ހޯރަފުށީ ދުވަހުގެ ރަސްމީ ޖަލްސާ ޝަރަފްވެރި ކޮށްދެއްވުމަށް، ރައީސް ޞާލިހް ހއ. ހޯރަފުއްޓަށް ފުރާވަޑައިގެންފި

"ހޯރަފުށީ ދުވަސް" ފާހަގަކުރުމުގެ ގޮތުން ބާއްވާ ޚާއްސަ ރަސްމީ ޖަލްސާ ޝަރަފްވެރި ކޮށްދެއްވުމަށް ކުރީގެ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ހއ. ހޯރަފުއްޓަށް ފުރާވަޑައިގެންފިއެވެ.

ރައީސް ޞާލިހްގެ މި ދަތުރުފުޅަކީ ހޯރަފުށީ ކައުންސިލްްގެ ޚާއްސަ ދައުވަތަކަށް ކުރައްވާ ދަތުރުފުޅެކެވެ.

ހޯރަފުށީ ދުވަސް ކުލަގަދަކޮށް ފާހަގަކުރުމަށްޓަކާ އެރަށު ކައުންސިލާއި ރައްޔިތުން ގުޅިގެން ވަރަށް ފުރިހަމައަށް ތައްޔާރުވަމުން އަންނަކަމަށް މައުލޫމާތު ލިބެއެވެ. ހޯރަފުށީ ދުވަހުގެ ނަމުގައި ހާއްސަ ދުވަހެއް ފާހަގަކުރުމުގެ މައިގަނޑު މަގުސަދަކީ އެރަށަށް ޝަރަފްވެރި ހިދުމަތްތަކެއް ކޮށްދެއްވި ފަރާތްތަކާއި ރަށަށް ރީތި ނަމާއި ޝަރަފް ހޯދައިދެއްވި ފަރާތްތަކުގެ އަގުވަޒަންކުރުން ކަމުގައި ހއ. ހޯރަފުށި ކައުންސިލުން މައުލޫމާތު ދީފައިވެއެވެ.

މި އަހަރުގެ ހޯރަފުށީ ދުވަސް ފާހަގަކުރުމުގެ ގޮތުން ބާއްވާ ހާއްސަ ޖަލްސާގައި ތަފާތު 11 ދާއިރާއަކުން ހިދުމަތްތެރީންގެ އަގުވަޒަންކުރުމުގެ ގޮތުން ތަފާތު 5 އެވޯޑެއް ދިނުމަށް ހަމަޖެހިފައިވެއެވެ. މިގޮތުން މި އަހަރުގެ ޖަލްސާގައި 88 ފަރާތަކަށް އެވޯޑް ދިނުމަށް ހަމަޖެހިފައިވާއިރު، މި ފަރާތްތަކުގެ ތެރޭގައި ތަޢުލީމު، ސިއްޙަތު، ކުޅިވަރު، އިޖުތިމާޢީ ހިދުމަތް، ވިޔަފާރި އަދި ދީނީ ދާއިރާގައި ހިދުމަތް ކޮށްދީފައިވާ ފަރާތްތައް ހިމެނެއެވެ.

މީގެ ކުރިން 2022 ވަނަ އަހަރުގައި ވެސް ހޯރަފުށީ ދުވަސް ފާހަގަކުރުމުގެ ގޮތުން ހާއްސަ ޖަލްސާއެއް ބާއްވާފައިވެއެވެ. އެ ޖަލްސާގައި ހޯރަފުއްޓަށް އެކި ދާއިރާތަކުން ހިދުމަތް ކޮށްދީފައިވާ 91 ފަރާތަކަށް އެވޯޑް ދެއްވާފައިވެއެވެ. މި ޙަރަކާތަކީ ރަށުގެ ތަރައްގީއަށް ކޮށްދެވޭ ޚިދުމަތްތަކުގެ އަގުވަޒަންކުރުމުގެ ގޮތުން ކައުންސިލުން ފެށި ވަރަށް ފާހަގަކޮށްލެވޭ ޙަރަކާތެކެވެ.

ރައީސް ޞާލިހްގެ ވެރިކަމުގައި ހޯރަފުށީގައި ތަރައްގީގެ އިންގިލާބީ މަސައްކަތްތަކެއް ފައްޓަވައި ގިނަ މަސައްކަތްތައް ނިންމަވާފައިވެއެވެ. އެގޮތުން ހޯރަފުށީ އެއަރޕޯޓެއް އެޅުމަކީ އެންމެ ބޮޑު ހުވަފެނެއް ކަމުގައިވި ކަމެއް ހަގީގަތަކަށް ހަދައިދެއްވިއެވެ. މީގެ އިތުރުން މަގުތައް ޒަމާނީ ފެންވަރަށް ހެދުމުގެ މަސައްކަތް ފައްޓަވައި ޖުމްލަ 11 މަގެއް ނިންމަވާދެއްވިއެވެ.

ހޯރަފުށީ އެއަރޕޯޓު ބޭނުންކުރާ އެހެން ރަށްތަކުގެ މީހުންނަށް ލަފާފުރުމުގެ ފަސޭހަކޮށްދިނުމުގެ ގޮތުން އެއަރޕޯޓް ހިމެނޭ ސަރަހައްދުގައި ވަކި ޖެޓީއެއް ގާއިމްކުރައްވާފައިވެއެވެ. މިއީ އެ ސަރަހައްދުގެ ރަށްރަށުގެ ރައްޔިތުންނަށް ލިބުނު ވަރަށް ބޮޑު ފަސޭހަކަމެކެވެ.

މީގެ އިތުރުން ރައީސް ޞާލިހްގެ ވެރިކަމުގައި ހޯރަފުށީގައި އައިސް ޕްލާންޓެއް، ޖުވެނައިލް ޖަސްޓިސް ބިލްޑިންގެއް، ވޮލީ ކޯޓެއް، ފުޓުބޯޅަދަނޑެއް، ކޯޓުގެ އާ އިމާރާތެއް، ޕްރީ ސްކޫލެއް، 3 ޕާކެއް އަދި ފެރީ ޓާމިނަލް އެއް އިމާރާތްކުރައްވާފައިވެއެވެ. މި ހުރިހާ މަޝްރޫޢުތަކަކީ ހޯރަފުށީ ރައްޔިތުންގެ ދިރިއުޅުމުގެ ފެންވަރު ރަނގަޅުކުރުމަށް ކޮށްދެއްވި ވަރަށް މުހިއްމު ޚިދުމަތްތަކެކެވެ.

ނަމަވެސް އެމްޑީޕީގެ ނިމިދިޔަ ވެރިކަމުގައި ހޯރަފުށީގައި ފަށައިގެން ބާރު ސްޕީޑުގައި ކުރިޔަށް ދިޔަ އެތައް މަޝްރޫޢެއް މިހާރުގެ ސަރުކާރުން ހުއްޓާލާފައިވެއެވެ. އޭގެ ތެރޭގައި ވެރިކަން ނިމުނު އިރު ނިމެން ކައިރިވެފައިވާ ބިއްލޫރި ފުޅީގައި ބޯފެން ބަންދުކުރާ ބޮޓެލިން ޕްލާންޓް، ކައުންސިލް އޮފީހުގެ އާ އިމާރާތް، ފެނަކަ އޮފީހާއި ހޯރަފުށީގައި ގާއިމްކުރާ އާ ހޮސްޕިޓަލުގެ މަސައްކަތް ހިމެނެއެވެ. މި މަޝްރޫޢުތައް ހުއްޓުމަކީ ހޯރަފުށީ ރައްޔިތުންނަށް ލިބުނު ވަރަށް ބޮޑު ދެރައެއް ކަމުގައި ރައްޔިތުން ފާހަގަކުރެއެވެ.

ރައީސް ޞާލިހް ހޯރަފުއްޓަށް ކުރައްވާ ދަތުރުފުޅު ނިންމާލެއްވުމަށްފަހު މާލެ ވަޑައިގަތުމަށް ހަމަޖެހިފައިވަނީ ހުކުރު ދުވަހުގެ ހެނދުނުގައި ކަމަށް މައުލޫމާތު ލިބެއެވެ. ހޯރަފުށީ ދުވަހުގެ ރަސްމީ ޖަލްސާގައި ރައީސް ޞާލިހް ބައިވެރިވެވަޑައިގަތުމަކީ އެ ރަށުގެ ރައްޔިތުންނަށް ލިބޭ ވަރަށް ބޮޑު ޝަރަފެއް ކަމުގައި ރައްޔިތުން ދެކެއެވެ.