ރާއްޖެއަކީ އެކުވެރިކަމާއި ހަމަޖެހުމާއެކު ތަރައްޤީގެ މިސްރާބުގައި ކުރިއަށްދާ ޤައުމެއްކަން ކަށަވަރުކޮށްދެއްވާނަން - ރައީސް

މާތް ﷲގެ އިރާދަފުޅާއެކު ދިވެހިރާއްޖެއަކީ އަޅުގަނޑުމެން އެދޭ ފަދަ އެކުވެރިކަމާއި، ހަމަޖެހުމާއެކު ތަރައްޤީގެ މިސްރާބުގައި ކުރިއަށްދާ ޤައުމެއްކަން ކަށަވަރުކޮށްދެއްވާނެ ކަމުގެ ޔަޤީންކަން، ރައީސް ޑރ. މުޙައްމަދު މުޢިއްޒު ދެއްވައިފިއެވެ.

މި ފަދައިން ޔަޤީންކަން ދެއްވައި، ރައީސް ވާހަކަފުޅުދައްކަވާފައި ވަނީ ތިލަދުންމަތީ އުތުރުބުރީގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި އެ އަތޮޅު ހޯރަފުއްޓަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައެވެ.

ކޮންމެ ދިވެހި ރައްޔިތެއްގެ އަޒުމަކަށް ވާންވީ، ޤައުމުގެ ތަރައްޤީގެ ކަންކަމުގައި އެކަތިގަނޑަކަށްވުން ކަމުގައި ވިދާޅުވެ، ވާހަކަފުޅު ކުރިއަށްގެންދަވަމުން ރައީސް ވަނީ، ޤައުމަށް އަންނަ ކޮންމެ ތަރައްޤީއަކީ ތިބާއަށް ލިބޭ އުފަލަކާއި ފަޚްރެއް ކަމުގައި ޤަބޫލުކުރެއްވުމަށް އެދިވަޑައިގެންފައެވެ. ކޮންމެ ރައްޔިތަކީވެސް ޤައުމު ދެކެ ލޯބިވާ، ޤައުމު އިސްކުރާ، ޤައުމީ މީހަކަށް ވުމަށް އެ މަނިކުފާނު ވަނީ ގޮވާލައްވައިފައެވެ. ޙަޤީޤީ މާނައިގައި ޤައުމު ކުރިއަރައި ދާނީ، މި ފަދައިން ޤައުމީ ލޯތްބާއެކު ގުޅި، ލާމެހިގެންދާ ހިސާބުން ކަމުގައި ރައީސްގެ ވާހަކަފުޅުގައި ފާހަގަކުރެއްވިއެވެ. އަދި ދިވެހިންނަށް ފުރިހަމަ ކާމިޔާބީތަކެއް ލިބެން އޮތީ، އެ ހަމަޖެހުމާއި އެއްބައިވަންތަކަން ޤާއިމުކުރެވިގެން ކަމުގައި ރައީސް ވިދާޅުވިއެވެ.

މިއަދާ ހަމައަށް އައިއިރުވެސް ޤައުމުގައި ހަމަޖެހުން އޮތްކަން ފާހަގަކުރައްވައި، އެކަން އެގޮތުގައި ދެމި އޮތުމަށް އެދިވަޑައިގަންނަވާ ކަމުގައި ރައީސް ވިދާޅުވިއެވެ. ދިވެހި ރައްޔިތުންގެ އެއްބާރުލެއްވުމާއެކު، ކުރިއަށް އޮތް ދުވަސްތަކުގައި ވަށާޖެހޭ ތަރައްޤީއެއް ހޯއްދަވައިދެއްވޭނެކަމުގެ ޔަޤީންކަން އެބައޮތް ކަމުގައިވެސް އެ މަނިކުފާނު ވިދާޅުވިއެވެ. ކަންކަމާ މެދު ވިސްނާ ވިސްނުން ތަރައްޤީވާންޖެހޭ ކަމަށާ، އެއީ އަޅުގަނޑުމެންގެ ޒިންމާއަކަށް ހަދަންޖެހޭ ކަމުގައި ރައީސް ވިދާޅުވިއެވެ.

މި މޭރުމުން ޤައުމު ތަރައްޤީ ކުރުމުގައި އެކަތިގަނޑަކަށް ވުމަކީ، ދިވެއްސަކަށް ވީތީ، ދިވެހި ޤައުމުދެކެ ފަޚްރުވެރިވާ ހާލު ކުރަންޖެހޭ ކަމެއް ކަމުގައި ރައީސް ވިދާޅުވިއެވެ. ދެން ހުރި ޚިޔާލުތައް އަންނަންވީ އޭގެ ފަހަތަށް ކަމަށާއި، އެއީ ސިޔާސީ ގޮތުން ކަމުގައި ވިޔަސް، ނުވަތަ އެހެން މައުޟޫއަކަށް ކަމުގައި ވީ ނަމަވެސް، އަދި ޚިޔާލު ތަފާތުވުން ކަމުގައި ވީ ނަމަވެސް، އެ ކަމެއް އަންނަންވީ އެއަށް ފަހުގައި ކަމަށް ރައީސް ވިދާޅުވިއެވެ. މިއީ ޤައުމަށްޓަކައި ކޮށްދެވޭނެ ކަމެއްގެ ގޮތުގައި ރައީސް ވަނީ ސިފަކުރައްވާފައެވެ.

ޤާނޫނު އަސާސީއިން ކަށަވަރުކޮށްދޭ ޙައްޤުތަކަކީ ކޮންމެ ރައްޔިތަކަށްވެސް ލިބިގެންވާ ޙައްޤެއް ކަމަށާ، އަދުގެ ސަރުކާރުން ފުރިހަމަ ޔަޤީންކަމާއެކު އެ ޙައްޤުތައް ފޯރުކޮށްދެއްވާނެ ކަމުގައި ރައީސް ވިދާޅުވިއެވެ. ޤާނޫނުން މަނާ ނުކުރާ ކޮންމެ ކަމެއް ކުރުމުގެ ފުރުޞަތު ކޮންމެ ރައްޔިތަކަށްވެސް ދެއްވާނެ ކަމަށާ، ޤާނޫނުގެ ބޭރުން ކަމެއް ކުރުމަކީ އެއްވެސް މީހަކަށް އޮތް ޙައްޤެއް ނޫން ކަމުގައި އެ މަނިކުފާނު ހަނދުމަކޮށްދެއްވިއެވެ.