މަޖިލީހަށް ވުރެ ބޮޑު ސިޔާސީ ހަރުގެއެއް ރާއްޖެއަކު ނެތް: ރައީސް ނަޝީދު

ރާއްޖޭގައި މަޖިލީހަށް ވުރެ ބޮޑު ސިޔާސީ ހަރުގެއެއް ނެތް ކަމަށް މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

މަޖިލީހުގައި އަންގާރަ ދުވަހު އެމްޑީޕީގެ މެންބަރުން ވަނީ ޖޭޕީ އަށް އެމްޑީޕީ އިން ތާއީދުކުރުމާއި މެދު ޚިޔާލު ފާޅުކޮށްފައެވެ. ބައެއް މެމްބަރުން ވަނީ އެކަމަކީ އެމްޑީޕީގެ ހަމަޖެހުން ގެއްލޭ ކަމެއް ކަމަށް ސިފަކުރައްވާ އެކަމާއި ދެކޮޅަށް ޚިޔާލު ފާޅުކުރެއްވިއެވެ. ނަމަވެސް އެހެން މެމްބަރުން ވަނީ އެކަމަށް ތާއީދުކޮށް ވާހަކަދައްކަވާފައެވެ. އަދި އެމްޑީޕީ އަށް މިހާރަށް ވުރެ ރަނގަޅު ގޮތެއް ވާނަމަ އެކަން ނުކުރަންވީ ކީއްވެތޯ އެ މެމްބަރުން ސުވާލު އުފެއްދެވިއެވެ. ކާށިދޫ ދާއިރާގެ މެމްބަރު އަބްދުﷲ ޖާބިރު ވަނީ އެ ގޮތަށް މަޖިލީހުގައި ވާހަކަދެކެވެން ފެށުމުން އެއީ މަޖިލީހުގެ މެމްބަރުންތޯ އާއި މަޖިލީހަކީ އެމްޑީޕީގެ ހަރުގެތޯ ސުވާލުކުރައްވާފައެވެ. އަދި މަޖިލީހަކީ ކޯޓާ ބަހާ ތަނެއްތޯ ވެސް ޖާބިރު ސުވާލުކުރެއްވިއެވެ.

ޖާބިރުގެ އެ ވާހަކަތަކާއި ގުޅިގެން ރައީސް ނަޝީދު ވިދާޅުވީ މަޖިލީހުގައި ސިޔާސީ ޕާޓީތަކުގެ ދައުރު އެބަ އޮތް ކަމަށާއި އެ ދައުރު ވަރަށް ފުޅާ ކަަމަށެވެ. އެހެންކަމުން މަޖިލީހަކީ ސިޔާސީ ޕާޓީތަކުގެ ހަރުގެއެއް ނޫން ކަމަށް ބުނުމުގެ ފުރުސަތު ނެތް ކަމަށް ވެސް އެމަނިކުފާނު ވަނީ ވިދާޅުވެފައެވެ. މަޖިލީހަކީ ރާއްޖޭގެ ސިޔާސީ ހަރަކާތުގެ ނާރެސް ކަމަށް އެމަނިކުފާނު ވަނީ ސިފަކުރައްވާފައެވެ. އެތަނުގައި ސިޔާސީ ވާހަކަ ދައްކާނެ ކަމަށާއި އެތަނުގައި ސިޔާސީ އެއްބަސްވުމާއި، ދެބަސް ވުމާއި ޒުވާބު ވެސް ކުރިއަށް ދާނެ ކަމަށް އެމަނިކުފާނު ވިދާޅުވިއެވެ. އެހެންވީމަ ޕާޓީތަކުގެ ހައްސާސް ކަންކަމާއި މެދު މަޖިލީހުގެ ތަޅުމުގައި ވާހަކަ ދެކެވޭ ކަމަށް ރައީސް ނަޝީދު ވަނީ ވިދާޅުވެފައެވެ.