ތޭރަ އޮފީހާއެކު އޮފީސް ބިލިއަޑް މުބާރާތުގެ ގުރު ނަގައިފި

މޯލްޑިވްސް ޕޫލް ބިލިއަޑް އެސޯސިއޭޝަނުން އިންތިޒާމްކޮށްގެން ބާއްވާ ފަސްވަނަ އޮފީސް ބިލިއަޑް މުބާރާތް މި މަހުގެ އަށްވަނަ ދުވަހު ފެށުމަށް ނިންމައި އެ މުބާރާތުގެ ގުރު ނަގައިފިއެވެ.

ޖުމްލަ ތޭރަ އޮފީސް ވާދަކުރާ މި މުބާރާތުގެ ގުރު ނެގުމުގެ ހަފްލާ ހޯމަ ދުވަހުގެރޭ ބަރިސްތާ ރެސްޓޯރެންޓުގައި ކުރިއަށް ގެންގޮސްފައިވާއިރު، މި މުބާރާތަކީ މިހާތަނަށް އެންމެ ފުރިހަމަ އިންތިޒާމްތަކާއެކު ކުރިއަށްދާނެ މުބާރާތް ކަމަށް ބިލިއާޑް އެސޯސިއޭޝަނުން ވަނީ ބުނެފައެވެ.

ސިންގަލް އަދި މިކްސްޑް ޑަބަލްސް އިވެންޓު ހިމަނައިގެން ބާއްވާ މި މުބާރާތުގައި މިއަހަރު އެންމެ ފާހަގަކޮށްލެވޭ ކަމަކީ އަންހެން ކުޅުންތެރިން މި މުބާރާތުގެ މިކްސްޑް ޑަބަލްސް އިވެންޓުގައި ވާދަކުރާ ކަމެވެ. އެގޮތުން މުބާރާތުގައި ވާދަކުރާ ކޮންމެ އޮފީހަކުންވެސް އަންހެން އެއް ކުޅުންތެރިއެއް ވަނީ ބައިވެރިވެފައެވެ. އަދި ބައެއް އޮފީސްތަކުން ދެ ކުޅުންތެރިން ބައިވެރިވެފައިވާކަން ވެސް ފާހަގަކޮށްލެވެއެވެ.

މިއަހަރުގެ މުބާރާތުގައި ވާދަކުރާ 13 ޓީމު ޓީމު ދެ ގްރޫޕަކަށް ބަހާލާފައިވާ އިރު ގްރޫޕް "އޭ"ގައި ހިމެނޭ ޓީމުތަކަކީ ވިލާ، އެމްޕީއެލް، އެމްޑަބްލިއުއެސްސީ، ރައީސް އޮފީސް، ޕޮލިސް ކްލަބު، އެމްއެންޑީއެފް އަދި އެމްއޭސީއެލްއެވެ. އަދި ގްރޫޕް "ބީ"ގައި ހިމެނެނީ ސްޓެލްކޯ، މޯލްޑިވިއަން، ޓީއެމްއޭ، އެމްއައިބީ، ކަސްޓަމްސް އަދި ޕީއެސްއެމްއެވެ.

ރާއްޖެޓީވީގެ ކުޅިވަރު ފައިލް ޕްރޮގްރާމުގައި ވާހަކަ ދައްކަވަމުން ބިލިއާޑް އެސޯސިއޭޝަންގެ ޖެނެރަލް ސެކްރެޓަރީ އަބްދުﷲ ބިޝާރު ވިދާޅުވީ ކުރިން އަހަރުތަކާ ތަފާތުކޮށް މިއަހަރުގެ މުބާރާތުގައި އަންހެން ކުޅުންތެރިން ވާދަކުރާކަމީ އެ ކުޅިވަރަށް ހުޅުވުނު އާ ސޮފުހާއެއް ކަމަށެވެ.

ބިޝާރު ވިދާޅުވީ މިއަހަރުގެ މުބާރާތުގެ ނަތީޖާއަށް ބެލުމަށްފަހު އަންނަ އަހަރު އަންހެން ކުޅުންތެރިންނަށް ހާއްސަކޮށްގެން ބިލިއަޑް މުބާރާތެއް ބޭއްވުމަށް މަސައްކަތްކުރާނެ ކަމަށެވެ.

އަންހެން ކުޅުންތެރިންނަށް މުބާރާތްތަކުގައި ކުޅުމުގެ ފުރުސަތު ދިނުމާއި ގުޅޭ ގޮތުން ބިޝާރު ވިދާޅުވީ ރާއްޖޭގައި ބާއްވާ އެކި މުބާރާތްތަކުގައި އަންހެން ކުޅުންތެރިންނަށް ކުޅުމުގެ ފުރުސަތު ދިނުމަކީ އެ އެސޯސިއޭޝަނުން އަބަދުވެސް އިސްކަމެއްދީގެން ކުރަން މަސައްކަތް ކުރަމުން އަންނަ ކަމެއް ކަމަށާއި އެގޮތުން މިއަހަރަކީ އެކަމަށް އަމާޒު ހިފައިގެން މަސައްކަތްކުރާ އަހަރެއް ކަމަށެވެ.

ބިޝާރު ވިދާޅުވީ ފިރިހެން ކުޅުންތެރިންނެކޭ އެއް ވަރަށް އަންހެން ކުޅުންތެރިންނަށް މި ކުޅިވަރުން ފުރުސަތު ދިނުމަށް ބޭނުންވާ ކަމަށާއި، އަދި އެފަރާތްތަކަށް ބޭނުންވާ ތަމްރީނުތައް އެ އެސޯސިއޭޝަނުން ފޯރުކޮށްދެމުންދާނެ ކަމަށެވެ.