ފުޓްބޯލް އެސޯސިއޭޝަން އޮފް މޯލްޑިވްސް އިން އިންތިޒާމުކޮށްގެން ކުރިއަށްގެންދާ އެސްޓީއޯ މިނިވަން ޗެމްޕިއަންޝިޕް ފުޓުބޯޅަ މުބާރާތުގެ ފައިނަލް ބުރުގެ ގުރު ނަގައިފިއެވެ.

ދެ ގުރޫޕަކަށް ބަހާލައިގެން ޖުމްލަ 8 ޓީމު ވާދަކުރާ ފައިނަލް ބުރުގެ ކުޅުން، ގދ.ތިނަދޫ އަދި ހދ.ކުޅުދުއްދުށީގައި ކުރިއަށް ގެންދިއުމަށް ހަމަޖެހިފައިވާއިރު، މި ބުރުގެ ފުރަތަމަ މެޗް ކުޅުމަށް ހަމަޖެހިފައިވަނީ އަންނަ ޖުލައި މަހުގެ 5 ވަނަ ދުވަހު ތިނަދޫގައެވެ. މިމެޗުގައި ބައްދަލުކުރާނީ ތިނަދޫ އާއި ދ.ކުޑަހުވަދޫ އެވެ.

ގުރޫޕް 2 ގައި ތިނަދޫ އާއި ކުޑަހުވަދޫގެ އިތުރުން ދެން ހިމެނޭ 2 ޓީމަކީ ތ.ތިމަރަފުށި އަދި އެންމެ ފަހުގެ ރަނަރަޕް ސ.ފޭދޫ އެވެ. މި ގުރޫޕުގެ ކުޅުން ކުރިއަށްދާނީ ގދ.ތިނަދޫގައެވެ.

ގުރޫޕް 1 ގެ މެޗުތަށް ހދ.ކުޅުދުއްފުށީގައި ކުރިއަށް ގެންދިއުމަށް ހަމަޖެހިފައި ވާއިރު، ކުޅުދުއްފުށީގެ އިތުރުން ދެން މި ގުރޫޕުގައި ހިމެނޭ ޓީމުތަކަކީ އެންމެ ފަހުގެ ޗެމްޕިއަން ބ.އޭދަފުށި، އއ.މާޅޮސް އަދި ށ.މިލަންދޫއެވެ. މި ގުރޫޕުގެ ކުޅުން ޖުލައި 6 ގައި ފެށުމަށް ހަމަޖެހިފައި ވާއިރު ފުރަތަމަ މެޗުގައި ބައްދަލުކުރާނީ ކުޅުދުއްފުއްޓާއި އޭދަފުއްޓެވެ.

ގުރޫޕް ސްޓޭޖުގެ މެޗުތަކަށްފަހު ސެމީ ފައިނަލުގެ މެޗުތައް ކުޅުމަށް ހަމަޖެހިފައިވަނީ ޖުލައި 15 އަދި 16، މި ދެދުވަހުގައެވެ. ސެމީގެ ފުރަތަމަ މެޗުގައި ބައްދަލުކުރާނީ ގުރޫޕް 1 ގެ އެއްވަނަ ޓީމާއި ގުރޫޕް 2 ގެ 2ވަނައަށްދާ ޓީމެކެވެ. ސެމީގެ ދެވަނަ މެޗުގައި ބައްދަލުކުރާނީ ގުރޫޕް 2ގެ އެއްވަނަ ޓީމާއި ގުރޫޕް 1ގެ ދެވަނައަށްދާ ޓީމެކެވެ. މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ ޖުލައި 20 ވަނަ ދުވަހުއެވެ.

މިއަހަރުގެ ފުޓުބޯޅަ ފޯމެޓަށް ގެނައި ބަދަލާއެކު މި މުބާރާތުގެ ފައިނަލް ބުރުގެ އެންމެ ގަދަ 4 ޓީމު މިއަހަރުގެ ދިވެހި ލީގަށް ކޮލިފައި ވާނެއެވެ. އެގޮތުން ދިވެހި ލީގުގައި ވާދަކުރާނީ މާލެ ލީގުގެ އެންމެ ގަދަ 4 ޓީމާއި މިނިވަން ޗެމްޕިއަންޝިޕްގެ ގަދަ 4 ޓީމެވެ.