ތިން ބައިކުޅަ އެއް ބައި މެމްބަރުންގެ ސޮޔާއެކު، ދައުރުން ބޭރުން މަޖިލީހުގެ ޖަލްސާތަކެއް ބާއްވައިދިނުމަށް ހުށަހަޅައިފި
މަޖިލީހުގެ ދާއިމީ ކޮމިޓީތައް މެދުނުކެނޑި ހިންގުމުގެ މައްސަލާގައި ބާއްވަންޖެހޭ ޖަލްސާއެއްނަމަ ބޭއްވުމަށް ވަނީ އެދިވަޑައިގެންފައި
މުހައްމަދު ނަޝީދު - ރައްޔިތުންގެ މަޖިލީހުގެ ރައީސް
ތިން ބައިކުޅަ އެއް ބައި މެމްބަރުންގެ ސޮޔާއެކު، ދައުރުން ބޭރުން މަޖިލީހުގެ ޖަލްސާތަކެއް ބާއްވާދިނުމަށް ހުށަހަޅައިފިއެވެ.
އެމްޑީޕީގެ ޕީޖީ ގްރޫޕްގެ ލީޑަރު މުހައްމަދު އަސްލަމް، މަޖިލީހުގެ ރައީސް މުހައްމަދު ނަޝީދަށް އެޑްރެސްކުރައްވައި ބުރާސްފަތި ދުވަހު ފޮނުއްވި ސިޓީފުޅެއްގައި، މަޖިލީހުގެ ދައުރު ނިންމާލިއިރު މަޖިލީހުގައި މުހިންމު މަސައްކަތްތަކެއް ނުކުރެވި ހުރިކަމަަށް ވަނީ ވިދާޅުވެފައެވެ. ޚާއްސަކޮށް މަޖިލީހުގެ ކޮމިޓީތައް ހިންގުން ހުއްޓިފައި އޮތުމުން، އެ ސިޓީފުޅުގައި އަސްލަމް ވަނީ އެކަމުގެ ކަންބޮޑުވުން ފާޅުކުރައްވާފައެވެ.
މީގެ އިތުރުން 22 ޖޫން ވީ ބުރާސްފަތި ދުވަހު ބޭއްވި ޖަލްސާއަށް މަޖިލީހުގެ އެޖެންޑާގައި ހިމެނުމަަަށް މަޖިލީހުގެ ގަވާއިދުގައި ލާޒިމްކުރާ ކަންކަން ހިމަނާފައި ނުވާކަމަށް، އެ ސިޓީފުޅުގައި ވެއެވެ. އެހެންކަމުން މަޖިލީހުގެ ގަވާއިދުގެ 45 ވަނަ މާއްދާގެ (ރ)ގެ ދަަށުން، ދައުރުން ބޭރުން ޖަލްސާތަކެއް ބޭއްވުމަށް ވަނީ އެދިވަޑައިގެންފައެވެ. އެ ސިޓީފުޅު ހުށަހަޅުއްވާފައި ވަނީ މަޖިލީހުގެ ތިން ބައިކުޅަ އެއް ބައި މެމްބަރުންގެ ސޮޔާއެކުގައެވެ. އެހެންކަމުން މަޖިލީހުގެ ގަވާއިދާ އެއްގޮތަށް 14 ދުވަހުގެ ތެރޭގައި އެ ޖަލްސާތައް ބޭއްވުން ލާޒިމްކުރާކަމަށް އެމްޑީޕީން ވަނީ ބުނެފައެވެ.
އެގޮތުން އެ ސިޓީގައި 3 ކަމަކަށް އެދިފައިވެއެވެ. އެއީ
1. މަޖިލީހުގެ ދާއިމީ ކޮމިޓީތައް މެދުނުކެނޑި ހިންގުމުގެ މައްސަލައިގައި ބާއްވަންޖެހޭ ޖަލްސާއެއްނަމަ ބޭއްވުން
2. މަޖިލީހުގެ ގަވާއިދަށް އިސްލާހު ގެނައުމަށް ބާއްވަންޖެހޭ ޖަލްސާއެއްނަމަ ބޭއްވުން
3. މަޖިލީހުގެ ރައީސާއި ނާއިބު ރައީސްގެ އިތުބާރު ނެތްކަމުގެ މައްސަލާގައި ބާއްވަންޖެހޭ ޖަލްސާއެއްނަމަ ބޭއްވުން
މަޖިލީހުގެ ގަވާއިދުގެ 45 ވަނަ މާއްދާގެ (ރ)ގައި ބުނެފައިވަނީ، ރައްޔިތުންގެ މަޖިލީހުގެ ދައުރުންް ބޭރުން ޖަލްސާއެއް ނުވަތަ ޖަލްސާތަކެއް ބާއްވަން ރައްޔިތުންގެ މަޖިލީހުގެ (1/3) ތިންބައިކުޅައެއްބައި މެމްބަރުން (ސަބަބު ބަޔާންކޮށް) ސޮއިކޮށް ރައްޔިތުންގެ މަޖިލީހުގެ ރައީސަށް ހުށަހަޅައިފިނަމަ އެ ގަވާއިދުގެ އެހެން މާއްދާއެއްގައި އެހެން ގޮތަކަށް ބަޔާންކޮށްފައި ވީނަމަވެސް، އެ ޖަލްސާއެއް ނުވަތަ ޖަލްސާތަކެއް ބާއްވަންވާނެ ކަމަށެވެ. އެގޮތުން އެ ހުށަހެޅުން ހުށަހަޅާތާ 14 (ސާދަ) ދުވަހުގެ ތެރޭގައި އެ ޖަލްސާ ބޭއްވޭނެ ގޮތެއް ހަމަޖައްސައި، އެ ޖަލްސާ ނުވަތަ ޖަލްސާތައް މަޖިލީހުގެ ރައީސް ބާއްވަންވާނެ ކަމަށް ވަނީ ބުނެފައެވެ. އެ މާއްދާގެ ބޭނުމަށް (14) ސާދަ ދުވަސް ގުނާނީ ބަންދު ދުވަސްތައް ހިމަނައިގެން ކަމަށްވެސް އެ މާއްދާގެ (ރ)ގައި ވަނީ ބުނެފައެވެ.
މަޖިލީހުގައި އަޅުވާފައިވާ މަރުތަޅު ނެއްޓޭނެގޮތަށް ފަސް ކަމެއް އެޖެންޑާކޮށް، ބުރާސްފަތި ދުވަހު ޖަލްސާ ކުރިއަށްގެންދިއުމަށް އެމްޑީޕީގެ ޕީޖީ ލީޑަރު މުހައްމަދު އަސްލަމް ވަނީ ބުރާސްފަތި ދުވަހު ހެނދުނު އިތުރު ސިޓީފުޅެއް ފޮނުއްވާފައެވެ.
އެ ސިޓީގައި މަޖިލީހުގެ ދާއިމީ ކޮމިޓީތައް އެކުލަވާލުމުގެ މައްސަލައިގެ އިތުރުން، ރިފްއަތާއި ޝާހިދުގެ އިތުބާރު ނެތްކަމުގެ މައްސަލައާއި، މަޖިލީހުގެ ގަވާއިދަށް އިސްލާހު ގެނައުމުގެ މައްސަލައާއި، އީސީއަށް މެންބަރަކު އައްޔަނުކުރުމުގެ މައްސަލައާއި، މަޖިލީހުގެ ރައީސާއި ނާއިބު ރައީސްގެ އިތުބާރު ނެތްކަމުގެ މައްސަލަ ކުރިއަށް ގެންވެންދެން މަޖިލީހުގެ މި ދައުރު ކުރިއަށް ގެންދެވުމަށް ފުރުސަތަކަށް އެދިވަޑައިގެންނެވިއެވެ.
