ޗަމްޕާ ބްރަދަރސްގެ ފަރާތުުން ހޯރަފުށީ އިންޓަރނޭޝަނަލް ޕްރީ ސްކޫލަށް 1.17 މިލިއަން ރުފިޔާގެ އެހީއެއް ދެއްވައިފިއެވެ.
މިއީ މަސްވެރިންގެ ދުވަހުގެ ރަސްމީ ޖަލްސާގައި ބައިވެރިވެވަޑައިގަތުމަށާއި، ހޯރަފުށީ އައިސް ޕްލާންޓް ހުޅުވުމުގެ ރަސްމިއްޔާތުގައި ބައިވެރިވެވަޑައިގެންނެވުމަށް ޗަމްޕާ ބްރަދަރސްގެ ޗެއަރމަން އުއްޗު ހޯރަފުއްޓަށް ކުރެއްވި ދަތުރުފުޅުގައި ހޯރަފުށީގެ ރައްޔިތުން އެމަނިކުފާނަށް ހުށަހެޅި ހުށަހެޅުންތަކެކެވެ.
އަދި ރައްޔިތުން ބޭނުންވިގޮތަށް އެ އެހީތެރިކަން ފޯރުކޮށްދެއްވާނެ ކަމަށް އުއްޗު ވިދާޅުވިއެވެ. ވައުދުވެވަޑައިގެންނެވިގޮތަށް ހޯރަފުށީ އިންޓަރނޭޝަނަލް ޕްރީ ސްކޫލް ތަރައްގީކުރުމަށް ބޭނުންވާ މާލީ އެހީ މީގެ ކުރިންވެސް ވަނީ ފޯރުކޮށްދެއްވާފައެވެ.
މީގެ އިތުރުން އާދިއްތަ ދުވަހުވެސް އުއްޗުގެ ފަރާތުން ވަނީ ހޯރަފުށީ ކައުންސިލާ އިތުރު އެހީ ހަވާލުކޮށްދެއްވާފައެވެ. މިކަމަށްޓަކައި ބޭއްވި ރަސްމިއްޔާތުގައި އުއްޗުގެ ފަރާތުން ހޯރަފުށީ ކައުންސިލާ މި ތަކެތި ހަވާލުކޮށްދެއްވީ، ދަރިކަނބަލުން، ސާރާ މުހައްމަދު މޫސާއެެވެ. ހޯރަފުށީ ކައުންސިލްގެ ފަރާތުން މި ތަކެއްޗާ ހަވާލުވެވަޑައިގަތީ ކައުންސިލްގެ ރައީސް، މުހައްމަދު ވަހީދެވެ.
އުއްޗުގެ ފަރާތުން ވަނީ ހޯރަފުށީ އިންޓަރނޭޝަނަލް ޕްރީ ސްކޫލަށް 1،171،558 (އެއްމިލިއަން އެއްލައްކަ ހަތްދިހައެއްހާސް ފަސްސަތޭކަ ފަންސާސް އަށެއް) ރުފިޔާގެ އެހީ ދީފައެވެ. މީގެތެރެއިން ބައެއް މާލީ އެހީގެގޮތުގައި، އަދި އަނެއްބައި ތަކެތީގެގޮތުގައި ވަނީ ހަދިޔާކުރައްވާފައެވެ. މިގޮތުން ތަކެތީގެ ގޮތުގައި ހަދިޔާކުރައްވާފައިވަނީ ސްކޫލަށް ބޭނުންވާ ފަރުނީޗަރާއި، އޮފީސް އިކުއިޕްމެންޓާއި، ކުދިން ކުޅެއުޅޭ ޕްލޭގްރައުންޑަށް ބޭނުންވާ ތަކެއްޗެވެ.
މި ރަސްމިއްޔާތުގައި ވާހަކަފުޅުދައްކަވަމުން ކައުންސިލްގެ ރައީސް ވަނީ, އުއްޗުގެ ފަރާތުން ހޯރަފުށީ އިންޓަރނޭޝަނަލް ޕްރީސްކޫލަށް ވެދެއްވާފައިވާ އެހީއަށްޓަކައި ޝުކުރު އަދާކުރައްވާފައެވެ. އަދި ހޯރަފުށީ ރައްޔިތުންގެ ފަރާތުން ވަނީ ޗަމްޕާ ބްރަދަރސްގެ ޗެއަރމަން ހޯރަފުއްޓަށް ކޮށްދެއްވާ ޚިދުމަތްތަކަށްޓަކައި ޝުކުރު ދަންނަވައި ހަނދާނީ ފިލައެއް އަރުވާފައެވެ. މި ހަނދާނީ ފިލާ ހަވާލުކޮށްދެއްވީ ހޯރަފުށީ ދާއިރާގެ މެމްބަރު، އަހުމަދު ސަލީމެވެ. މި ފިލައާ ހަވާލުވެވަޑައިގެންނެވީ އުއްޗުގެ ދަރިކަނބަލުން، ސާރާއެވެ.
ހޯރަފުށީ އިންޓަނޭޝަނަލް ޕްރީސްކޫލުގެ އަމަލީ މަސައްކަތް މިހާރު ވަނީ ފަށާފައެވެ. މިއީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ އިޖުތިމާއީ އާއްމު ޒިންމާގެ ދަށުން އަޅާ ސްކޫލެކެވެ. އެ ސްކޫލުގެ ބިންގާ އަޅާފައިވަނީ 2022 މާޗު 31 ވަނަ ދުވަހުއެވެ.
