ނިއުގެ 16 އަހަރާއި 19 އަހަރުން ދަށުގެ ޓީމު ނެގުމަށް ސެލެކްޝަންއެއް ބުދަ ދުވަހު
ނިއު އިން އަންނަނީ ފުޓުބޯޅަ ކުރިއަރުވަން ހަރަކާތްތަކެއް ހިންގަމުން
ނިއުގެ އެކަޑަމީގެ ކުޅުންތެރިން އަދި ސީނިއާ ކުޅުންތެރިން ފޮޓޯއަކަށް ހުއްޓިގެން
ނިއުރޭޑިއަންޓް ސްޕޯޓްސް ކްލަބުގެ 16 އަހަރާއި 19 އަހަރުން ދަށުގެ ޓީމު ހޮވުމަށް ބާއްވާ ސެލެކްޝަންއެއް ބުދަ ދުވަހު ބޭއްވުމަށް ހަމަޖެހިފައިވާ ކަމަށް އެ ކްލަބުން ބުނެފިއެވެ.
ރާއްޖެއެމްވީއަށް މައުލޫމާތު ދެމުން ނިއުގެ ޖެނެރަލް ސެކެޓްރީ އަހުމަދު ނިޔާޒް މޫސާ (ޓެޑް) ވިދާޅުވީ އެ ކްލަބުގެ 19 އަހަރާއި 16 އަހަރުން ދަށުގެ ޓީމު ހޮވުމަށް ސެލެކްޝަންއެއް އަންނަ ބުދަ ދުވަހު ބޭއްވުމަށް ހަމަޖެހިފައިވާ ކަމަށާއި، މި ސެލެކްޝަންގައި އެ ދެ އުމުރުފުރައިގެ ކޮންމެ ކުއްޖަކަށްވެސް އައިސް ބައިވެރިވެވޭނެ ކަމަށެވެ.
އެގޮތުން އޭނާ ވިދާޅުވީ ސެލެކްޝަންގެ ތެރެއިން ހޮވާލެވޭ 16 އަހަރުން ދަށާއި، 19 އަހަރުން ދަށުގެ ޓީމުގެ ތެރެއިން ދެ ކުޅުންތެރިޔަކު އިނގިރޭސި ކްލަބް ރެޑިން އެފްސީގެ އެކަޑަމީއަށް ތަމްރީން ހެދުމަށް ފޮނުވަން ހަމަޖެހިފައިވާ ކަމަށެވެ.
ނިއު އާއި ރެޑިން ހަދާފައިވާ އެއްބަސްވުމުގެ ދަށުން ނިއުގެ ޒުވާން ދެ ކުޅުންތެރިޔަކު ރެޑިން އެފްސީގެ އެކަޑަމީން ތަމްރީން ކޮށްދޭން ވަނީ ނިންމާފައެވެ. އެގޮތުން ހަތަރު ހަފްތާގެ މި ތަމްރީން ޕްރޮގްރާމް ފުރިހަމަކޮށް އެ ދެ ކުޅުންތެރިން ފާސްވެއްޖެ ނަމަ އިތުރު ފުރުސަތުތަކެއް ރެޑިން އިން ދޭނެ ކަމަށް އެ ކްލަބުން ވަނީ ބުނެފައެވެ.
ބޮޑު ބަޖެޓަކާ އެކު މި ސީޒަނުގައި ވާދަކުރަމުން އަންނަ ނިއު އިން އަންނަނީ ފުޓުބޯޅަ ކުރިއެރުވުމަށް ތަފާތު ހަރަކާތްތައް ހިންގަމުންނެވެ. އެގޮތުން އެޓީމުން އަންނަނީ އެކި އަތޮޅުތަކުގައި ކްލަބުގެ އެކަޑަމީތައް ގާއިމުކުރުމުގެ މަސައްކަތްވެސް ކުރަމުންނެވެ.
