ރާއްޖޭގައި ފުރަތަމަ ފަހަރަށް ބިޒްނަސް ކްލާހަށް ޚާއްސަ އެއާލައިނެއް އޮޕަރޭޓްކުރަން ފަށަން ނިންމާފައިވާކަމަށް، ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރު އަހުމަދު ޒުހައިރު ވިދާޅުވެއްޖެއެވެ.
އޭނާ މިފަދައިން ވިދާޅުވީ ދާދިފަހުން ބޭއްވި "ކޮމްބައިންޑް ކޮލިޓީ ކޮންޓްރޯލް ވޯރކްޝޮޕް" ނިންމުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
އިޖުތިމާއީ އަދި އިގްތިސާދީ ކުރިއެރުމަށް އޭވިއޭޝަން ދާއިރާ ކުރިއެރުން ވަރަށް މުހިންމުކަމަށާއި، އެ މަގްސަދު ހާސިލްކުރުމަށްޓަކައި ކަމާބެހޭ ފަރާތްތަކުން ކެނޑިނޭޅި މަސައްކަތްކުރަމުން ދާކަމަށް އޭނާ ވިދާޅުވިއެވެ. އެގޮތުން ކުރަމުންދާ މަސައްކަތްތަކުގެ ދަށުން، ރާއްޖޭގެ ކޮންމެ ރަށަކަށްވެސް 30 މިނިޓުން ދެވޭހިސާބުގައި އެއާޕޯޓެއް ތަރައްގީކުރުމަށް ސަރުކާރުން ގެންގުޅޭ ސިޔާސަތު މި އަހަރު ނިމެންވާއިރު ފުރިހަމަކުރެވޭނެކަމުގެ އުންމީދު ބޮޑުކަމަށް އޭނާ ވަނީ ވިދާޅުވެފައެވެ. އެއީ އުނދަނގޫ މަސައްކަތެއް ކަމަށާއި، ނަމަވެސް އެކަން ހާސިލްކުރުމަށް މަސައްކަތްތަކެއް ކުރެވިފައިވާކަމަށް އޭނާ ވިދާޅުވިއެވެ.
މީގެ އިތުރުން އެއާލައިން ޚިދުމަތްތައް ފުޅާކުރުމަށްވެސް މަސައްކަތްކުރާކަމަށް އޭނާ ވަނީ ވިދާޅުވެފައެވެ. އެގޮތުން އެ ދާއިރާއިން އާ އިންވެސްޓްމެންޓްތައް ލިބެމުންދާ ކަމަށާއި، އާ އެއާލައިންތައް އޮޕަރޭޓްކުރުމުގެ މަސައްކަތްވެސް ކުރިއަށްދާކަަމަށް ޒުހައިރު ވިދާޅުވިއެވެ. އޭނާ ވިދާޅުވީ އެ މަސައްކަތްތަކުގެ ތެރެއިން އާ އެއާލައިނެއް ކުރިއަށް އޮތް 3 މަސް ދުވަހުގެ ތެރޭގައި އޮޕަރޭޓްކުރަން ފަށާނެކަަމަށް ބެލެވޭކަމަށެވެ. ނަމަވެސް އޭގެ އިތުރު ތަފްސީލެއް ދެއްވާފައެއް ނުވެއެވެ.
އޭވިއޭޝަން ނުވަތަ ވައިގެ ދަތުރުފަތުރުގެ ދާއިރާގެ ޚިދުމަތްތަކަކީ ފެންވަރު ރަނގަޅު ޚިދުމަތްތަކަކަށް ހެދުމަށް ސަމާލުކަން ދޭންޖެހޭކަމަށް ޒުހައިރު ވިދާޅުވިއެވެ. މިހާރުވެސް ރާއްޖޭގައި 40ށްވުރެ ގިނަ އެއާލައިން ހަރަކާތްތެރިވަމުން ދާކަމަށާއި، ދުވަހަކަށްވުރެ ދުވަހެއްް ޚިދުމަތުގެ ފެންވަރު ރަނގަޅުކުރުމަށް މަސައްކަތް ކުރާކަމަށް އޭނާ ވަނީ ވިދާޅުވެފައެވެ.
