ރައީސް ޞާލިޙަށް ތާއިދުކުރާ ބޭފުޅުން އެމްޑީޕީގެ ޖަލްސާއަށް ވަޑައިނުގަންނަވާ ވާހަކައަކީ އެއްވެސް އަސާސެއް ނެތް ވާހަކަތަކެއް: ފައްޔާޒް
ފައްޔާޒް ވިދާޅުވީ އެމްޑީޕީ އަކީ ވަރަށް އޯޕަން ސިޔާސީ ޕާޓިއެއް ކަމަށާއި އެހެންކަމުން އެމްޑިޕީ ތެރޭގައި އަބަދުވެސް ވާދަވެރިކަން އޮންނާނެ ކަމަށް
އެމްޑީޕީގެ ޗެއަރޕާސަން ފައްޔާޒް އިސްމާއިލް
މިދިޔަ ހޯމަ ދުވަހުގެ ރޭ ރައީސް ނަޝީދާއި ޑިމޮކްރެޓްސްގެ މެންބަރުން އެމްޑީޕީއާއި ގުޅިވަޑައިގަތުމަށް ބޭއްވި ޖަލްސާއަށް ރައީސް ޞާލިޙަށް ތާއިދު ކުރަށްވާ ބޭފުޅުން ވަޑާއިނުގަންނަވާކަމަށް ދެކެވެމުންދާ ވަހަކަތަކަކީ އެއްވެސް އަސާސެއް ނެތް ވާހަކަތަކެއް ކަމަށް އެމްޑީޕީގެ ޗެއަރޕާސަން ފައްޔާޒް އިސްމާއިލް ވިދާޅުވެއްޖެއެވެ.
ފައްޔާޒް އެފަދައިން ވިދާޅުވީ އެމްޑީޕީން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ. ފައްޔާޒް ވިދާޅުވީ އެމްޑީޕީ އަކީ ވަރަށް އޯޕަން ސިޔާސީ ޕާޓީއެއް ކަމަށާއި އެހެންކަމުން އެމްޑީޕީ ތެރޭގައި އަބަދުވެސް ވާދަވެރިކަން އޮންނާނެ ކަމަށެވެ. އަދި ހުސް ޖާގައެއް އޮތް ކަމަށްވާނަމަ އެޖާގަ ފުރުމަށް އެމްޑީޕީގައި ބައިވަރު މީހުން ތިބޭނެ ކަމަށާއި އެމްޑީޕީ ވަރުގަދަ ޕާޓީއަކަށްވާ ސަބަބަކީވެސް އެއީ ކަމަށް ފައްޔާޒް ވިދާޅުވިއެވެ.
ރައީސް ޞާލިޙަށް ތާއިދު ކުރަށްވާ ގިނަ ބޭފުޅުން ޖަލްސާގައި ތިއްބެވިކަން ފާހަގަކުރަށްވާ ފައްޔާޒް ވިދާޅުވީ ރައީސް ޞާލިޙަށް ބައިވެރިވެ ވަޑައިނުގެންނެވުނީ ރައީސް ޞާލިޙް ރާއްޖެއިން ބޭރުގައި ވަރަށް ބޮޑު ފަރުވާއަކަށް ވަޑައިގެން ހުންނެވީމަ ކަމަށެވެ. އަދި އެ ޖަލްސާއަކީ ކުރިން ޕްލޭން ކުރެވިގެން ދިޔަ ކަންކަމެއް ނޫން ކަމަށާއި ރައީސް ނަޝީދުވެސް މިއަދު ނޫނީ މާދަމާގެ ވަގުތެއްގައި ފުރާވަޑައިގަންނަވާތީ މަޑުކުރެވެން ނެތުމުގެ ސަބަބުން ރައީސް ޞާލިޙް ނެތް ވަގުތެއްގައި އެ ޖަލްސާ ބާއްވަން ޖެހުނީ ކަމަށް ފައްޔާޒް ވިދާޅުވިއެވެ.
ހީނަރުކަމެއް އަންނާނެ ކަމަަކަށް އަޅުގަނޑަށް ކުޑަކޮށްވެސް ގަބޫލެއް ނުކުރެވޭ އެބަހުރި ހިތްހަމަނުޖެހުން، ވަރަށް ހުތުރުކޮށް ކަންކަން ގޮއްސަހުރީ އެއީ އެންމެ ރަނގަޅަށް ވެފައިހުރި ކަންކަމެއް ނޫން. އެހެން ނަމަވެސް އަޅުގަނޑުމެން ގަބޫލުކުރަންޖެހޭ ހަގީގަތަކީ އަޅުގަނޑުމެންނަކީ ވަރަށް މިނިވަންކޮށް މިކަންކަން ގެންގުޅޭ ބަޔަކަށް ވާތީވެ އޭއްޗެހި ތަންކޮޅެއް ބޮޑުވެގެން ބައެއް ފަހަރު ދޭ، އަޅުގަނޑަށް ހީވަނީ އެ މެޗުއަރިޓީ މުޅިން ދިވެހި ރާއްޖޭގެ ޕޮލިޓިކްސް އަށްވެސް ނާންނަނީ ކަންނޭންގެ، ދެން އެކަމު މުޅި ދުނިޔެ އެދަނީ އެހެން ބައްލަވާ އެމެރިކާއަށް، އެހެންވީމާ އެކަހަލަ ދިމާލަކަށް ކަންނޭންގެ މިދަނީ، އަޅުގަނޑު ގަބޫލުކުރާ ގޮތުގައި އެކަހަލަ ކަންތައްތައް ހިތުގައި ނުލާ ސިޔާސީ ކަންކަން ކުރުމުގައި އަޅުގަނޑުމެން ދަސްކުރަންޖެހޭ އުޅެން އެބަޖެހޭ،އެމްޑީޕީގެ ޗެއަރޕާސަން ފައްޔާޒް އިސްމާއިލް
ކޮންމެސް ވަރެއްގެ ނުތަނަވަސްކަމެއް އެބަހުރިކަން ފާހަގަކުރައްވާ ފައްޔާޒް ވިދާޅުވީ ކުރިއަށް އޮތް ދުވަސްކޮޅު ތެރޭގައި މަޑުމަޑުން އެކަންކަން ހިމޭންވެގެން ދާނެކަމަށެވެ. އަދި ގަބޫލުރަންޖެހޭ ހަގީގަތަކީ ދިވެހިރާއްޖޭ މި ދާ މިސްރާބު ހުއްޓުވޭނީ އެމްޑީޕީ ވަރުގަދަ ވެގެން ކަމަށާއި އެމްޑީޕީ އަވަހަށް ވަރުގަދަ ވެވޭނީ އެމްޑީޕީން ވަކިވެގެން ގޮސްފައިވާ ބޭފުޅުން އެއްވެގެން ކަމަށް ފައްޔާޒް ވިދާޅުވިއެވެ.
މަސައްކަތް ކުރަމުން ދަނީ ވޭތުވެދިޔަ ތަނުގައި ނުވަތަ މާޒީން އިބްރަތް ހާސިލް ކޮށްގެން ކަންކަން ރަނގަޅުކުރެވޭތޯ ކަމަށާއީ ނުތަނަވަސްކަން ހުއްޓަސް މިކަމާއި ގުޅިގެން ލިބުނު ފީޑްބެކްގައި 90 އިންސައްތަ ބޭފުޅުން ގަބޫލުކުރަށްވާނީ ކުރިއަށް ދެވޭނީ މިގޮތަށް ކަމަށް ފައްޔާޒް ވިދާޅުވިއެވެ.
