އިންޑިއާގެ ނޫހަށް ނަޝީދު ދެއްވި އިންޓަވިއުއަކީ ޑރ. މުއިއްޒުއާ މަޝްވަރާކުރައްވައިގެން ވިދާޅުވި ވާހަކަފުޅެއް ނޫން: ފިރުޒުލް
އިންތިހާބީ ރައީސް އިންޑިއާ އަދި ކީއްކުރަން އެއްވެސް ގައުމެއްގެ ސިފައިން އެންމެ ބޫޓު ޖޯޑެއްވެސް ދިވެހި ފަސްގަނޑުގައި ހުރުމަށް ދުވަހަކުވެސް ނުރުހެވޭނެ
އިންތިޚާބީ ރައީސް އާއި ނައިބު ރައީށް މަޖިލީހުގެ ރައީސާ ބައްދަލުކުރައްވަނީ
އިންޑިއާގެ ނޫހަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދެއްވި އިންޓަވިއުއަކީ އިންތިޚާބީ ރައީސް ޑރ. މުހައްމަދު މުއިއްޒުއާ މަޝްވަރާކުރައްވައިގެން ވިދާޅުވި ވާހަކަފުޅެއް ނޫން ކަމަށް އިންތިޚާބީ ރައީސްގެ އޮފީހުގެ ތަރުޖަމާނު ފިރުޒުލް އަބްދުﷲ ޚަލީލް ވިދާޅުވެއްޖެއެވެ.
އާދިއްތަ ދުވަހު ދިމްޔާތުގައި ބޭއްވި ނޫސްވެރިންގެ ބައްދަލުވުމުގައި ފިރުޒުލް ވިދާޅުވީ އިންޑިއާގެ 75 ވަރަކަށް ސިފައިން ރާއްޖޭގައި ތިބެން އިންތިޚާބީ ރައީސް ޑރ. މުހައްމަދު މުއިއްޒު ރުހިވަޑައިގަންނަވާނެ ކަމަށް ވިދާޅުވެ، އިންޑިއާގެ ނޫހެއްގައި ނަޝީދު ހެއްދެވީ އިތުރުފުޅެއް ކަމަށެވެ.
ނަޝީދު އެ މޭރުމުން ވާހަކަފުޅު ދެއްކެވީތީ ހިތާމަ ކުރައްވައި ކަމަށާއި އެއީ އިންތިޚާބީ ރައީސާ މަޝްވަރާ ކުރެވިގެން ދައްކަވާފައިވާ ވާހަކަފުޅެއް ނޫން ކަމަށެވެ. އަދި، މި ގައުމުގައި ބޭރުގެ އެއްވެސް ގައުމެއްގެ ސިފައިންގެ އެއްވެސް މީހަކަށް ނުތިބެވޭނެ ކަމަށް މުއިއްޒު އަދިވެސް ގަބޫލުފުޅު ކުރައްވާ ކަމަށް އޭނާ ވިދާޅުވިއެވެ.
އިންތިޚާބީ ރައީސްގެ އޮފީހުން ވަނީ އެފަދައިން އަމަލު ނުކުރެއްވުމަށް ނަޝީދުގެ ކިބައިން އެދިވަޑައިގެންފައެވެ. އިންޑިއާގެ ނޫހެއް ކަމަށްވާ 'ދަ ހިންދޫ'އަށް ދެއްވި އިންޓަވިއުއެއްގައި ނަޝީދު ވަނީ އިންޑިއާގެ 75 ވަރަކަށް ސިފައިން ރާއްޖޭގައި ތިބެން މުއިއްޒުގެ ސަރުކާރެއްގައި ރުހޭނެ ކަމަށް ވިދާޅުވެ، ވާހަކަފުޅު ދައްކަވާފައެވެ.
މި ނޫސްވެރިންގެ ބައްދަލުވުމުގައި ފިރުޒުލް ވިދާޅުވީ ޓްރާންސިޝަން މަރުހަލާގެ ރޫހާ ޚިލާފު ބައެއް ކަންތައްތައް އެކި އިދާރާތަކުން ކުރަން މަސައްކަތް ކުރާ ކަމުގެ މައުލޫމާތު ލިބެމުންދާ ކަމަށެވެ. އަދި އެއްވެސް ބޭފުޅަކު އެފަދަ ކަންތައްތަކަށް އެއްބާރުލުން ނުދެއްވާ އަމާންކަމާއެކު މި މަރުހަލާ ނިންމާލުމަށް އެއްބާރުލުން ދެއްވުމަށް ފިރުޒުލް ވަނީ އިލްތިމާސް ކުރައްވާފައެވެ.
