ރައްޔިތުންގެ ތަނަވަސްކަން އިތުރުވާނީ ބަޖެޓް ސާޕްލަސް އާއި ރިޒާޒް އިތުރު ކުރެވި ދަރަނި ކުޑަކުރެވިގެން
އެމްޑީޕީ ޖަލްސާގައި ކުރީގެ ރައީސް މުހައްމަދު ނަޝީދު ވާހަކަ ދައްކަވަނީ
ތަރައްގީގެ ނަމުގައި ރާއްޖޭގައި ހިންގާ އުމްރާނީ ހުރިހާ މަސައްކަތްތަކެއް ހަތަރު ފަސް އަހަރަށް ހުއްޓައިލަން މުހިއްމު ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެކްސްގައި ކުރެއްވި ޕޯސްޓެއްގައި ހުކުދު ދުވަހު އެ މަނިކުފާނު ވިދާޅުވީ ކުރިއަށް އޮތް އިންތިހާބުތަކުގެ ޝިއާރަކަށް ވެސް ވާންވީ "އިހަށް މަޑުކޮށްލާ" މިހެންނެ އެވެ.
އަދި ވިދާޅުވެފައިވަނީ ދެން ވެރިކަމަށް އަންނަ ރައީސެއް ވައުދުވާންވީ މަޑުޖެހިލަން ކަމަށާއި ކޮންކްރީޓަކީ ތަރައްގީއެއް ނޫން ކަމަށެވެ. ރައީސް ނަޝީދު އިތުރަށް ވިދާޅުވީ އެއީ ގިނަ ފަހަރަށް ދަރަނި ކަމަށެވެ. އަދި ރައްޔިތުންގެ ތަނަވަސްކަން އިތުރުވާނީ ބަޖެޓް ސާޕްލަސް އާއި ރިޒާޒް އިތުރު ކުރެވި ދަރަނި ކުޑަކުރެވިގެން ކަމަށާއި ދިވެހިންނަކީ ތަންދޮރު ދަންނަ ހޭލުންތެރި ބައެއް ކަމަށް އެމްނިކުފާނު ވިދާޅުވި އެވެ.
"ވާން މިދާ ގޮތް އަޅުގަނޑު މި ދައްކާ ވާހަކަ އިން ދިވެހިންނަށް ސާފު ވާނެ." ރައީސް ނަޝީދު ވިދާޅުވި އެވެ.
ރައީސް މުހައްމަދު މުއިއްޒު ކަންކަން ކުރައްވަމުން ގެންދަވާ ގޮތައް ކުރީގެ ރައީސް މުހައްމަދު ނަޝީދު ދަނީ ވަރަށް ބޮޑަށް ފާޑުވިދާޅުވަމުންނެ އެވެ. އެގޮތުން އުތުރުގައި 4 އެއަރޕޯޓް އޮވެ، އިތުރު 4 އެއަރޕޯޓް މި އަޅަނީ 19-36 މިނެޓާ ދޭތެރޭގައި ސްޕީޑް ބޯޓުގައި ދެވޭހާ ކައިރިކައިރީގައި ކަމަށާއި ރައީސް މުއިއްޒު ކަންކަން ކުރައްވަމުން ގެންދަވަނީ ޒިންމާދާރު ކަމެއް، އަމާޒެއް، ޕްލޭނެއް ނެތި ކަމަށް ރައީސް ނަޝީދު ވިދާޅުވި އެވެ.
ރާއްޖޭގައި ވެރިކަން ކުރެއްވި އަދި މަޖިލީހުގެ ރައީސްކަން ވެސް ކުރެއްވި ނަޝީދު ވިދާޅުވީ އޭގެ ނަތީޖާ އަކީ ހުރިހާ އެއާޕޯޓެއްގައި ވެސް އިގްތިސާދީ އަދި މާލީ ދެކޮޅު ޖެހުމެއް ނެތުމާއި، ގައުމީ އެއާލައިނަށް ދެ އުޅިއެއް ނުވާ ހަރަދުތަކެއް ހިނގަން ޖެހުމުގެ އިތުރުން ލޯކަލް ޓޫރިޒަމަށް ވެސް އެކަމުން މަންފާއެއް ނުކުރުން ކަމަށެވެ.
