ހޯރަފުށީ އެއަރޕޯޓު އިންޓަނޭޝަނަލް ފެންވަރަށް ތަރައްގީކޮށް، އިތުރު ކުރިއެރުންތައް ހޯދުމަށް ރައީސް ޞާލިހަށް ދެވަނަ ދައުރެއް ދޭން ޖެހޭ: ކައުންސިލްގެ ރައީސް
ހޯރަފުށީގެ ރައްޔިތުން ނިންމާނީ ހޯރަފުއްޓަށް އެންމެ ފައިދާގޮތް
ހޯރަފުށީ ކައުންސިލްގެ ރައީސް މުހައްމަދު ވަހީދު ވާހަކަ ދައްކަވަނީ
ހޯރަފުށީ އެއަރޕޯޓު އިންޓަނޭޝަނަލް ފެންވަރަށް ތަރައްގީކޮށް، އިތުރު ކުރިއެރުންތައް ހޯދުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހަށް ދެވަނަ ދައުރެއް ދޭން ޖެހޭ ކަމަށް ހޯރަފުށީ ކައުންސިލްގެ ރައީސް މުހައްމަދު ވަހީދު ވިދާޅުވެއްޖެއެވެ.
ހުކުރު ދުވަހުގެ ރޭ ހޯރަފުށީ އެއަރޕޯޓަށް ރޭގަނޑު ދަތުރުތައް ފެށުމަށްފަހު، ބޭއްވި ރަސްމީ ޖަލްސާގައި ވަހީދު ވިދާޅުވީ މި އެއަރޕޯޓަކީ ރައީސް ސާލިހުގެ ވެރިކަމުގައި އަޅުއްވައިދެއްވި ފުރަތަމަ އެއަރޕޯޓު ކަމަށާއި، މި އެއަރޕޯޓު ގާއިމްކޮށްދިނުމަށް މިސަރުކާރުން 200 މިލިއަން ރުފިޔާ ހޭދަކޮށްފައިވާ ކަމަށެވެ. ރޭގަނޑުގެ ދަތުރުތައް ފެށުމަށްޓަކައި މިސަރުކާރުން 15 މިލިއަން ރުފިޔާ ހޭދަކޮށްފައިވާ ކަމަށް ވަހީދު ވިދާޅުވިއެވެ. އަދި ވިދާޅުވީ ކޮންމެ ރައްޔިތެއް ވެސް މިއުފާވެރިކަމާއި ނަފާވެރިކަން އަދި މިހިތްފަސޭހަ ކަމާއި ލުއި ފަސޭހަކަން ލިބުނީ ކީއްވެގެންތޯ ސުވާލުކޮށްލަން ޖެހޭ ކަމަށެވެ.
ރައީސް ސާލިހަށް ދެވަނަ ދައުރެއް ދޭން ޖެހޭކަން ފާހަގަކުރައްވައި ވަހީދު ވިދާޅުވީ ހޯރަފުށީގެ ރައްޔިތުން ނިންމާނީ ހޯރަފުއްޓަށް އެންމެ ފައިދާގޮތް ކަމަށާއި، ހޯރަފުށީގެ ކުރިއެރުމާއި ތަރައްގީ ނުލިބޭނެ ގޮތަކަށް މިރަށުގެ ރައްޔިތުން އެއްވެސް ނުނިންމެއް ނުނިންމާނެ ކަމަށެވެ. އެއަރޕޯޓު އިންޓަނޭޝަނަލް ކުރުމާއި، ވަޒީފާގެ ފުރުސަތުތައް އިތުރަށް ފަހިކުރުމަށް ރައީސް ސާލިހަށް ތާއީދުކުރަންޖެހޭ ކަމަށް ވަހީދު ވިދާޅުވިއެވެ. އަދި ވިދާޅުވީ ރައީސް ސާލިހަށް ކުރިއަށް އޮތް ރިޔާސީ އިންތިޚާބުގައި ހޯރަފުށީ ފުރިހަމަ ތާއީދު ދެއްވުމަކީ މިރަށަށްޓަކައި ނިންމާނެ އެންމެ މުހިންމު ނިންމުން ކަމަށެވެ.
ދަތުރުފަތުރުކުރުމުގައި މީގެކުރިން ދިވާމި ދަތިތަކަށް އިޝާރާތް ކުރައްވައި ވަހީދު ވިދާޅުވީ އެއަރޕޯޓާއެކު މިއަދު ރައްޔިތުން އެދަތިކަމުން ހަނދާންނެތިފައިވާ ކަމަށެވެ.
ވަހީދު ވިދާޅުވީ ނިމިދިޔަ ބައިލައްކައެއްހާ އަހަރުގެ ތެރޭގައި އެއްވެސް ވެރިއެއް އެރަށަށް ތަރައްގީ ގެނެސްދެއްވި ނަމަ މިއަދު މި ހުރިހާ ތަރައްގީގެ މަޝްރޫއުތައް ކުރިއަށް ގެންދަން ނުޖެހޭނެ ކަމަށެވެ. އަދި ވިދާޅުވީ ހޯރަފުށީގެ އަޑިގުޑަން މަގުތަކާއި، ޒުވާނުން ބޭނުންވާ ގިނަގުނަ މަޝްރޫއުތައް ކުރިއަށް ގެންދާކަން ވަހީދު ފާހަގަކުރެއްވިއެވެ.
