ރައީސް އިބްރާހީމް މުހައްމަދު ސާލިހު، އަލީ ވަހީދަށް މައާފު ދެއްވިކަމަށް ބުނެ ފަތުރާ ޚަބަރު ސަރުކާރުން ދޮގުކޮށްފިއެވެ.
ބުދަ ދުވަހު ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ، ރައީސް ސާލިހު އަލީ ވަހީދަށް މައާފު ދެއްވިކަމަށް ބުނެ ފަތުރާ ޚަބަރަކީ ހަގީގަތެއް ނެތް ދޮގު ޚަބަރެއް ކަމަށެވެ.
އަލީ ވަހީދުގެ މައްޗަށް ކުރެވެނީ، ޓުއަރިޒަމް މިނިސްޓަރުގެ މަގާމުގައި ހުންނަވައިގެން އެ މިނިސްޓްރީގެ ގިނަ އަދަދެއްގެ އަންހެން މުވައްޒަފުންތަކަކަށް ޖިންސީ ގޯނާ ކުރެއްވުމުގެ ތުހުމަތެވެ.
ޖިންސީ ފުރައްސާރައާއި ޖިންސީ އަނިޔާގެ މައްސަލަތަކުގައި މި ސަރުކާރުން ގެންގުޅެނީ "ޒީރޯ ޓޮލަރެންސް" ކަމަށްވާއިރު، މިމައްސަލައާ ގުޅިގެން، ޓޫރިޒަމް މިނިސްޓަރުކަމުގެ މަގާމުން އަލީ ވަހީދު ވަކިކުރެއްވީ 09 ޖުލައި 2020ގައެވެ.
އަލީ ވަހީދު މިހާރު ހުންނެވީ ފިއްލަވައިގެން، ރާއްޖެއިން ބޭރުގައެވެ. ރާއްޖެއިން ބޭރަށް ވަޑައިގެންނެވި ފުރަތަމަ ދުވަސްކޮޅުގެ ތެރޭގައި އޭނާ ވަނީ މިސަރުކާރަށް ވަރަށް ބޮޑަށް ފާޑު ވިދާޅުވެ ވާހަކަދައްކަވާފައެވެ.
އޭނާ ގެނައުމުގެ މަސައްކަތްވެސް އިންޓަރޕޯލް މެދުވެރިކޮށް ފުލުހުން ގެންދަނީ ކުރަމުންނެވެ.
