މައްސަލައަކީ ވެރިކަމުގެ ނިޒާމެއް ނޫން: ސަރަނގު އާދަމް މަނިކު
16 މެއި 2023 | އަންގާރަ 03:42ބަރުލަމާނީ ނިޒާމުގެ ވާހަކަ ފެށުނުއިރު އެކަމަށް ތާއީދުކުރެއްވީ މަދު ބޭފުޅުންކޮޅެއް
މާލޭގެ ފުރަތަމަ މޭޔަރު އަދި ވިޔަފާރިވެރިޔާ ސަރަނގު އާދަމް މަނިކު
މައްސަލައަކީ ވެރިކަމުގެ ނިޒާމެއް ނޫންކަމަށް މާލޭގެ ފުރަތަމަ މޭޔަރު އަދި ވިޔަފާރިވެރިޔާ ސަރަނގު އާދަމް މަނިކު ވިދާޅުވެއްޖެއެވެ.
އަންގާރަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ބަރުލަމާނީ ނިޒާމާއި ގުޅޭގޮތުން ވާހަކަ ދައްކަވަމުން އޭނާ ވިދާޅުވީ، ބަރުލަމާނީ ނިޒާމަށް ތާއީދު ކުރުމާ ގުޅޭ މަޝްވަރާތައް ފުރަތަމަ ފެށިގެން އައިއިރު، މުޅި އެ ނިޒާމަށް ތާއީދު ކުރާ ބޭފުޅުންގެ ގޮތުގައި ތިއްބެވީ ނަޝީދު ހިމެނޭހެން ދެ ބޭފުޅެއް ކަމަށެވެ.
ފަހުން ނަޝީދު ވެރިކަމަށް ވަޑައިގެންނެވުމަށްފަހުވެސް އެކަމާ މާ ބޮޑަަށް އުޅުއްވާފައިނުވާކަން ފާހަަގަ ކުރައްވައި އާދަމް މަނިކު ވިދާޅުވީ، ޔާމީނުގެ ވެރިކަމުގައި އަނެއްކާވެސް ނަޝީދު އެ މަޝްވަރާތައް ކޮލަމްބޯގައި ހުންނަވައި ކުރިއަށް ގެންދެވި ކަމަށެވެ.
ނަމަވެސް ފަހުން އަނެއްކާވެސް އެ މަޝްވަރާތައްވެސް ބަދަލުވެގެން ދިޔަކަމަށް އޭނާ ވިދާޅުވިއެވެ.
ސަރަނގު އާދަމް މަނިކު އިތުރަށް ވިދާޅުވީ، މައްސަލައަކީ ވަކި ނިޒާމެއް ނޫން ކަމަށެވެ.
ރާއްޖޭގައި ބަރުލަމާނީ ވާހަކައިގެ މަޝްވަރާތައް ފެތުރިގަންނަ ވަގުތާއި ހާލަތަށް ބަލާއިރު މުޅިންވެސް ފެނިފައި ހުރީ ވެރިކަމެއް ބަދަލުވާން ނުވަތަ ބަދަލު ކުރުމާ ދިމާކޮށް މި މަސައްކަތް ކުރެވޭތަނެވެ.
ރާއްޖޭގައި ފުރަތަމަ މިވާހަކަތައް ފެށުނީ މިހާރު މިއޮތް ޤާނޫން އަސާސީ އެކުލަވާލުމުގެ ތެރެއިންނެވެ. އޭރުގެ ރައީސް މައުމޫނުގެ ވެރިކަމާ ދެކޮޅަށް އަޑުއުފުލައި އެވެރިކަން ބަދަލުކުރަން ވެއްޖެކަމަށް ފާޅުގައި ކުރަންފެށި މަޝްވަރާތަކުގެ ތެރެއިންނެވެ. އެފަހަރު ނިމުނީ ރައްޔިތުންގެ މެދުގައި ނެގުނު ވޯޓަކުން ރިޔާސީ ނިޒާމެއްކަމަށް ނިންމައި ޤާނޫން އަސާސީގައި ސިއްކަ ޖަހައިގެންނެވެ.
އެއަށްފަހު ކުރީގެ ރައީސް އަބްދުﷲ ޔާމީނުގެ ވެރިކަން ބަދަލު ކުރުމާއި، އޭގެ ފަހުން މިހާރުގެ ރައީސް އިބްރާހީމް މުޙައްމަދު ސާލިޙުގެ ވެރިކަމާ ދެކޮޅަށް ނުކުތުމުގައިވެސް ބަރުލަމާނީގެ މަޝްވަރާތައް ކުރެވިފައިވެއެވެ.
