ތޮއްޑޫއިން ގޯތި ދޫކުރުން އަނެއްކާވެސް ހުއްޓުވައިފި
ތޮއްޑޫން 100 ގޯއްޗަށް އިއުލާނު ކުރީ މިދިޔަ އަހަރުގެ އޮކްޓޯބަރު މަހު
އއ.ތޮއްޑޫ
އއ. ތޮއްޑޫ އިން ގޯތި ދޫކުރުން އެރަށު މެޖިސްޓްރޭޓް ކޯޓުން ދެވަނަ ފަހަރަށް ހުއްޓުވައިފިއެވެ.
ތޮއްޑޫން 100 ގޯއްޗަށް އިއުލާނު ކުރީ މިދިޔަ އަހަރުގެ އޮކްޓޯބަރު މަހުގެ ތެރޭގައެވެ. ކައުންސިލުން ދޭން ނިންމާފައި ވަނީ 3000 އަކަފޫޓުގެ 100 ގޯއްޗެވެ.
އެހެންނަމަވެސް އާންމުންގެ ފަރާތުން ވަނީ ގޯތި ދޫކުރުމުގެ އުސޫލާ ގުޅޭގޮތުން ތޮއްޑޫ ކައުންސިލާ ދެކޮޅަށް ކޯޓުގައި ދައުވާކޮށްފައެވެ. އެހެންކަމުން ތޮއްޑޫ މެޖިސްޓްރޭޓް ކޯޓުން ވަނީ ގޯތި ލިބޭ ފަރާތްތަކަށް ގޯތި ޙަވާލު ކުރުމުގެ ގޮތުން ނަގާ ގުރު ނެގުމާއި ގޯތި ޙަވާލު ކުރުން މަޑު ޖައްސާލުމަށް އަމުރުކޮށްފައެވެ.
ކައުންސިލާ ދެކޮޅަށް ދަޢުވާ ކުރާ ފަރާތްތަކުން ބުނެފައިވަނީ ކައުންސިލުން ގޯތި ދިނުމަށް އެކުލަވާލާފައިވާ ޕޮއިންޓް ދިނުމުގެ ޢުޞޫލު އެކުލަވާ ލާފައިވަނީ ގޯސްކޮށް ކަމަށާ، ދިވެހިރާއްޖޭގެ ބިމާއި ބެހޭ ޤާނޫނަށް ފުށުއަރާ ކަންކަން މި ޢުޞޫލުގައި ހުރި ކަމަށާއި އަދި ޕޮއިންޓް އުނިކޮށްފައި ވަނީ އިންސާފު ވެރިކަމާއި އެކު ނޫން ކަމަށެވެ. އަދި ޕޮއިންޓް ދިނުމުގެ ޢުޞޫލު އެކުލަވާލާފައިވަނީ ގޯއްޗަށް އެދި ފޯމް ހުށައަޅާ ފަރާތްތަކުގެ މަސްލަޙަތު ހިމެނޭ ގޮތުން ވަކިބައެއްގެ ނޫފުޒުން ކަމަށެވެ. އެހެންކަމުން މި ޢުޞޫލުގެ ދަށުން ޕޮއިންޓް ދިނުމަކީ އެންމެ އިންސާފުވެރިގޮތެއް ނޫން ކަމަށާއި ޢުޞޫލު ބާޠިލް ކުރަން ޖެހޭ ކަމަށް ވެސް އެފަރާތްތަކުން ބުނެފައިވެއެވެ.
މިއީ ތޮއްޑޫއިން ގޯތި ދޫކުރުން ހުއްޓުވި ދެވަނަ ފަހަރެވެ. އެންމެ ފުރަތަމަ ގޯތި ދޫކުރުން ހުއްޓުވާފައިވަނީ މިއަހަރުގެ ފެބްރުއަރީ 2 ގައެވެ. އެއީ ގޯއްޗަށް ކުރިމަތިލި މީހުންގެ ލިސްޓުގައި ނަން ނުހިމެނޭ ހަތަރު މީހަކު ކައުންސިލާ ދެކޮޅަށް ކޯޓުގައި ދައުވާކުރުމާއި ގުޅިގެންނެވެ.
އޭރު ކައުންސިލާ ދެކޮޅަށް ދައުވާ ކުރި މީހުން ބުނެފައި ވަނީ ކައުންސިލުން ގޯތި ދޫކުރުމަށް އެކުލަވާލައިފައިވާ އުސޫލު ވެސް ގޯސް ކަމަށެވެ. އަދި މާކްސް ދީފައި ވަނީ ވެސް އިންސާފުވެރިކޮށް ނޫން ކަމަށެވެ. މީގެއިތުރުން ގޯއްޗަށް ކުރިމަތިލި މީހުންގެ 18 އަހަރުން ދަށުގެ ކުދިން ތިބި ނަމަވެސް އެ ކުދިން ހިމަނައިގެން މާރކްސް ދީފައެއް ނުވާ ކަމަށާއި 600 އަކަފޫޓަށް ވުރެ ކުޑަ ބިމެއް މައިންބަފައިންނަށް ލިބިފައިވާތީ އެފަދަ މީހުންނަށް ވެސް ކައުންސިލުން ޕޮއިންޓް އުނިކޮށްފައިވާ ކަމަށެވެ.
