ހޯމަ ދުވަހު މަޖިލީހުގެ ދެ ޖަލްސާ އެއް - އެޖެންޑާގައި ބަޖެޓްގެ މަސައްކަތާއި ނަޝީދުގެ އިތުބާރު ނެތްކަމުގެ މައްސަލަ
ގަރާރެއް އިތުރަށް ކުރިއަށް ނުގެންދެވޭނެ ކަަމަށް ފާހަގަކުރައްވާ މެންދުރުގެ ޖަލްސާ ވެސް އީވާ ވަނީ ނިންމަވާލައްވާފައި
ރައީސް ނަޝީދު
ހޯމަ ދުވަހަށް ރައްޔިތުންގެ މަޖިލީހުގައި ދެ ޖަލްސާ އެއް ބާއްވަން އެޖެންޑާކޮށްފިއެވެ.
ހޯމަ ދުވަހު ހެނދުނު 09:00 އަށް ތާވަލްކޮށްފައި ވަނީ 2023 ވަނަ އަހަރަށް ލަފާކުރާ ސަޕްލިމެންޓްރީ ބަޖެޓާއި، 2024 ވަނަ އަހަރުގެ ބަޖެޓުގެ މަސައްކަތެވެ. އަދި މެންދުރު 11:00 އަށް އެޖެންޑާކޮށްފައިވާ ޖަލްސާ އަށް މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ވަނީ އެޖެންޑާކުރައްވާފައެވެ.
މި ދެ ޖަލްސާ މިގޮތަށް އެޖެންޑާކޮށްފައިވާއިރު އާދިއްތަ ދުވަހު މަޖިލީހުގެ ރިޔާސަތުން ވަނީ ނެތް ބާރެއްގެ ބޭނުން ކުރައްވައިގެން މަޖިލީހުން ނަޝީދުގެ އިތުބާރު ނެތްކަމުގެ މައްސަލަ ބޭރުކޮށްލާ، މަޖިލީހުގެ ޖަލްސާތައް ކުރިއަށް ނުގެންދަން ނިންމަވާފައެވެ. އެކަން ކުރައްވާފައި ވަނީ މަޖިލީހުގެ އިދާރާގެ ލަފަޔާއި ވެސް ޚިލާފަށެވެ.
އާދިއްތަ ދުވަހު ހެނދުނު ބޭއްވި ޖަލްސާގެ ރިޔާސަތު ބެލެހެއްޓެވި ހަސަން އަފީފް ވަނީ ނަޝީދުގެ އިތުބާރު ނެތްކަމުގެ ގަރާރު ޤާނޫނާއި ޚިލާފު ކަމަށް ވިދާޅުވެ އެ މައްސަލަ އަލުން ހުށަހަޅާން އަންގަވާފައެވެ. ނަމަވެސް އެއީ ޤާނޫނާއި ޚިލާފު ނިންމުމެއް ކަަމަށް ވާތީ އާދިއްތަ ދުވަހުގެ 11:30 އަށް އިތުރު ޖަލްސާ އެއް އެޖެންޑާކުރިއެވެ. މަޖިލީހުގެ އެ ޖަލްސާގެ ރިޔާސަތު ބަލަހައްޓަވަން މަޖިލީހުގެ ނައިބު ރައީސް އީވާ އަބްދުﷲ ވަޑައިގަތެވެ. އަދި ރިޔާސަތުން ގޮތެއް ނިންމާފައިވާ ގަރާރެއް އިތުރަށް ކުރިއަށް ނުގެންދެވޭނެ ކަަމަށް ފާހަގަކުރައްވާ އެ ޖަލްސާ ވެސް ނިންމަވާލެއްވީއެވެ.
