ވަރޗުއަލް ރިއަލިޓީގެ ދުނިޔެއިން ފަލަސްތީނު ދަތުރު

އުމުރުން 31 އަހަރުގެ ހަމްޒާ ސައްރާޖަކީ ފަލަސްތީނު ރައްޔިތެކެވެ. އުފަންވީ، އެކި ސަބަބުތަކާ ހެދި ފަލަސްތީނުން ބޭރުގައި ދިރިއުޅެމުންދާ މީހުންގެ އާބާދީއަކަށެވެ. ނަމަވެސް އެއީ، ހަމްޒާގެ އުފަން ވަޒަނާ ދުރުގައި އުޅެންޖެހޭ ސަބަބެއް ކަމަކަށް އޭނާ ގަބޫލެއްނުކުރެއެވެ. އެކަން އޭނާ ސާބިތުކޮށްދިނީ ވަރޗުއަލް ރިއަލިޓީ (ވީއާރް) ނުވަތަ މަސްނޫއީ ހަގީގަތުގެ ދުނިޔެއަކަށް ފަލަސްތީނު ތައާރަފުކޮށްގެންނެވެ. ހަމްޒާގެ މަސައްކަތުގެ ނަތީޖާއެއްގެގޮތުން، ފަލަސްތީނުގައި ހުރި ދީނީ އަދި ސަގާފީ ތަންތަން، ހަގީގީ ދުނިޔެއާ ދާދި އެއް ފެންވަރަކަށް ބަލައިލުމުގެ ފުރުސަތު ފަހިވެގެން ދެއެވެ.

މިއީ 1948 ވަނަ އަހަރު، ގޮށްމުށުގެ ބާރުން ޔަހޫދީ އިޒްރޭލު އުފެއްދުމާއެކު އަމިއްލަ ވަޒަނުން ބޭރުކޮށްލެވިފައިވާ ފަލަސްތީނުގެ ހަގީގީ އަހުލުވެރިންނަށް، އުފަން ބިމުގެ ތަރިކަ، މިހާ ގާތުން ބަލައިލަން ލިބޭ ރަނުގެ ފުރުސަތެކެވެ.

ގަލްފު ސަރަހައްދުގައި އުޅެ ބޮޑުވި ހަމްޒާ އެންމެ ފުރަތަމަވެސް ފަލަސްތީނަށް ދިޔައީ 2016 ވަނަ އަހަރުއެވެ. އޭގެ ކުރިންވެސް އޭނާއާ މުޚާތަބުކޮށް އުޅެނީ ފަލަސްތީނު ރައްޔިތެއްގެ ގޮތުގައެވެ. އަމިއްލަ ވަޒަނަށް ދެވުމާއެކު، އެ ހަނދާންތައް ރައްކާކުރުމުގެ ޝައުގުވެރިކަން އުފެދުނެވެ. ސައޫދީ އަރަބިއްޔާގައި ތިބި އޭނާގެ އެކުވެރިންނަށް، ފަލަސްތީނުގެ ތަޖުރިބާތައް ދައްކައިލުމުގެ ބޭނުމުގައެވެ. އޭގެފަހުން، ދުނިޔޭގެ އެކި ހިސާބުތަކުގައި ދިރިއުޅުން އާބާދުކޮށްފައިވާ ފަލަސްތީނުގެ ދަރިންނަށް، އުފަން ވަޒަނުގެ ވާހަކަތައް ކިޔައިދިނުމުގެ ބޭނުމުގައެވެ.

ހަމްޒާގެ މަސައްކަތުން، ވަރޗުއަލް ރިއަލިޓީގެ ދުނިޔެއަށް ފަލަސްތީނުގެ މުހިންމު ތަރިކަތައް ތައާރަފުކޮށްފިއެވެ. ފަލަސްތީނުން ބޭރުގައި ތިބި މީހުންނާއި، ފަލަސްތީނުގެ ރެފިއުޖީ ކޭމްޕުތަކުގައި ތިބި މީހުންނަށްވެސް، މުޅި ފަލަސްތީނު ހުޅުވާލެވުނީއެވެ. ހަމްޒާ ފޯރުކޮށްދޭ ވަރޗުއަލް ދަތުރުތަކަކީ، ހަގީގީ ދުނިޔޭގެ ދަތުރަކާ އެންމެ ގާތް ކުރާނެ ދަތުރެވެ. އެކަމަށް ޚާއްސަކޮށްފައިވާ އައިނެއް އަޅައިގެން ފަލަސްތީނުގެ މަންޒަރުތައް ބަލަމުންދާއިރު ހީވާނީ، ހަމަ ހަގީގަތުގައިވެސް އެތަނުގައި ހުރެވޭހެންނެވެ.

ވީއާރް ޓެކްނޮލޮޖީގެ ބޭނުންކޮށްގެން، ހަމްޒާ ދަނީ، އިރު އޮއްސޭ މަންޒަރު ފަދަ ހިތްގައިމު ގުދުރަތީ މަންޒަރުތައް ބަލައިލުމުގެ ނަސީބުން މަހްރޫމުވެފައިވާ އެތައް ބަޔަކަށް އެ ފުރުސަތުވެސް ހޯދައިދެމުންނެވެ. ހަމްޒާގެ ވަރޗުއަލް ދަތުރުގައި ފަލަސްތީނުގެ އެއްގަމާއި ކަނޑުގެ ސަރަހައްދުގެ މަންޒިލްތައް ހިމަނާފައިވާއިރު، އޭނާގެ އަމާޒަކީ މުޅި ފަލަސްތީނު އެ ދަތުރުގައި ހިމެނުމެވެ.

ޔަހޫދީ އިޒްރޭލު އުފެއްދި ކާރިސާގެ ހަނދާންތަކާ ގުޅުވައިގެން ފަލަސްތީނުގައި ފާހަގަކުރާ އައްނަކްބާ ދުވަހާ ދިމާކޮށް ހަމްޒާ ވަނީ އޭނާގެ ވަރޗުއަލް ރިއަލިޓީ ދަތުރުގައި ގުދުސްގެ ޑެމެސްކަން ގޭޓާއި އަލްއަގްސާ މިސްކިތުގެ އިތުރުން ކަނޑުގެ ސަރަހައްދުގެ މަންޒަރުތައް ހިމަނާފައެވެ.  

ފަލަސްތީނުގައި އައްނަކްބާ ދުވަހުގެ ގޮތުގައި ބަލަނީ ކޮންމެ އަހަރެއްގެ މެއި މަހުގެ 15 ވަނަ ދުވަހެވެ. އެއީ ޔަހޫދީ އިޒްރޭލުގެ މިނިވަން ދުވަހުގެ ގޮތުގައި ބަލާ ދުވަހުގެ، 1 ދުވަސް ފަހުންނެވެ.