ތިލައުތުރު އެވޯޑް ދިނުމުގެ ޖަލްސާގައި ބައިވެރިވެވަޑައިގަތުމަށް ރައީސް ނަޝީދު ހއ. ދިއްދޫއަށް
21 މެއި 2023 | އާދީއްތަ 06:52ޖަލްސާ އޮންނާނީ މިރޭ ހއ.އަތޮޅު ކައުންސިލްގެ އިދާރާގައި
ރައީސް މުހައްމަދު ނަޝީދު
ތިލައުތުރު އެވޯޑް ދިނުމުގެ ރަސްމީ ޖަލްސާގައި ބައިވެރިވެވަޑައިގަތުމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ހއ. ދިއްދޫއަށް، އާދިއްތަ ދުވަހު ފުރާވަޑައިގަންނަވާނެއެވެ.
މަޖިލީހުގެ މީޑިއާ ޑިރެކްޓަރު ހަސަން ޒިޔާއު ވިދާޅުވީ ރައީސް ނަޝީދު ދިއްދޫއަށް ފުރާވަޑައިގަންނަވާނީ އާދިއްތަ ދުވަހުގެ މެންދުރު ކަމަށެވެ.
ތިލައުތުރު އެވޯޑްގެ ހަފްލާ ބާއްވަނީ ހއ.އަތޮޅު ކައުންސިލްގެ އިދާރާ އިންނެވެ. އެވޯޑް ދިނުމުގެ ހަފުލާ ބޭއްވުމަށް ހަމަޖެހިފައިވަނީ މެއި މަހުގެ 21 ވާ އާދީއްތަ ދުވަހުގެ ރޭ 09:00 ގައި ހއ.އަތޮޅު ކައުންސިލްގެ އިދާރާގައެވެ.
މި އެވޯޑަކީ އެކި ދާއިރާތަކުން ފާހަގަކުރެވޭފަދަ އަގުހުރި ޚިދުމަތްތަކެއް ހއ.އަތޮޅަށް ކޮށްދެއްވާފައިވާ ފަރާތްތަކާއި، މި ނޫނަސް ތަފާތު ފަންނުތަކުން ފާހަގަކޮށްލެވޭފަދަ އަގުހުރި ޚިދުމަތްތަކެއް ކޮށްދެއްވާފައިވާ ފަރާތްތަކާއި, ހއ.އަތޮޅުގެ ސްކޫލް, މަދަރުސާތަކުން ފަޚުރުވެރި ވަނަތައް ހޯދާފައިވާ ދަރިވަރުންނާއި، އަތޮޅަށް އެންމެ ޚިދުމަތްތެރި ރިޒޯޓަކާއި، އަތޮޅުގެ އެންމެ ހިންގުންތެރި ރަށު ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީއަކާއި، ކްލަބު ޖަމްޢިއްޔާއެއް ފާހަގަކޮށް އެފަރާތްތަކުގެ އަގު ވަޒަންކުރުމުގެ ގޮތުން ދިނުމަށް ނިންމާފައިވާ އެވޯޑެކެވެ.
