މިއަހަރުގެ ޑިސެމްބަރު މަހު ބަންގްލަދޭޝްގައި ބޭއްވުމަށް ހަމަޖެހިފައި އޮތް ސާފް ޗެމްޕިއަންޝިޕް ފުޓުބޯޅަ މުބާރާތް އަންނަ އަހަރުގެ މެއި މަހަށް ފަސްކޮށްފިއެވެ.

ސައުތް އޭޝިއަން ފުޓްބޯލް ފެޑެރޭޝަންގެ އެގްޒެކެޓިވް ކޮމެޓީއިން މިގޮތަށް ނިންމާފައިވަނީ އިންޑިއާގެ ބެންގަލޫރުގައި ބުރާސްފަތި ދުވަހު ބޭއްވި ބައްދަލުވުމެއްގައެވެ. އެގްޒެކެޓިވް ކޮމެޓީއިން މިގޮތަށް ނިންމާފައިވަނީ އިންޑިއާއިން މުބާރާތް ފަސްކުރުމަށް އެދިފައި ވާތީއެވެ. ބުރާސްފަތި ދުވަހު ކޮމެޓީއިން ނިންމާފައިވަނީ އަންނަ އަހަރުގެ މެއި މަހުގެ 1-21 ވަނަ ދުވަހުގެ ނިޔަލަށް ބަންގްލަދޭޝްގައި މުބާރާތް ބޭއްވުމަށެވެ.

އިންޑިއާ އިން މުބާރާތް ފަސްކުރަން އެދިފައި ވަނީ، ޑިސެމްބަރު މަހު މުބާރާތް ބާއްވާނަމަ އެގައުމަށް މުބާރާތުގައި ބައިވެރި ނުވެވޭތީއެވެ. އަންނަ އޯގަސްޓް މަހު، 17 އަހަރުން ދަށުގެ ފީފާ ވޯލްޑްކަޕް މުބާރާތް އިންޑިއާގައި ބާއްވާތީ އެގައުމުގެ ފުޓުބޯޅަ ޝެޑިއުލަށް ވަނީ ބަދަލުތަކެއް އައިސްފައެވެ. ކުރިން އެގައުމުގެ ފުޓުބޯޅަ ޝެޑިއުލް ރޭވިފައި ވާގޮތުން ޑިސެމްބަރު މަހަށް އެގައުމުގެ "އައި ލީގު"ގެ ކުޅުން ނިމޭނެއެވެ. ނަމަވެސް 17 އަހަރުން ދަށުގެ ވޯލްޑްކަޕް ބާއްވާ ގޮތަށް ފަހުން ހަމަޖެހިގެން ދިއުމުން، ޑިސެމްބަރު ހަމަށް އައި ލީގުގެ ކުޅުން ނުނިމޭނެ އެވެ. މީގެ އިތުރުންވެސް އެގައުމުން މިހާރު އަންނަނީ އައި ލީގައި، އިންޑިއަން ސުޕާ ލީގު އެއްކޮށްލާކަހަލަ ވިސްނުމެއް ގެންގުޅެމުންނެވެ. އެގޮތަސް ހަމަޖެހިއްޖެނަމަ ލީގު އިތުރަށް ދިގު ދެމިގެންދާނެއެވެ.

މުބާރާތް ފަސްކުރުމަށް އިންޑިއާއިން އެދުމާއިއެކު ގިނަ ފަރާތްތަކަކުން ދިޔައީ، އިންޑިއާއިން އެދިފައި ވާގޮތަށް ސާފް އިން އަމަލި ކުރާނެ ކަމަށް ބުނަމުންނެވެ. ސަބަބަކީ މީގެ ކުރިން މުބާރާތް ބާއްވާނެ ތަނާއި މުބާރާތް ބާއްވާނެ ތާރީހު ކަނޑައެޅުމުގައި އިންޑިއާއިން ބޮޑު ރޯލެއް އަދާކުރަމުން އަންނާތީއެވެ. މުބާރާތުގެ ސްޕޮންސަރުންގެ އެދުމުގެ މަތިން މިހާރުވެސް، ކޮންމެ ދެ ފަހަރަކުން އެއް ފަހަރު މުބާރާތް ބާއްވަމުން އަންނަނީ އިންޑިއާގައެވެ. މި މުބާރާތް އެންމެ ގިނައިން ކާމިޔާބުކޮށްފައިވާ ގައުމަކީވެސް އިންޑިއާއެވެ. އިންޑިއާއިން ވަނީ މިހާތަނަށް ބޭއްވި 9 މުބާރާތުގެ ތެރެއިން 6 މުބާރާތް ކާމިޔާބުކޮށްފައެވެ.