ސާފް ޗެމްޕިއަންޝިޕުގެ ގުރު ނެގުން ބުދަ ދުވަހު

އަންނަ މަހު އިންޑިޔާގައި ބާއްވާ ސާފް ޗެމްޕިއަންޝިޕް ފުޓްބޯޅަ މުބާރާތުގެ ގުރު ނެގުން އަންނަ ބުދަ ދުވަހު ބާއްވަން ނިންމައިފި އެވެ.

ސާކްގެ 6 ގައުމާއި ދައުވަތު ދީފައިވާ ލުބުނާނާއި ކުވޭތު ބައިވެރިވާ މުބާރާތުގެ ގުރު ނެގުން އޮންނާނީ އިންޑިޔާގަ އެވެ.

މި މުބާރާތް ފަށަން މިހާރު ހަމަޖައްސާފައިވަނީ އަންނަ މަހުގެ 21ގަ އެވެ. 8 ޓީމު ދެ ގްރޫޕަކަށް ބަހާލައިގެން ސެމީ ފައިނަލަށް ކޮންމެ ގްރޫޕެއްގެ ގަދަ ދެ ޓީމު ހޮވާ ގޮތަށް ރާވާފައިވާ މުބާރާތް ނިންމާނީ ޖުލައި ތިނެއްގަ އެވެ.

ސާފް ޗެމްޕިއަންޝިޕް ފުޓްބޯޅަ މުބާރާތުގެ އެންމެ ފަހުގެ ޗެމްޕިއަނުންނަކީ ވެސް އިންޑިޔާ އެވެ. ނަމަވެސް މި ފަހަރުގެ މުބާރާތުގައި އެ ގައުމުން ބައިވެރިކުރާނީ 23 އަހަރުން ދަށުގެ ޓީމެވެ. އިންޑިޔާއިން މި ގޮތަށް ނިންމީ އެ ގައުމުގެ ސީނިއާ ޓީމު މިއަށްވުރެ މަތީ ފެންވަރުގެ މުބާރާތްތަކެއްގައި ބައިވެރިކުރުވުމަށްޓަކަ އެވެ.

މި މުބާރާތަށް ރާއްޖޭގެ ފުޓްބޯޅަ ލީގު މި ހަފުތާ އަށް ފަހު މެނދުކަނޑާލާނެ އެވެ.