނުން ނުވާކަމަށާއި، އެކަމުގައި ބަޔާނުން އެއްވެސް ކުލަބަކާ މަޝްވަރާވެސް ނުކުރާނެކަމަށް ބުނެފައިވެއެވެ. ލައިޕްޒިގް ދޫކޮށް، ކިމިކް އެންމެ ފުރަތަމަ ބަޔާނަށް ބަދަލުވީ 2015 ވަނަ އަަހަރުއެވެ. އެ ކުލަބާއެކު އޭނާ ހެދި ފަސް އަހަރު ދުވަހުގެ އެއްބަސްވުމުގެ މުއްދަތު ހަމަވާން އޮތީ 2021 ވަނަ އަހަރެވެ. އެހެން ނަމަވެސް 2021 ވަނަ އަހަރުގެ އޯގަސްޓު މަހު އޭނާ ވަނީ ބަޔާނާއެކު އައު އެއްބަސްވުމެއްގައި ސޮއިކޮށްފައެވެ. ހަތަރު އަހަރަށް އެކުލަވާލި މި އެއްބަސްވުމުގެ މުއްދަތު ހަމަވާނީ 2025 ވަނަ އަހަރުއެވެ.

މީޑިއާތަކުގައި ބުނެފައިވާ ގޮތުން، ކިމިކްއަކީ ބަޔާންގެ އިސްވެރިން އެ ކުލަބުގައި ބަހައްޓަން ބޭނުންވާ ކުޅުންތެރިޔެެކެވެ. އަނެއްކޮޅުން 2025 ވަނަ އަހަރު މިހާރުގެ އެއްބަސްވުމުގެ މުއްދަތު ހަަމަވިނަަމަވެސް، ބަޔާނުން ދިގު މުއްދަތަކަށް އޭނާ ބަހައްޓަން ޝައުގުވެރިވާ ކަމަށްވެސް ވަނީ ބުނެފައެވެ. އަނެއްކޮޅުން ކިމިކްއަކީ ބަޔާންގެ އައު ކޯޗު ތޯމަސް ޓުޗެލް ވަރަށް ގަޔާވާ ކުޅުންތެރިޔެއް ކަމަށާއި، ޓުޗެލް އިސްކަންދޭ ކުޅުންތެރިންގެ ލިސްޓުގައިވެސް ކިމިކް ހިމެނޭކަމަށް ވަނީ ބުނެފައެވެ.

ކިމިކް ވަނީ މިހާތަނަށް ބަޔާނަށް 346 މެޗު ކުޅެދީ 40 ލަނޑު ޖަހައިފައެވެ. އޭނާ ވަނީ އެ ކުލަބާއެކު 19 ތައްޓެއް ކާމިޔާބުކޮށްފައެވެ. އޭގެތެރޭގައ ޖަރުމަނު ލީގު، ޖަރުމަނު ކަޕް، ޖަރުމަނު ސުޕަ ކަޕް، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ހިމެނެއެވެ. ބައެއް މެޗުތަކުގައި ކިމިކް ވަނީ ބަޔާންގެ ކެޕްޓަން ބޭންޑު އަޅައިގެންވެސް ކުޅެފައެވެ.